ភ្នំពេញៈ ក្រុមប្រឹក្សាអាជ្ញាកណា្ដលបានចេញរបាយការណ៍ប្រចាំឆ្នាំរបស់ខ្លួនដោយបង្ហាញថា បណ្ដឹងវិវាទការងារក្នុងឆ្នាំ ២០១៧ ដែលបានចុះបញ្ជីបានធ្លាក់ចុះខ្លាំង បន្ទាប់ពីរដ្ឋាភិបាលបានអនុវត្តច្បាប់ស្តីអំពីសហជីព ប៉ុន្តែមន្ត្រីសហជីពថា នេះមិនមែនឆ្លុះបញ្ចាំងពីការថយចុះជម្លោះរវាងនិយោជក និងកម្មករទេ។
របាយការណ៍ដែលត្រូវបានចុះផ្សាយកាលពីថ្ងៃចន្ទម្សិលម្ង៉ៃបានឲ្យដឹងថា ក្រុមប្រឹក្សាបានទទួលបណ្ដឹងវិវាទការងារ ២៤៨ ករណីកាលពីឆ្នាំ ២០១៦ ប៉ុន្តែកាលពីឆ្នាំមុនមានតែ ៥០ ករណីប៉ុណ្ណោះត្រូវបានប្ដឹងមកក្រុមប្រឹក្សាអាជ្ញាកណ្ដាល។
របាយការណ៍បញ្ជាក់ថា៖ «ក្នុងអំឡុងពេល ២ ឆ្នាំស្ថានភាពបានផ្លាស់ប្ដូរ ហើយចំនួនករណីដែលត្រូវបានចុះឈ្មោះនៅក្រុមប្រឹក្សាអាជ្ញាកណ្ដាលបានធ្លាក់ចុះ។ នេះប្រហែលមកពីការអនុវត្តនៃច្បាប់ស្ដីអំពីសហជីព»។
រាជរដ្ឋាភិបាលបានអនុម័តច្បាប់នេះកាលពីខែឧសភាឆ្នាំ ២០១៦ ដើម្បីជួយរកដំណោះស្រាយលើវិវាទរវាងនិយោជក និងនិយោជិត។
បើតាមរបាយការណ៍នេះជាមធ្យមមានបណ្ដឹងពីជម្លោះ ២០ ករណីត្រូវបានប្ដឹងក្នុងខែនីមួយៗ ប៉ុន្តែបានធ្លាក់ចុះជាបណ្ដើររហូតសល់តែ ៥ ករណីក្នុង ១ ខែបន្ទាប់ពីច្បាប់ស្ដីអំពីសហជីពត្រូវបានអនុវត្តនៅខែកញ្ញា ឆ្នាំ ២០១៦។
យ៉ាងណាក្តី ខណៈក្រុមប្រឹក្សាអាជ្ញាកណ្ដាលថាជម្លោះការងារបានធ្លាក់ចុះយ៉ាងគំហុកនោះ អ្នកតំណាងក្រុមកម្មករបានសម្ដែងក្ដីកង្វល់ថា ច្បាប់នោះគឺជាការបោះជំហានថយក្រោយ ខណៈវិវាទមិនអាចបញ្ជូនដល់ក្រុមប្រឹក្សាអាជ្ញាកណ្ដាលដោយសារការិយាធិបតេយ្យ។
លោក ឃុន ថារ៉ូ នាយករងកម្មវិធីរបស់អង្គការសង់ត្រាល់បានថ្លែងថា ការចុះឈ្មោះសហជីពមានដំណើរការលំបាកក៏ព្រោះតែច្បាប់ស្មុគស្មាញខ្លាំង។
លោកថា៖ «ការចុះឈ្មោះសហជីពពិតស្មុគស្មាញមែនដោយសារលក្ខខណ្ឌទាមទារមានភាពរញ៉េរញ៉ៃ។ ចាប់តាំងពីឆ្នាំ ២០១៧ មកមានសហជីពជាច្រើនជួបការលំបាកក្នុងការចុះឈ្មោះ និងមិនអាចដំណើរការទៅមុនបាន»។
លោកថា រ៉ូ បានបន្តថា៖ «នៅពេលសហជីពមិនមានឯកសារសម្រាប់បង្ហាញថា ពួកគេជាអ្នកតំណាងកម្មករ តើឲ្យពួកគេអាចធ្វើជាតំណាងក្រុមកម្មករនៅក្នុងជម្លោះនានាឬទេ? ដូច្នេះវាគឺជាបញ្ហាប្រឈមក្នុងការដោះស្រាយវិវាទការងារហើយក៏ប្រឈមសម្រាប់ក្រុមកម្មករផ្ទាល់ដែរ»។
