ភ្នំពេញៈ សាលដីកានៃបណ្តឹងសុំនៅក្រៅឃុំរបស់លោក រ៉ាត់ រ័ត្នមុនី ពាក់ព័ន្ធនឹងការផលិតភាពយន្ត «ម្តាយខ្ញុំលក់ខ្ញុំ» ត្រូវបានសាលាឧទ្ធរណ៍កំណត់ប្រកាសនៅថ្ងៃព្រះហស្បតិ៍នេះ បន្ទាប់ពីបានបើកសវនាការជំនុំជម្រះជាអសាធារណៈកាលពីម្សិលមិញ។
សវនាការអសាធារណៈនេះបានដំណើរការអស់ពេលប្រមាណ ៤០ នាទី ដោយចាប់ផ្ដើមពីម៉ោង ១០ កន្លះទៅ ដោយមានសមាសភាពលោកចៅក្រម សួស សំអាត ជាប្រធានក្រុមប្រឹក្សាជំនុំជម្រះ និងមានលោកព្រះរាជអាជ្ញា តាន់ សេណារ៉ុង តំណាងមហាអយ្យការ។
អ្នកស្រី ឡុង គឹមហ៊ាង ដែលជាប្រពន្ធរបស់លោក រ៉ាត់ រ័ត្នមុនី បានប្រាប់ក្រុមអ្នកសារព័ត៌មាននៅក្រៅបន្ទប់សវនាការថាសវនាការនេះគឺជនុំជម្រះលើបណ្តឹងសុំនៅក្រៅឃុំដែលមានលោកមេធាវី សំទិត្យ សីហា និងលោកមេធាវី ឡោ ជុនធី ជាអ្នកការពារសិទ្ធិឲ្យប្តីរបស់អ្នកស្រី ប៉ុន្តែពួកគាត់ទាំង ២ នាក់គ្មានវត្តមានក្នុងសវនាការទេ។
បើតាមអ្នកស្ត្រី គឹមហ៊ាង រឿងអវត្តមានមេធាវីការការពារសិទ្ធិឲ្យប្ដីអ្នកស្រីគឺដោយសារពួកគាត់មិនបានទទួលដីកាអញ្ជើញពីសាលាឧទ្ធរណ៍។
កាលពីម្សិលមិញ ភ្នំពេញប៉ុស្តិ៍បានព្យាយាមទាក់ទងលោក មេធាវី សំទិត្យ សីហា និងលោកមេធាវី ឡោ ជុនធី ដែរ តែមិនអាចទាក់ទងបាន។ ទោះយ៉ាងណា លោក ទូច ថារិទ្ធិ អ្នកនាំពាក្យសាលាឧទ្ធរណ៍បានបញ្ជាក់កាលពីម្សិលមិញថា ធម្មតាមុនបើកសវនាការគឺសាលាឧទ្ធរណ៍តែងចេញដីកាកោះអញ្ជើញគ្រប់ភាគីមកចូលរួមជំនុំជម្រះក្តី ដោយមិនអាចគ្មានការកោះអញ្ជើញជាមុនទេ។
លោកថា៖ «ករណីនេះអាចមកពីមេធាវីនោះមិនបានដាក់ពាក្យស្នើសុំការពារសិទ្ធិនៅសាលាឧទ្ធរណ៍ ហើយប្រសិនបើបានដាក់ពាក្យសុំការពារសិទ្ធិនោះ គឺតុលាការសាលាឧទ្ធរណ៍យើងខ្ញុំធ្វើតាមច្បាប់ហើយ»។
ជុំវិញខ្លឹមសារនៃសវនាការនេះ អ្នកស្រី ឡុង គឹមហ៊ាង មិនបានបញ្ជាក់នោះទេ ដោយថាប្តីអ្នកស្រីមិនបានប្រាប់ដោយគ្រាន់តែថាចៅក្រមបានសួរគាត់ច្រើន ហើយគាត់ផ្តាំអ្នកស្រីឲ្យគិតពីសុវត្ថិភាពផ្ទាល់ខ្លួន និងកូនប្រុសដែលទើបមានអាយុ ១ ឆ្នាំ ១ ខែ តែអ្នកស្រីរំពឹងថា សាលដីកានឹងមានលទ្ធផលល្អ។
អ្នកស្រី គឹមហ៊ាង ថ្លែងថា៖ «ខ្ញុំសូមអំពាវនាវដល់តុលាការឧទ្ធរណ៍ឲ្យប្តីខ្ញុំបាននៅក្រៅឃុំផងដោយសារតែពួកខ្ញុំមានមុខរបរពិតប្រាកដ ពួកយើងមានលំនៅពិតប្រាកដ ហើយការប្រកាសសាលដីកានៅថ្ងៃស្អែក (ថ្ងៃទី ៣១ មករា) នេះសូមឲ្យមានលទ្ធផលជាវិជ្ជមានដល់ប្តីរបស់ខ្ញុំ»។
