The Phnom Penh Post Search

Search form




Logo of Phnom Penh Post newspaper Phnom Penh Post - បញ្ហា​គ្រោះថ្នាក់​ដោយសារ​មីន​មាន​ការ​ថយ​ចុះ

បញ្ហា​គ្រោះថ្នាក់​ដោយសារ​មីន​មាន​ការ​ថយ​ចុះ

Content image - Phnom Penh Post
បុរស​ម្នាក់​ចង្អុល​ប្រាប់​កន្លែង​ដែល ត្រាក់ទ័រ​បរ​កិន​ជាន់​មីន ផ្ទុះ​ដាច់​ជា​ពីរ​ក្នុង​ខេត្ត​បាត់ដំបង កាល​ពី​ដើម​ឆ្នាំ​នេះ។ រូបថត សហការី

បញ្ហា​គ្រោះថ្នាក់​ដោយសារ​មីន​មាន​ការ​ថយ​ចុះ

ភ្នំពេញៈ ចំនួន​ជនរងគ្រោះ​ដោយសារ​គ្រាប់​មីន​ និង​គ្រាប់​មិន​ទាន់​ផ្ទុះ​បាន​ធ្លាក់​ចុះ​​ ៣៥ ​ភាគរយ​នៅក្នុង​ឆមាស​ទី​មួយ​នៃ​ឆ្នាំ​ ២០១៥ បើ​ធៀប​នឹង​រយៈពេល​ដូច​គ្នា​ឆ្នាំ​មុន​។ នេះ​បើ​តាម​របាយការណ៍​ពី​អាជ្ញាធរ​គ្រប់គ្រង​សកម្មភាព​កំចាត់​មីន​កម្ពុជា។

បើ​យោង​តាម​របាយការណ៍​នេះ​បាន​ឲ្យ​ដឹង​ថា​៖ «​ចាប់ពី​ខែ​មករា​ដល់​មិថុនា​ឆ្នាំ​ ២០១៥ មាន​ជនរងគ្រោះ​ដោយសារ​មីន​ចំនួន​ ៦៦ ​នាក់​ត្រូវ​បាន​កត់ត្រា​នៅក្នុង​បញ្ជី​ដែល​ចំនួន​នេះ​មាន​ការ​ថយ​ចុះ​ចំនួន​ ៣៥ ​ភាគរយ​បើ​ធៀប​នឹង​រយៈពេល​ដូច​គ្នា​កាលពី​ឆ្នាំ​មុន​ដែល​មាន​ចំនួន​ ១០១ ​នាក់​»។

របាយការណ៍​នេះ​បាន​ឲ្យ​ដឹង​ទៀត​ថា​មនុស្ស​ ១១ ​នាក់​បាន​ស្លាប់​ពោល​គឺ​មាន​ការ​ធ្លាក់​ចុះ​ ៣ ​ភាគរយ​ខណៈ​ដែល​អ្នក​រងរបួស​មាន​ចំនួន​ ៤៣ ​នាក់​គឺ​ធ្លាក់​ចុះ​អស់ ១៩ ​​ភាគរយ​ និង​ ១២ ​នាក់​​ត្រូវ​បាន​កាត់​ជើង​មាន​ការ​ធ្លាក់​ចុះ​ ១៣ ​ភាគរយ​។ តាម​របាយការណ៍​អ្នក​ដែល​រងគ្រោះ​ដោយសារ​មីន​ភាគច្រើន​គឺជា​បុរស​។

នៅក្នុង​ការ​កត់ត្រា​ចុងក្រោយ​បំផុត​នៃ​ខែ​មិថុនា​មាន​ករណី​គ្រោះថ្នាក់​ដោយសារ​មីន​ និង​គ្រាប់​មិន​ទាន់​ផ្ទុះ​សរុប​ចំនួន​ ១០ ករណី​ដែល​កើតឡើង​នៅក្នុង​ខេត្ត​បន្ទាយមានជ័យ ឧត្តរមានជ័យ ប៉ៃលិន បាត់ដំបង សៀមរាប ​និង​ស្វាយរៀង​។

កាលពី​ខែ​មិថុនា​កន្លង​មក​នេះ​មជ្ឈមណ្ឌល​ជាតិ​កំចាត់​មីន​កម្ពុជា​ (CMAC) ​បាន​ចាប់ផ្តើម​ធ្វើ​តេស្ត​​លើ​ប្រសិទ្ធភាព​នៃ​ការ​ប្រើ​សត្វ​កណ្តុរ​ដែល​ត្រូវ​បាន​បណ្តុះបណ្តាល​ និង​នាំ​ចូល​មកពី​ប្រទេស​អាហ្វ្រិក​ដើម្បី​​រក​គ្រាប់​មីន និង​យុទ្ធភណ្ឌ​មិន​ទាន់​ផ្ទុះ​នៅក្នុង​ប្រទេស​កម្ពុជា​។ ​នេះ​បើ​តាម​អគ្គនាយក CMAC ​លោក ​ហេង រតនា ​ដែល​បាន​ប្រាប់​ភ្នំពេញ​ប៉ុស្តិ៍​កាលពី​ពេល​កន្លង​មក។

លោក ហេង រតនា ធ្លាប់​បាន​ឲ្យ​ដឹង​ថា​មាន​កត្តា​មួយ​ចំនួន​ដែល​ជា​ផ្នែក​មួយ​នាំឲ្យ​មាន​ការ​ធ្លាក់​ចុះ​នៃ​អ្នក​គ្រោះថ្នាក់​ដោយសារ​គ្រាប់មីន​ និង​គ្រាប់​មិន​ទាន់​ផ្ទុះ​មាន​ដូចជា​ការ​យល់​ដឹង​កាន់តែ​ច្បាស់​ពី​ស្លាក​សញ្ញា​សម្គាល់​តំបន់​មាន​មីន​ដែល​ខាង​ជំនាញ​មិន​ទាន់​បាន​ដោះ​រួច​ការ​ជ្រួតជ្រាប​កាន់តែ​ច្រើន​ជា​មុន​ពី​ការ​ប៉ះពាល់​គ្រាប់​មិន​ទាន់​ផ្ទុះ​ជាដើម...៕ PS

អត្ថបទគួរចាប់អារម្មណ៍