ភ្នំពេញៈ សេចក្តីសម្រេចលើការដំឡើងប្រាក់ឈ្នួលអប្បបរមាក្នុងវិស័យកាត់ ដេរ គឺត្រូវបានរុញទៅឲ្យរដ្ឋាភិបាលវិញហើយ កាលពីថ្ងៃម្សិលមិញ បន្ទាប់ពីសហជីព និងសមាគមរោងចក្រកាត់ដេរនៅកម្ពុជាខកខានមិនឈានដល់ការព្រម ព្រៀងលើការដំឡើងប្រាក់ឈ្នួលកម្មករ។
បន្ទាប់ពីបញ្ចប់កិច្ច ពិភាក្សាថ្ងៃទី ៣ក្នុងរយៈពេល១៤ ថ្ងៃកន្លងមកនេះ លោក រ៉ុង ឈុន ប្រធានសហភាពសហជីពកម្ពុជា បានប្រាប់ភ្នំពេញ ប៉ុស្តិ៍ ពីល្ងាចម្សិលមិញថា៖«កិច្ចប្រជុំបានទទួលបរាជ័យ ដោយសារគ្មានភាគីណាប្តូរគំនិតរបស់ខ្លួនឡើយ»។
លោក រ៉ុង ឈុន បានថ្លែងថា សម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា សហជីពចលនាកម្មករនិងសហភាពសហជីពកម្ពុជាប្រកាន់ ខ្ជាប់លើការទាមទារចង់ឲ្យដំឡើងប្រាក់ឈ្នួលពី ៦១ ដល់ ១០០ ដុល្លារអាមេរិក ចំណែកសហជីពដទៃទៀតដែលខ្លះថាជាសហជីពគាំទ្ររដ្ឋាភិបាលបានយល់ព្រម ទទួលយក ៩១ដុល្លារអាមេរិក។
លោក រ៉ុង ឈុន បញ្ជាក់ថា៖ «និយោជកនៅតែបដិសេធការទាមទាររបស់កម្មករ។ គេព្រមដំឡើងតែ៩ដុល្លារប៉ុណ្ណោះ។ មធ្យោបាយចុងក្រោយគឺប្រមូលផ្តុំកម្មករ ដើម្បីធ្វើការទាមទារផ្ទាល់ឲ្យដំឡើងប្រាក់ឈ្នួល»។
លោក Dave Welsh អ្នកគ្រប់គ្រងប្រចាំប្រទេសនៃមជ្ឈមណ្ឌលអាមេរិកដើម្បីសាមគ្គីភាពពលកម្មអន្តរជាតិ ថ្លែងថា ពេលវេលាដំឡើងប្រាក់ឈ្នួលនេះ ហាក់ដូចជាមិនច្បាស់ទេ ចំនួនប្រាក់ត្រូវដំឡើងក៏មិនច្បាស់ដែរ។
លោកបន្តថា៖ «ពុំមានការដោះស្រាយច្បាស់លាស់ ឬកម្មវិធីពិតប្រាកដសម្រាប់រដ្ឋាភិបាលឈានជើងចូលមកឡើយ»។
លោក បន្តថា ទោះជាយ៉ាងណា រដ្ឋាភិបាលមានឱកាសចាត់វិធានការច្រើន។ «វាមិនមែនក្រុមហ៊ុនម៉ាក ឬឧស្សាហកម្មកាត់ដេរនេះត្រូវបញ្ជាទៅកាន់រដ្ឋាភិបាលឡើយ។ យើងនឹងលើកទឹកចិត្តសហជីពឲ្យយកឱកាសនេះជាជំហានទី១ ដើម្បីទទួលបានអ្វីមួយកាន់តែមានលក្ខណៈជាប្រព័ន្ធបន្ថែម ទាក់ទងនឹងការដំឡើងប្រាក់ឈ្នួល»។
លោក ខេន លូ អគ្គលេខាធិការសមាគមរោងចក្រកាត់ដេរនៅកម្ពុជា ក៏លើកឡើងដែរថា រដ្ឋាភិបាលចាំបាច់ត្រូវប្រកាន់ជំហរលើបញ្ហានេះ ប៉ុន្តែ លោកបានបន្ថែមថា កិច្ចពិភាក្សានឹងបន្តក្នុងពេលឆាប់ៗ នាសប្តាហ៍ក្រោយនេះ។
លោកបញ្ជាក់ថា៖ «យើងនឹងបន្តពិភាក្សា។ វាមិនទាន់ចប់ទេ។ ខ្ញុំគិតថាអ្វីដែលសំខាន់ គឺថាសហជីពត្រូវមានជំហររួម។ អ្នកខ្លះចង់បានលើសពី ៩១ ដុល្លារអាមេរិក។ ជំហររបស់ពួកយើងគឺនៅតែដដែលក្នុងរយៈពេល ២ សប្តាហ៍មកនេះ»។
លោក ខេន លូ បញ្ជាក់ថា ចំណុចមួយដែលសមាគមរោងចក្រកាត់ដេរកម្ពុជាអាចបត់បានគឺ ការរួមចំណែកថវិកាពីក្រុមហ៊ុនម៉ាក ទាក់ទិននឹងការបង់ប្រាក់ឈ្នួល។ «យើងគ្មានបញ្ហាបង់ប្រាក់ឲ្យកម្មករទេ ដរាបណាប្រាក់បន្ថែមបានមកពីអ្នកទិញ»៕ TK