អ្នកស្រី គឹមហ៊ាង បានប្រាប់ថា ប្តីអ្នកស្រីមានអាការពិបាកដកដង្ហើម ដោយសារបន្ទប់ឃុំឃាំងក្នុងពន្ធនាគារព្រៃសចង្អៀតនិងមានអ្នកជក់បារីច្រើនធ្វើឲ្យដេកមិនសូវលក់ ហើយមានកើតរមាស់ផង។
ចំពោះមូលហេតុដែលនាំឲ្យមានការចាប់ខ្លួនលោក រ៉ាត់ រ័ត្នមុនី ជាប្ដី ត្រូវបានអ្នកស្រី ឡុង គឹមហ៊ាង អះអាងថា ទាក់ទងនឹងរឿង «ម្តាយខ្ញុំលក់ខ្ញុំ» ដែលខាងអ្នកផលិតភាពយន្តនៅប្រទេសរុស្ស៊ីយកខ្សែភាពយន្តនោះទៅបញ្ចាំងតាមផ្កាយរណបហើយត្រូវបកប្រែប្រមាណ ១០ ភាសា។
បន្ទាប់មកអ្នកនៅកម្ពុជាបាននាំគ្នាចែករំលែកបន្តទើបនាំឲ្យភាពយន្តនេះល្បី។ អ្នកស្រី គឹមហ៊ាង បញ្ជាក់ថា៖ «ខ្ញុំ និងប្តីបន្ទាប់ពីមើលឃើញចំណងជើងភាពយន្តនេះក៏បារម្ភនិងគិតថា អាចនឹងមានបញ្ហាហើយបានទូរស័ព្ទប្រាប់អ្នកផលិតភាពយន្តនោះ ហើយត្រូវគេប្រាប់ថា បើមានបញ្ហាគេនឹងផ្តល់មេធាវីដើម្បីជួយផ្នែកផ្លូវច្បាប់។ ប៉ុន្តែក្រោយពីប្តីខ្ញុំត្រូវបានចាប់ខ្លួនខាងអ្នកផលិតភាពយន្តមិនបានផ្តល់មេធាវីឲ្យទេ ព្រោះថា យើងរកមេធាវីបាននៅក្នុងប្រទេសហើយ»។
អ្នកស្រីប្រាប់ថា ដោយសារចង់បានការអន្តរាគមន៍រឿងនេះ ក្រុមគ្រួសាររបស់អ្នកស្រីបាននាំគ្នាតវ៉ា និងដាក់ញត្តិនៅមុខស្ថានទូតរុស្ស៊ី ៣ លើកមកហើយ ប៉ុន្តែមិនបានលទ្ធផលទេ។ ផ្ទុយទៅវិញមានបុរសម្នាក់បានទូរស័ព្ទប្រាប់អ្នកស្រីថា មូលហេតុដែលស្ថានទូតមិនអន្តរាគមន៍ដោយសារពេលតវ៉ានោះមានអ្នកបឹងកក់ចូលរួម។ ដូច្នេះខាងស្ថានទូតខ្លាចមានពាក់ព័ន្ធរឿងនយោបាយទើបធ្វើមិនដឹងទៅ។
អ្នកស្រីរំឭកប្រាប់ថា នៅមុនខែធ្នូ ឆ្នាំ២០១៨ អ្នកស្រី និងប្តីបានទៅប្រទេសថៃក្នុងបំណងមើលស្ថានភាពកម្មករខ្មែរនៅទីនោះដើម្បីថតភាពយន្តនិយាយអំពីជីវិតកម្មករខ្មែរធ្វើការនៅថៃ។ ពេលនោះមានមិត្តភក្ដិប្តីអ្នកស្រីម្នាក់នៅប្រទេសនូវែលសេឡង់បានអញ្ជើញប្តីអ្នកស្រីទៅចូលរួមបុណ្យគ្រិស្តស្មាសនៅស្រុកគេ។ ប៉ុន្តែលុះដល់ថ្ងៃទី ៧ ខែធ្នូ ខណៈអ្នកស្រី និងប្តីទៅសុំទិដ្ឋាការនៅស្ថានទូតនូវែលសេឡង់ក៏ត្រូវបានសមត្ថកិច្ចថៃចាប់ខ្លួនប្តីអ្នកស្រីតែម្តង បន្ទាប់មកក៏បញ្ជូនមកកម្ពុជា៕