.jpg)
សារមន្ទីរឧក្រិដ្ឋកម្មប្រល័យពូជសាសន៍ទួលស្លែង។ ហ៊ាន រង្សី
សារមន្ទីរឧក្រិដ្ឋកម្មប្រល័យពូជសាសន៍ទួលស្លែងសម្ពោធជាផ្លូវការ កាលពីចុងសប្តាហ៍ នូវគេហទំព័របណ្ណសារដ៏ធំជាងគេបំផុតរបស់ប្រព័ន្ធពន្ធនាគារនៃរបបកម្ពុជាប្រជាធិបតេយ្យ ដែលសមាជិកគ្រួសារ អ្នកស្រាវជ្រាវ និងសាធារណជនទូទៅ អាចចូលទៅកាន់ប្រព័ន្ធផ្ទុកទិន្នន័យឌីជីថលនិងគេហទំព័រនេះបាន។
យោងតាមសេចក្តីប្រកាសព័ត៌មានរបស់អង្គការយូណេស្កូ គេហទំព័រនេះ គឺជាជោគជ័យមួយនៃគម្រោងរយៈពលេ ៣ ឆ្នាំ ក្នុងការថតចម្លង និងអភិរក្សថែរក្សាបេតិកភណ្ឌឯកសារដ៏ច្រើនសន្ធឹកសន្ទាប់នៅសារមន្ទីរទួលស្លែង។
គម្រោងនេះត្រូវបានអនុវត្តដោយអង្គការយូណេស្កូនិងក្រសួងវប្បធម៌និងវិចិត្រសិល្បៈ ក្រោមការឧបត្ថម្ភផ្នែកហិរញ្ញវត្ថុពីភ្នាក់ងារកិច្ចសហប្រតិបត្តិការអន្តរជាតិកូរ៉េ (KOICA)។
អង្គការយូណេស្កូបានបញ្ជាក់ឱ្យដឹងថា សារមន្ទីរបញ្ចប់ការថតចម្លងឯកសារជាង៦ម៉ឺនឯកសារ ដែលមានជាងកន្លះលានទំព័រ រួមមាន រូបថត ប្រវត្តិរូបរបស់អ្នកទោស សៀវភៅកំណត់ហេតុ ទស្សនាវដ្តីបដិវត្តន៍ ចម្លើយសារភាពដោយបង្ខំ និងប្រភេទឯកសារសរសេរផ្សេងៗទៀត។ ទីភ្នាក់ងារសហប្រតិបត្តិការអន្តរជាតិកូរ៉េ និងអង្គការអប់រំវិទ្យាសាស្ត្រនិងវប្បធម៌នៃអង្គការយូណេស្កូ បានឯកភាពគ្នាធ្វើការលើគម្រោង “ការអភិរក្សនិងបញ្ចូលបណ្ណសារសារមន្ទីរទួលស្លែងទៅក្នុងប្រព័ន្ធកុំព្យូទ័រ”ពីឆ្នាំ ២០១៥ ដល់ឆ្នាំ ២០២០ ក្នុងក្របខ័ណ្ឌហិរញ្ញប្បទានឥតសំណងចំនួន ១ ១៥០ ០០០ លានដុល្លារអាមេរិក។ បន្ទាប់ពីការអនុវត្តគម្រោងរយៈពេល ៥ ឆ្នាំ (២០១៥-២០២០) គម្រោងនេះទើបតែបញ្ចប់ដោយពិធីដាក់ឲ្យដំណើរការគេហទំព័រនៅថ្ងៃទី ២៩ ខែមករា ឆ្នាំ ២០២១ កន្លងមកនេះ។
រដ្ឋមន្រ្តីក្រសួងវប្បធម៌និងវិចិត្រសិល្បៈ លោកស្រី ភឿង សកុណា ថ្លែងក្នុងពិធីសម្ពោធនោះថា ការបង្កើតគេហទំព័រនេះពិតជាមានសារៈសំខាន់ណាស់ ដើម្បីពង្រឹងការថែរក្សាបណ្ណសារសារមន្ទីរទួលស្លែង និងពង្រីកនូវការផ្សព្វផ្សាយឱ្យកាន់តែទូលំទូលាយ។
