.jpg)
បណ្តាញសហគមន៍ព្រៃឡង់ ចុះល្បាតក្នុងព្រៃឡង់នៅស្រុកសណ្ដាន់ ខេត្តកំពង់ធំ នាពេលកន្លងមក។ ហេង ជីវ័ន
ភ្នំពេញៈ បណ្តាញសហគមន៍ព្រៃឡង់ (PLCN) ត្រូវបានក្រុមគណៈកម្មការវិនិច្ឆ័យ SDG Tech Awards ជ្រើសរើសជាបេក្ខភាព ១ ក្នុងចំណោមបេក្ខភាពចំនួន ៥ ចុងក្រោយ ដែលត្រូវឈ្នះបានពានរង្វាន់ពីកម្មវិធីសប្តាហ៍បៃតងរបស់សហភាពអឺរ៉ុប (EU Green Week)។ នេះបើយោងតាមការផ្សព្វផ្សាយរបស់បណ្ដាញសង្គម Prey Lang-Its our Forest Too។
លោក នូ ណារិទ្ធ មន្ត្រីគម្រោងបណ្ដាញសហគមន៍ព្រៃឡង់បានប្រាប់ភ្នំពេញ ប៉ុស្តិ៍ នៅថ្ងៃម្សិលមិញថា កាលពីថ្ងៃទី ២៧ ខែ កញ្ញា ឆ្នាំ ២០២០ គណៈកម្មការវិនិច្ឆ័យ SDG Tech Awards Jury Penal បានផ្ញើសារចូលរួមអបអរសាទរដល់ក្រុមការងារបណ្ដាញសហគមន៍ព្រៃឡង់ដែលត្រូវបានជ្រើសរើសជាបេក្ខភាព ១ ក្នុងចំណោមបេក្ខភាពចំនួន ៥ ដែលត្រូវឈ្នះពានរង្វាន់ «EU Green Week 2020» ។
នៅក្នុងសារនោះ SDG Tech Awards Jury Penal បានគូសបញ្ជាក់ថា៖ «ពួកយើងបានជ្រើសរើស Prey Lang-It''s Our Forest Too ឱ្យក្លាយជាបេក្ខភាព ១ ក្នុងចំណោមបេក្ខភាព ៥ ចុងក្រោយ ដែលត្រូវឈ្នះពានរង្វាន់ពីកម្មវិធី EU Green Week។ មានបេក្ខជនចំនួនជាង ៥០០ ដែលមានដំណោះស្រាយប្រកបដោយភាពបំផុសគំនិត ដូច្នេះអ្នកអាចមានមោទនៈដែលកិច្ចខិតខំប្រឹងប្រែងរបស់អ្នកត្រូវបានទទួលស្គាល់ពីក្នុងចំណោមដំណោះស្រាយរាប់រយផ្សេងទៀត»។
លោក ណារិទ្ធ បានថ្លែងថា៖ «ការគាំទ្រលើកទឹកចិត្តពីគ្រប់ភាគីពាក់ព័ន្ធទាំងក្នុង និងក្រៅប្រទេសបានជំរុញឱ្យក្រុមការងារនៃបណ្ដាញសហគមន៍ព្រៃឡង់ មានស្មារតីរឹងមាំក្នុងការទទួលខុសត្រូវខ្ពស់លើកិច្ចការពារ និងអភិរក្សធនធានធម្មជាតិ និងបរិស្ថាននៅកម្ពុជា»។
លោកស្រី Natasha Friis Saxberg អនុប្រធានមូលនិធិសម្រាប់គណនីយភាពសង្គម និងជាសមាជិកគណៈកម្មការវិនិច្ឆ័យ SDG Tech Awards បានប្រាប់ភ្នំពេញប៉ុស្តិ៍ថា បណ្ដាញសហគមន៍ព្រៃឡង់ ពិតជាត្រូវបានជ្រើសរើសជាបេក្ខភាពចុងក្រោយមួយដែលត្រូវឈ្នះពានរង្វាន់ពីកម្មវិធី EU Green Awards 2020 ដែលកម្មវិធីប្រកាសប្រគល់ពានរង្វាន់ដល់អ្នកឈ្នះនឹងត្រូវធ្វើឡើងនៅថ្ងៃទី ២២ ខែតុលា ឆ្នាំ ២០២០ ខាងមុខនេះនៅក្នុងប្រទេសដាណឺម៉ាក។