លោកអះអាងថា៖ «ច្បាប់បានប្រគល់អំណាចទៅឲ្យក្រុមមន្ត្រីហើយពួកគេមានសិទ្ធិច្រានចោលបណ្ដឹង ឬបញ្ជូនបន្តទៅកាន់ក្រុមប្រឹក្សាអាជ្ញាកណ្ដាលឲ្យដោះស្រាយ។ នៅក្នុងច្រើនករណីមកហើយ ពួកគេថាពួកយើងមិនមានអ្នកតំណាង ឬ ក៏ថាពួកយើងពុំមានឯកសារផ្លូវការសម្រាប់ដាក់ធ្វើជាតំណាងឲ្យករណីវិវាទបាន»។
ប៉ុន្តែលោក ថារ៉ូ បានសរសើរពីការងារនៃក្រុមប្រឹក្សាអាជ្ញាកណ្ដាលដែលភាគច្រើននៃសេចក្ដីសម្រេចចិត្តពួកគេត្រូវបានទទួលស្គាល់ដោយក្រុមហ៊ុនបរទេស។
លោក ថារ៉ូ បន្ថែមថា៖ «ក្រុមប្រឹក្សាអាជ្ញាកណ្ដាលបានជួយពង្រឹងនូវលក្ខខណ្ឌការងារ ការផ្ដល់សំណងដល់កម្មករ និង ផ្ដល់ផលប្រយោជន៍ផ្សេងៗទៀតដល់កម្មករ...»។
យ៉ាងណាក្ដីក្រុមសកម្មជនសហជីព និងសិទ្ធិការងារបានអះអាងថាការធ្លាក់ចុះបណ្ដឹងនេះមិនបានចង្អុលបង្ហាញពីការធ្លាក់ចុះនៃវិវាទរវាងនិយោជក និងនិយោជិតនោះទេ។
លោកស្រី យ៉ាង សុភណ្ឌ ប្រធានសម្ព័ន្ធសហជីពកម្ពុជា (CATU) បានថ្លែងថា ទិសដៅសព្វថ្ងៃនេះមិនបានផ្ដល់ភាពល្អប្រសើរដល់ទំនាក់ទំនងឧស្សាហកម្មទេ ជាពិសេសសម្រាប់ក្រុមកម្មករ។
លោកស្រីថា៖ «វាមិនមានន័យថាវិវាទការងារមិនបានកើតឡើងនោះទេ។ ក្រុមកម្មករគ្រាន់តែមានភាពភ័យខ្លាចចំពោះការធ្វើបាតុកម្ម ដោយសារពួកគេខ្លាចត្រូវវាយធ្វើបាប ហើយនោះក៏មិនមានន័យថា ទាំងនិយោជក និងនិយោជិតមានការយល់ដឹងពីគ្នាបានច្រើននោះដែរ»។
លោកស្រីអះអាងថា៖ «នៅពេលដែលវិវាទកើតឡើង ទាំងក្រុមកម្មករ ទាំងនិយោជក និងរដ្ឋាភិបាល ចុងក្រោយនឹងខាតបង់ទាំងអស់គ្នា។ វាពិតជាប៉ះពាល់ប្រយោជន៍កម្មករប្រាកដមែន ខណៈវិវាទរបស់ពួកគេមិនត្រូវបានដោះស្រាយ...»។
នាយកដ្ឋានដោះស្រាយវិវាទការងារនៃក្រសួងការងារបានឲ្យដឹងថា ករណីបណ្ដឹងបុគ្គល ៤៧៦ ត្រូវបានចុះឈ្មោះជាមួយនាយកដ្ឋាននៅឆ្នាំមុន ក្នុងនោះមាន ២២៨ ករណីត្រូវបានដោះស្រាយ ខណៈ ១៩១ ករណីមិនអាចដោះស្រាយបានហើយ ៥៧ ករណីត្រូវបានច្រានចោល។
ជាមួយគ្នានេះនាយកដ្ឋានក៏ទទួលបាន ១២៧ ករណីជាវិវាទរួមផងដែរ ដែលលទ្ធផលដោះស្រាយបាន ៥៦ ករណី ខណៈ ៧០ ករណីមិនត្រូវបានដោះស្រាយ និងតែ ១ ករណីត្រូវបានច្រានចោល៕