លោកស្រីថ្លែងថា៖ «ការថែរក្សាបណ្ណសារសារមន្ទីរនេះ គឺតាមរយៈការអភិរក្សនិងជួសជុលនូវឯកសារចាស់ៗ ការថតចម្លងឯកសារជាទម្រង់ឌីជីថល។ ការទុកដាក់ឯកសារឱ្យបានគង់វង្សតាមស្តង់ដាសុវត្ថិភាពខ្ពស់ ការបណ្ដុះបណ្ដាលធនធានមនុស្សព្រមទាំងការបង្កើតគេហទំព័រ និងបន្ទប់បញ្ចាំងវីដេអូឯកសារ»។
បើតាមភ្នាក់ងារកិច្ចសហប្រតិបត្តិការអន្តរជាតិកូរ៉េ គោលបំណងនៃគម្រោងនេះ គឺផ្តោតលើ ទី១ ដើម្បីអភិរក្សនិងធ្វើឌីជីថលបណ្ណសារនៃសារមន្ទីរប្រល័យពូជសាសន៍ទួលស្លែង ដែលត្រូវបានចារលើការចងចាំអន្តរជាតិនៃការចុះឈ្មោះពិភពលោកក្នុងឆ្នាំ ២០០៩។ ទី២ គាំទ្រដល់សារមន្ទីរប្រល័យពូជសាសន៍ទួលស្លែងដើម្បីអភិវឌ្ឍទៅជាកន្លែងកសាងការអប់រំ និងសន្តិភាព ដែលយុវជន អ្នករស់រានមានជីវិតពីរបបខ្មែរក្រហម និងសាធារណជនទូទៅ អាចទទួលបានព័ត៌មាន អំពីប្រវត្តិសាស្រ្តរបស់ពួកគេ និងបន្តកិច្ចពិភាក្សាអំពីសន្តិភាពនិងអហិង្សា។ គោលបំណងទី៣ ដើម្បីកសាងសមត្ថភាព បុគ្គលិកនៅសារមន្ទីរប្រល័យពូជសាសន៍ទួលស្លែង និងក្រសួងវប្បធម៌ និងវិចិត្រសិល្បៈ ដើម្បីគ្រប់គ្រងបណ្ណសារ។
បណ្ណសារនេះ ត្រូវបានបញ្ចូលទៅក្នុងគេហទំព័រជា ២ ភាសា ជួយសម្រួលដល់ប្រជាជនកម្ពុជានៅជនបទ និងអ្នកស្រាវជ្រាវអន្តរជាតិ ហើយវាបានរួមចំណែកដល់ការអប់រំយុវជនអំពីសន្តិភាពនិងការចងចាំ។
ទួលស្លែងត្រូវបានគេស្គាល់ថាជាពន្ធនាគារ ស-២១ គឺជាមណ្ឌលសួរចម្លើយ និងសម្លាប់រង្គាលដ៏ល្បីល្បាញមួយនៃរបបកម្ពុជាប្រជាធិបតេយ្យ (១៩៧៥-១៩៧៩)។ អតីតអគារសាលារៀន ស-២១ ធ្លាប់ជាគុកសម្រាប់ដាក់អ្នកទោសជាង ១៨ ០០០ នាក់ និងក្រុមគ្រួសារពួកគេដែលភាគច្រើនជាសមាជិកខ្មែរក្រហមខ្លួនឯង។ អ្នកទោសត្រូវបានធ្វើទារុណកម្មនិងសម្លាប់ជាប្រព័ន្ធនៅនឹងកន្លែងឬនៅវាលពិឃាតជើងឯក។ នៅឆ្នាំ ១៩៧៩ មន្ទីរ ស-២១ ត្រូវបានចាត់ទុកជាភ័ស្តុតាងដ៏សំខាន់មួយសម្រាប់ឧក្រិដ្ឋកម្មដែលបានកើតឡើងនៅក្នុងរបបនេះ ហើយបានប្រែក្លាយជាសារមន្ទីរ៕
