ភ្នំពេញៈ បណ្តាប្រទេសតាមបណ្តោយដងទន្លេមេគង្គបានបង្កើនកិច្ចសហប្រតិបត្តិការក្នុងការបង្ការ ទប់ស្កាត់ និងបង្ក្រាបការជួញដូរគ្រឿងញៀនចេញពីតំបន់ត្រីកោណមាស និងការនាំចូលសារធាតុគីមីផ្សំដើម្បីផលិតគ្រឿងញៀន ខណៈដែលការបង្ក្រាបគ្រឿងញៀនដែលមានទម្ងន់លើសពី ១ គីឡូក្រាមបាននិងកំពុងកើនឡើង។
នាយឧត្តមសេនីយ៍ មាស វីរិទ្ធ អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀនបានថ្លែងប្រាប់ភ្នំពេញ ប៉ុស្តិ៍កាលពីថ្ងៃអាទិត្យថា យោងតាមលទ្ធផលនៃកិច្ចប្រជុំបូកសរុបការអនុវត្តគម្រោងសុវត្ថិភាពទន្លេមេគង្គដែលកម្ពុជាធ្វើជាម្ចាស់ផ្ទះកាលពីថ្ងៃទី ២៩ ខែវិច្ឆិកា ប្រទេសទាំងអស់ក្នុងតំបន់ទន្លេមេគង្គមានចិន មីយ៉ាន់ម៉ា ឡាវ ថៃ កម្ពុជា និងវៀតណាមបានវាយតម្លៃនូវស្ថានភាពគ្រឿងញៀននាពេលបច្ចុប្បន្នដែលបាននិងកំពុងតែកើនឡើងនិង គំរាមកំហែងធ្ងន់ធ្ងរដល់ប្រទេសនៅតាមតំបន់ទន្លេមេគង្គ។
លោកបន្តថា ប្រទេសទាំង ៦ ក្នុងតំបន់ទន្លេមេគង្គក្នុងរយៈពេល ៣ ខែដើមឆ្នាំ ២០១៩ បង្ក្រាបបានបទល្មើសគ្រឿងញៀនដែលមានទម្ងន់លើសពី ១ គីឡូក្រាម រហូតដល់ជាង ៣ ១៩៨ ករណី ដែលក្នុងនោះឃាត់ខ្លួនជនសង្ស័យរហូតដល់ទៅ ៣ ៤៤០ នាក់ គឺមានការកើនឡើង បើប្រៀបធៀបរយៈពេល ៣ ខែដូចគ្នាកាលពីឆ្នាំ ២០១៨។
លោកថា៖ «ក្រុមឧក្រិដ្ឋជននៅតែមានមហិច្ឆតាក្នុងការផលិតគ្រឿងញៀនពីការផលិតវាអស់តម្លៃថោកដល់លក់ចេញបានចំណេញច្រើន។ បើនិយាយទៅគេចំណាយតែ ៣០០ ដុល្លារក្នុងការផលិតគ្រឿងញៀន ១ គីឡូក្រាម។ បើគេលក់នៅប្រទេស ជប៉ុន ឬអូស្ត្រាលី គេអាចលក់បានដល់ទៅ ៧០ ឬ ៨០ ម៉ឺនដុល្លារ ហើយបើនៅកម្ពុជាបានតម្លៃពី ៣ ទៅ ៥ ម៉ឺនដុល្លារដែលជាហេតុធ្វើឲ្យពួកឧក្រិដ្ឋជនហ៊ានប្រថុយ»។
លោក វីរិទ្ធ ឲ្យដឹងទៀតថា ប្រទេសដែលមានចំនួនករណីបង្ក្រាបគ្រឿងញៀនលើសពី ១ គីឡូក្រាមច្រើនជាងគេ គឺប្រទេស ចិន ភូមា និងប្រទេស ថៃ ដោយសារតែប្រទេសទាំងនេះមានប្រជាជនច្រើន ខណៈដែលប្រទេស កម្ពុជាមានចំនួនតែ ១៩ ករណី ដោយសារតែក្រុមឧក្រិដ្ឋជនមិនទាន់ចាក់ឫសជ្រៅ និងទីផ្សារតូច និងដោយសារតែប្រទេសកម្ពុជាបាននិងកំពុងខិតខំលុបបំបាត់ឧក្រិដ្ឋជនគ្រឿងញៀន និងទប់ស្កាត់ការប្រើប្រាស់គ្រឿងញៀន។
