ភ្នំពេញៈ យោងតាមរបាយការណ៍ថ្មីមួយបានឱ្យដឹងថាបណ្ដាញសហគមន៍ព្រៃឡង់ (PLCN) បានកត់ត្រាតាមរយៈកម្មវិធីបច្ចេកវិទ្យាស្មាតហ្វូនដោយរកឃើញនូវសកម្មភាពខុសច្បាប់សរុបចំនួន ២៩២៩ ករណីនៃបទល្មើសព្រៃឈើនៅក្នុងខេត្តចំនួន ៤ គិតចាប់តាំងពីខែកុម្ភៈ ឆ្នាំ ២០១៥ មក ។
របាយការណ៍ចេញផ្សាយកាលពីថ្ងៃព្រហស្បតិ៍សប្តាហ៍មុន ដែលកាសែត ភ្នំពេញ ប៉ុស្តិ៍ ទើបទទួលបានពីម្សិលមិញបានឲ្យដឹងថា បណ្តាញដែលជាសម្ព័ន្ធសហគមន៍ ជុំវិញតំបន់ព្រៃឈើនៅភាគខាងជើងកម្ពុជាបានចងក្រងឯកសារបទល្មើសព្រៃឈើ ២ ទសវត្សរ៍មកហើយនៅតំបន់ព្រៃឡង់ក្នុងខេត្តកំពង់ធំ ស្ទឹងត្រែង ក្រចេះ និងព្រះវិហារ។
របាយការណ៍ថា៖ «ចាប់ពីឆ្នាំ ២០១៥ មកបណ្តាញនេះបានកត់ត្រាជាប្រព័ន្ធនូវសកម្មភាពខុសច្បាប់សរុបបាន ២៩២៩ ករណីជាមួយបច្ចេកវិទ្យាស្មាតហ្វូន»។
បើតាមរបាយការណ៍ សកម្មភាពខុសច្បាប់ភាគច្រើនគឺនៅខេត្តកំពង់ធំដោយមាន ១០១៩ ករណី ឬ ៣៤,៨៣ ភាគរយ បន្ទាប់មកគឺខេត្តក្រចេះមាន ៩១១ ករណី ឬ ៣១,១៣ ភាគរយ ខេត្តស្ទឹងត្រែងមាន ៥៦៨ ករណី ឬ ១៩,១៤ ភាគរយ និងខេត្តព្រះវិហារមាន ៤២៨ ករណី ឬ ១៤,៦ ភាគរយ។
គ្រាន់តែក្នុងខែសីហាថ្មីៗនេះបណ្តាញនេះបានរកឃើញការដឹកជញ្ជូនឈើ ៣៣ លើកឃើញគល់ឈើធំៗសល់ពីកាប់រួច ៣៦ ឈើអារច្រៀករួច ១៨ និងតំបន់កាប់ឆ្ការរួចមាន ៤ ទីតាំង ដែលភាគច្រើនក្នុងខេត្តព្រះវិហារ ប៉ុន្តែខេត្តផ្សេងក៏មានដែរ។
កាលពីខែឧសភាឆ្នាំ ២០១៦ រដ្ឋាភិបាលបានដាក់តំបន់ព្រៃឡង់ជាង ៤០ ម៉ឺនហិកតាជាតំបន់ដែនជម្រកសត្វព្រៃឱ្យស្ថិតក្រោមក្រសួងបរិស្ថាន។
លោក ហឿន សុភាព សមាជិកម្នាក់របស់ PLCN ក្នុងខេត្តកំពង់ធំកត់សម្គាល់ថា បទល្មើសព្រៃឈើនៅតែកើតមានពិសេសក្នុងខេត្តកំពង់ធំដោយសារមានច្រកចូលជាច្រើនទៅក្នុងតំបន់មានព្រៃឈើដែលសម្រួលដល់ជនល្មើស។
លោកបន្ថែមថាលើសពីនេះមន្ត្រីអាជ្ញាធរខ្លះនៅតែទទួលសំណូកពីជនល្មើស។
លោកបន្តថា៖ «មន្ត្រីមួយចំនួនមិនអនុវត្តច្បាប់ទេ ជាពិសេសផ្នែករដ្ឋបាលព្រៃឈើ និងផ្នែកបរិស្ថាន។ ប្រសិនបើច្បាប់ត្រូវបានអនុវត្ត នោះបទល្មើសមិនអាចកើតបានទេ។ ពួកគេត្រូវគ្នា...»។
បើតាមលោក សុភាព បណ្តាញពួកលោកកំពុងប្រើទូរស័ព្ទស្មាតហ្វូនជាង ៤០ គ្រឿងដើម្បីប្រមូល និងបញ្ជូនព័ត៌មានអំពីបទល្មើសព្រៃឈើក្នុងខេត្តទាំង ៤ នេះ។
យ៉ាងណាក្ដីលោក តុប កក្កដា ប្រធានមន្ទីរបរិស្ថានខេត្តកំពង់ធំថា មិនបានដឹងអំពីរបាយការណ៍នោះទេហើយហាក់មិនឯកភាពនឹងការរកឃើញនេះឡើយ។ ផ្ទុយទៅវិញលោកថាបទល្មើសព្រៃឈើបានធ្លាក់ចុះនៅដែនជម្រកសត្វព្រៃព្រៃឡង់ក្នុងខេត្តកំពង់ធំដោយសារការបង្ក្រាបបទល្មើសទាំងនោះទៀងទាត់។
លោកថា៖ «យើងព្យាយាមបង្ក្រាបបទល្មើសរាល់ថ្ងៃ។ ការបង្ក្រាបភាគច្រើនបំផុតគឺនៅខេត្តកំពង់ធំ [ជាងខេត្តដទៃៗទៀត]»។
ចំពោះការចោទពីរឿងពុករលួយលោក កក្កដា ថាលោកតែងណែនាំមន្ត្រីអនុរក្សឲ្យធ្វើការមានប្រសិទ្ធភាព និងកុំទទួលយកលុយកាក់ណាមួយ។
លោកថាដើម្បីកែលម្អការងារលោកតែងផ្លាស់មន្ត្រីអនុរក្សពីទីតាំងមួយរៀងរាល់ ២-៣ ខែម្តង។
លោកថា៖ «យើងមិនដែលឃើញពួកគេយក [លុយ] ដោយផ្ទាល់ភ្នែកទេ»៕ NS