The Phnom Penh Post Search

Search form




Logo of Phnom Penh Post newspaper Phnom Penh Post - បណ្តាញ​ស្រ្តី​បម្រើ​ការងារ​តាម​ផ្ទះ​ទាមទារ​ឲ្យ​ការពារ​សិទ្ធិ​អ្នក​បម្រើ​តាម​ផ្ទះ

បណ្តាញ​ស្រ្តី​បម្រើ​ការងារ​តាម​ផ្ទះ​ទាមទារ​ឲ្យ​ការពារ​សិទ្ធិ​អ្នក​បម្រើ​តាម​ផ្ទះ

ស្ត្រី​ដែល​បម្រើតា​មផ្ទះ​បាន​រៀន​អំពី​របៀប​ថែរក្សា​ទារក​​​។
ស្ត្រី​ដែល​បម្រើតា​មផ្ទះ​បាន​រៀន​អំពី​របៀប​ថែរក្សា​ទារក​​​។ ផា លីណា

បណ្តាញ​ស្រ្តី​បម្រើ​ការងារ​តាម​ផ្ទះ​ទាមទារ​ឲ្យ​ការពារ​សិទ្ធិ​អ្នក​បម្រើ​តាម​ផ្ទះ

ភ្នំពេញៈ បណ្តាញ​អ្នក​បម្រើ​តាម​ផ្ទះ​កម្ពុជា បាន​ទាមទារ​ឲ្យ​រដ្ឋាភិបាល និង​រដ្ឋ​មន្រ្តី​ក្រសួង​ការងារ ផ្តល់​សច្ចាប័ន​និង​អនុវត្ត​អនុសញ្ញា​អង្គការ​ពលកម្ម​អន្តរជាតិ​លេខ ១៨០ សម្រាប់​ពលករ​បម្រើ​ការងារ​តាម​ផ្ទះ នៅ​ថ្ងៃ​ទិវា​អ្នក​បម្រើ​តាម​ផ្ទះ​អន្តរជាតិ នៅ​ថ្ងៃ​ចន្ទ​នេះ។

លោក​ស្រី វុន សម្ផស្ប ប្រធាន​បណ្តាញ​អ្នក​បម្រើ​តាម​ផ្ទះ​កម្ពុជា បាន​ថ្លែង​កាល​ពី​ម្សិលមិញ​ថា អ្នក​បម្រើ​តាម​ផ្ទះ​ប្រហែល ១០០ នាក់ នឹង​ប្រមូល​ផ្តុំ​គ្នា​នៅ​ក្រសួង​ការងារ ដើម្បី​ដាក់​ញត្តិ​ទាមទារ​ឲ្យ​ផ្តល់​សច្ចាប័ន​លើ​អនុ​សញ្ញា​លេខ ១៨៩ ដែល​នឹង​ការពារ​សិទិ្ធ​អ្នក​បម្រើ​តាម​ផ្ទះ ដែល​ធ្វើ​ការ​ក្នុង​ប្រទេស​ដែល​បាន​ផ្តល់​សច្ចាប័ន​ប្រាក់​ឈ្នួល​អប្បបរមា រយៈ​ពេល​ឈប់​សម្រាក ១ ថ្ងៃ​និង​បញ្ឈប់​ការ​កេង​ប្រវ័ញ្ច​មក​លើ​អ្នក​បម្រើ​តាម​ផ្ទះ។

លោក​ស្រី​បាន​បញ្ជាក់​ថា៖ «ខ្ញុំ​ចង់​ស្នើ​រដ្ឋ​មន្រ្តី​ចាត់​វិធានការ​ផ្លូវ​ច្បាប់ និង​រដ្ឋបាល ដើម្បី​ការពារ​សិទិ្ធ​អ្នក​បម្រើ​តាម​ផ្ទះ ដូចជា សិក្សា​ស្រាវជ្រាវ​អំពី​ស្ថានការណ៍​របស់​អ្នក​បម្រើ​តាម​ផ្ទះ​នៅ​កម្ពុជា និង​កំណត់​ប្រាក់​ឈ្នួល​អប្បបរមា​ផ្តល់​សច្ចាប័ន​លើ​អនុសញ្ញា​លេខ ១៨៩ ដាក់​ការងារ​របស់​ពួក​គេ​ក្នុង​របប​ជាតិ​សន្តិសុខ​សង្គម និង​ចំណុច​ដទៃ​ទៀត»។