លោកបន្តថា មានការចាប់ និងដកហូតគ្រឿងញៀនគ្រប់ប្រភេទមានការកើនឡើងក្នុងបណ្តាប្រទេសតាមដងទន្លេមេគង្គ ខណៈពេលពួកក្រុមឧក្រិដ្ឋជនគ្រឿងញៀនចេះតែពង្រីកឥទ្ធិពលក្នុងការផលិត និងចែកចាយថែមទាំងបំពាក់អាវុធថែមទៀតផង។
លោកបញ្ជាក់ថា៖ «យើងខិតខំធ្វើយ៉ាងណារួមសហការគ្នាពាក់ព័ន្ធនឹងការចែករំលែកព័ត៌មានដើម្បីឲ្យទាន់សភាពការណ៍ ហើយខិតខំទប់ស្កាត់ការហូរចេញគ្រឿងញៀនពីតំបន់ផលិតដែលហៅថាតំបន់ត្រីកោណមាស និងទីផ្សារនៃការប្រើប្រាស់ការជួញដូរ។ យើងខិតខំទប់ស្កាត់ការនាំចូលសាធាតុគីមីផ្សំសម្រាប់ផលិតគ្រឿងញៀនពីប្រទេសចិន និងឥណ្ឌា»។
លោកបន្ថែមថា ប្រទេសទាំង ៦ តាមបណ្តោយទន្លេមេគង្គប្តេជ្ញារួមគ្នាបង្ការទប់ស្កាត់បង្ក្រាបការនាំចេញគ្រឿងញៀនពីតំបន់ត្រីកោណមាស និងការនាំចូលសារធាតុគីមីផ្សំទៅកាន់តំបន់ត្រីកោណមាសឲ្យមានប្រសិទ្ធភាពដើម្បីចូលរួមចំណែកកាត់បន្ថយនូវហានិភ័យរក្សាសុខុមាលភាព សន្តិសុខសណ្តាប់ធ្នាប់ប្រជាពលរដ្ឋក្នុងតំបន់។ ការពង្រីកវិធានការនេះ ដោយសារតែការផលិត ការចរាចរគ្រឿងញៀនសំយោគ កាន់តែគំរាមកំហែងដល់សុខុមាលភាព សុវត្ថិភាព សន្តិសុខ សណ្តាប់ធ្នាប់របស់ប្រជាពលរដ្ឋទូទាំងក្នុងតំបន់ដោយត្រូវតែពង្រឹង ពង្រីកបន្ថែមទៀតលើកិច្ចសហការរួមគ្នាទប់ស្កាត់និងបង្ក្រាប។
លោក មាស សុវណ្ណ ប្រធានសមាគមសង្គ្រោះជនរងគ្រោះដោយសារគ្រឿងញៀនកម្ពុជាបានថ្លែងថា ការជួញដូរគ្រឿងញៀននៅក្នុងប្រទេសកម្ពុជា មានទ្រង់ទ្រាយតូចៗដែលពិបាកក្នុងការបង្ក្រាប ហើយការប្រើប្រាស់គ្រឿងញៀនហាក់មិនមានការថមថយទេ ដែលបានធ្វើឲ្យប៉ះពាល់ដល់សង្គមបើទោះបីជាមានការប្តេជ្ញាចិត្តខ្លាំងពីរដ្ឋាភិបាលក៏ដោយ។