បើតាមការបញ្ជាក់របស់លោកស្រី Natasha បណ្ដាញសហគមន៍ព្រៃឡង់នឹងទទួលបានពានរង្វាន់ ១ ទៀតក្នុងពេលដ៏ខ្លីខាងមុខនេះ ហើយវានឹងក្លាយជាពានរង្វាន់ទី ៥ ដែលសហគមន៍នេះទទួលបានចាប់តាំងពីឆ្នាំ ២០១២ មក។ កាលពីឆ្នាំមុនបណ្ដាញសហគមន៍ព្រៃឡង់បានឈ្នះពានរង្វាន់ «National Energy Globe Award 2019» ពីអង្គការថាមពលពិភពលោក ចំពោះភាពសកម្មរបស់ពួកគេក្នុងកិច្ចខិតខំប្រឹងប្រែងការពារព្រៃឈើ និងបរិស្ថានដែលកំពុងទទួលរងការបំផ្លាញ។
បណ្តាញសហគមន៍ព្រៃឡង់ដែលតែងតែមានភាពសកម្មក្នុងការចុះល្បាតព្រៃ ដើម្បីទប់ស្កាត់បទល្មើសព្រៃឈើ គឺជាបណ្តាញមួយដែលមានសមាជិកសហគមន៍មូលដ្ឋាន ដែលធ្វើការដើម្បីស្តារព្រៃឡង់ពីការកាប់ឈើខុសច្បាប់។ ក្រុមល្បាតព្រៃឈើនៃបណ្តាញនេះបានកត់ត្រាពីការកាប់ឈើខុសច្បាប់ និងធនធានមានតម្លៃ និងរាយការណ៍ពីការរកឃើញរបស់ខ្លួនទៅអ្នកបង្កើតគោលនយោបាយ និងសាធារណជន។ គម្រោងនេះធ្វើការនៅចំណុចប្រសព្វរវាងអភិបាលកិច្ចល្អ សម្រាប់ធនធានធម្មជាតិ ការកសាងសន្តិភាព និងវិធីសាស្ដ្រផ្អែកលើសិទិ្ធមនុស្ស ហើយ និងប្រើប្រាស់ព័ត៌មាន និងបច្ចេកវិទ្យាទំនាក់ទំនងថ្មីៗ។
ទោះយ៉ាងណាក៏ដោយ កាលពីថ្មីៗកន្លងទៅនេះអាជ្ញាធរបានហាមឃាត់ពួកគេមិនឲ្យចុះល្បាតព្រៃដោយចោទថា បណ្ដាញសហគមន៍ព្រៃឡង់របស់ពួកគេមិនបានចុះបញ្ជីត្រឹមត្រូវតាមផ្លូវច្បាប់ ហើយធ្វើសកម្មភាពបែបអនាធិបតេយ្យលើវិស័យបរិស្ថាន ដើម្បីរិះគន់ដល់កិច្ចខិតខំប្រឹងប្រែងរបស់មន្ត្រីរដ្ឋាភិបាល។
លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថានកាលពីម្សិលមិញ មិនបានសម្ដែងក្ដីត្រេកអរចំពោះដំណឹងនេះឡើយ ដោយបានចាត់ទុកការវិនិច្ឆ័យសម្រាប់ការផ្ដល់ពានរង្វាន់នេះថា ជាការលើកតម្កើងតែលើក្រុមសកម្មជននយោបាយដែលជ្រកក្រោមស្លាកសកម្មជនបរិស្ថាន និងព្រៃឈើ ព្យាយាមធ្វើសកម្មភាពអនាធិបតេយ្យនៅក្នុងវិស័យបរិស្ថាន និងធនធានធម្មជាតិដោយគេចវេះពីការគោរពច្បាប់។
ពួកគេគួរបើកចិត្តឲ្យទូលាយ និងហ៊ានទទួលស្គាល់ការពិតនៃការលះបង់របស់មន្ត្រីឧទ្យានុរក្សនៃក្រសួងបរិស្ថាន និងមន្ត្រីនៃស្ថាប័នមានសមត្ថកិច្ចពាក់ព័ន្ធ និងប្រជាសហគមន៍តំបន់ការពារធម្មជាតិ សមាជិកសហគមន៍ព្រៃឈើដែលគោរពច្បាប់ និងបានកំពុងតែចូលរួមយ៉ាងសកម្មក្នុងការការពារ និងអភិរក្សធនធានធម្មជាតិតាមរយៈការចុះល្បាតទប់ស្កាត់បទល្មើស ការផ្សព្វផ្សាយ និងអប់រំចំណេះដឹងបរិស្ថាន ព្រៃឈើ និងសត្វព្រៃដល់សមាជិកសហគមន៍ក៏ដូចជាសាធារណជនផ្សេងទៀត។
លោកបានបញ្ជាក់ថា៖ «ការការពារ និងអភិរក្សធនធានធម្មជាតិ ព្រៃឈើ សត្វព្រៃ គ្មានជំងឺតួឯកនិយម ហើយក៏មិនសំដៅតែទៅលើក្រុមណាមួយឡើយ គឺជាភារកិច្ចរួមរបស់យើងទាំងអស់គ្នា»៕