ក្រុម​នៃ​បណ្តាញ​អ្នក​បម្រើ​តាម​ផ្ទះ​កម្ពុជា បាន​រៀបចំ​កិច្ច​ប្រជុំ​ស្តីពី​សកម្មភាព​ត្រៀម​សម្រាប់​ទិវា​អ្នក​បម្រើ​តាម​ផ្ទះ​អន្តរជាតិ​ហើយ​ពួក​គេ​បាន​ចែក​ខិត្តប័ណ្ណ​រាប់​រយ​សន្លឹក និង​សេចក្តី​ប្រកាស​ដល់​ម្ចាស់​ផ្ទះ ដើម្បី​ឲ្យ​ពួកគេ​ដឹង​អំពី​សិទិ្ធ​របស់​កម្មករ។

លោក​ស្រី វុន សម្ផស្ស បាន​ថ្លែង​ថា៖ «យើង​បាន​ចែក​ជូន​អាជីវករ​នៅ​ផ្សារ និង​ម្ចាស់​ផ្ទះ​ភាគ​ច្រើន។ បណ្តាញ​របស់​យើង​ធ្វើ​ការ​ជាមួយ​នឹង​កម្មករ​ក្នុង​ប្រទេស​យើង​ប៉ុណ្ណោះ ហើយ​កម្មករ​មួយ​ចំនួន​ក៏​ធ្លាប់​បម្រើ​តាម​ផ្ទះ​នៅ ប្រទេស​ម៉ាឡេស៊ី ផង​ដែរ»។

លោក​ស្រី​បាន​បន្ថែម​ថា បណ្តាញ​មាន​សមាជិក ៣៦៨ នាក់​ហើយ​អ្នក​បម្រើ​តាម​ផ្ទះ​នៅ​ក្នុង​ប្រទេស​មាន​ចំនួន​ប្រហែល ២៤០ ០០០ នាក់។

លោក​ស្រី​បាន​បញ្ជាក់​ថា៖ «ពួក​គេ​ភាគ​ច្រើន​មក​ពី​គ្រួសារ​ក្រីក្រ​និង​មាន​ការ​អប់រំ​ទាប»។

លោក​ស្រី​បាន​បន្ថែម​ថា ពួក​គេ​អាច​រក​ប្រាក់​ចំណូល​បាន​តិច​ជាង ៥០ ដុល្លារ​ទៅ ១៥០ ដុល្លារ​ក្នុង​មួយ​ខែ។ លោក​ស្រី​ឲ្យ​ដឹង​ទៀត​ថា៖ «ចំពោះ​កម្មករ​ដែល​បម្រើ​តាម​ផ្ទះ​ជន​បរទេស​ទទួល​បាន​ប្រាក់​ឈ្នួល​ខ្ពស់​ជាង​នេះ»។

អ្នក​បម្រើ​តាម​ផ្ទះ​ម្នាក់​អាយុ ២២ ឆ្នាំ​ដែល​បដិសេធ​មិន​បញ្ចេញ​ឈ្មោះ បាន​ថ្លែង​កាល​ពី​ម្សិលមិញ​ថា កញ្ញា​បាន​ធ្វើ​ការ​ជាង ១០ ម៉ោង​ក្នុង​មួយ​ថ្ងៃ ដោយ​ទទួល​បាន​ប្រាក់​ឈ្នួល​ជាង ៥០ ដុល្លារ​ក្នុង​មួយ​ខែ។

កញ្ញា​បាន​ថ្លែង​ឲ្យ​ដឹង​បន្ថែម​ទៀត​ថា៖ «វា​ពិត​ជា​ល្អ ប្រសិន​បើ​អ្នក​បម្រើ​តាម​ផ្ទះ​អាច​រក​បាន​ប្រាក់​ឈ្នួល​កាន់​តែ​ខ្ពស់ ព្រោះ​វា​សម​នឹង​ការងារ​ដែល​ខ្ញុំ​ធ្វើ​រៀងរាល់​ថ្ងៃ។ ខ្ញុំ​ត្រូវ​ក្រោក​នៅ​ម៉ោង ៤ កន្លះ ឬ ៥ ដើម្បី​ធ្វើ​ការងារ​ដូច​ជា​បោស​សម្អាត​ផ្ទះ បោក​សម្លៀក​បំពាក់ ចម្អិន​អាហារ និង​មើល​កូន​របស់​ម្ចាស់​ផ្ទះ»៕

អត្ថបទគួរចាប់អារម្មណ៍