លោកបន្តថា៖ «គ្រឿងញៀនឥឡូវបានរីករាលដាលដល់ជនបទ ឲ្យតែកន្លែងណាដែលមានមនុស្សរស់នៅគឺវាក៏ទៅដល់កន្លែងនោះដែរដែលរដ្ឋាភិបាលបានកំពុងយកចិត្តទុកដាក់ក្នុងការទប់ស្កាត់ ការជួញដូរគ្រឿងញៀន និងការប្រើប្រាស់គ្រឿងញៀន»។
លោកបន្តថា សមត្ថកិច្ចត្រូវរកប្រភពកន្លែងកែច្នៃផលិតគ្រឿងញៀន និងកន្លែងស្តុកគ្រឿងញៀនធំៗព្រមទាំងត្រូវស្វែងរកមេខ្លោងដែលធ្វើការចែកចាយគ្រឿងញៀនឲ្យមានប្រសិទ្ធភាព ហើយត្រូវផ្តន្ទាទោសធ្ងន់ធ្ងរចំពោះមន្ត្រីណាដែលធ្វើការអន្ដរាគមន៍ចំពោះឧក្រិដ្ឋជនគ្រឿងញៀនហើយតុលាការ មិនត្រូវបន្ធូរបន្ថយអ្នកជាប់ទោស ដោយសារគ្រឿងញៀននោះទេ។
កាលពីថ្ងៃទី ២៤ ខែ វិច្ឆិកា ឆ្នាំ ២០១៩ លោក ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃបានថ្លែងនៅក្នុងទិវាអន្ដរជាតិ រំឭកជនរងគ្រោះថ្នាក់ចរាចរណ៍លើកទី ១៤ ថា៖ «មកដល់ពេលនេះ យុទ្ធនាការប្រយុទ្ធប្រឆាំងគ្រឿងញៀនហាក់បីដូចជាអាចនិយាយបានថា យើងទទួលជោគជ័យមួយផ្នែកធំ។ នេះជាការសន្និដ្ឋានវាយតម្លៃជាបឋមដោយសារអី? ដោយសារយើងបានបង្ក្រាបនៅរង្គសាលបែងចែកគ្រឿងញៀនធំៗទាំងអស់ក្នុងរាជធានីភ្នំពេញ។ យើងបានរឹបអូសចាប់គ្រឿងញៀនសរុប ១ តោន មិនធម្មតាទេ។ តាមច្រកផ្លូវគោកពីប្រទេសឡាវមកផង ហើយច្រកផ្ញើតាមប្រៃសណីយ៍ និងតាមច្រកព្រលានយន្ដហោះផង សរុបតួលេខយើងចាប់បាន ១ តោន»។
លោកបន្តថា គ្រឿងញៀន ១ តោននេះ មិនមែនប្រើប្រាស់សម្រាប់តែកម្ពុជាទេតែសម្រាប់ចែកចាយទៅប្រទេសជិតខាងដូចជាវៀតណាម ថៃ ជាដើម។ លោកថា បើសិនសមត្ថកិច្ច និងភាគីពាក់ព័ន្ធមួយចំនួនទៀតមិនបានដោះស្រាយទាន់ពេលវេលាទេ ចរាចរណ៍គ្រឿងញៀននឹងរីករាលដាលដល់ជនបទបន្ថែមទៀត។
បើយោងតាមគេហទំព័រអគ្គស្នងការនគរបាលជាតិបានឲ្យដឹងថា ការបង្ក្រាបគ្រឿងញៀនទូទាំងប្រទេសនៅថ្ងៃទី ៣០ ខែវិច្ឆិកា បានចំនួន ២៣ ករណី ឃាត់ខ្លួនជនសង្ស័យចំនួន ៥៦ នាក់ (ស្រី ៩ នាក់)។ ក្នុងចំណោមជនសង្ស័យឃាត់ខ្លួនទាំង ៥៦ នាក់ មានមុខសញ្ញាជួញដូរគ្រឿងញៀនចំនួន ៤៤ នាក់ និងប្រើប្រាស់ ១២ នាក់៕
វីដេអូ៖