សៀមរាបៈ ក្រុមគ្រូពេទ្យមកពីប្រទេស ជប៉ុន សហការជាមួយអាជ្ញាធរជាតិអប្សរាបានបើកវគ្គបណ្ដុះបណ្ដាលរយៈពេល ១ ថ្ងៃស្ដីពីការជួយសង្គ្រោះបឋមដល់ភ្នាក់ងារទេសចរណ៍ ៣០ នាក់ និងសណ្ដាប់ធ្នាប់ ១០ នាក់។ វគ្គបណ្ដុះបណ្ដាលនេះគឺផ្ដោតលើមេរៀនសំខាន់ៗដូចជា ការធ្វើចលនាបេះដូង របៀបរុំរបួស និងការលើកជនរងគ្រោះដាក់លើគ្រែស្នែងជាដើម។
ទំព័រហ្វេសប៊ុករបស់អាជ្ញាធរជាតិអប្សរាបានផ្សាយនាចុងខែមុនថា វគ្គសង្គ្រោះបឋមដល់ភ្នាក់ងារទេសចរណ៍ប្រចាំប្រាសាទ គោលដៅដែលបណ្ដុះបណ្ដាលដោយក្រុមគ្រូពេទ្យស្ម័គ្រចិត្តមកពីប្រទេសជប៉ុននេះត្រូវបានធ្វើឡើងនៅថ្ងៃទី ២៤ ខែកុម្ភៈ។
លោក សុខ សង្វារ អគ្គនាយករងអាជ្ញាធរជាតិអប្សរាបានលើកឡើងថា ការរៀបចំវគ្គសង្គ្រោះបឋមនេះបានធ្វើឡើងចំនួន ៤ លើករួចមកហើយដែលអ្នកចូលរួមសរុប ១៦០ នាក់។ សម្រាប់វគ្គនេះគឺជាលើកទី ៥ ដែលមានអ្នកចូលរួម ៤០ នាក់ក្នុងនោះភ្នាក់ងារ ទេសចរណ៍ ៣០ នាក់ និងសណ្តាប់ធ្នាប់ ១០ នាក់។ លោកបានបន្តថា វគ្គបណ្ដុះបណ្ដាលនេះត្រូវធ្វើឡើង ២ ដងក្នុង ១ ឆ្នាំនៅរៀងរាល់ខែកុម្ភៈ និងខែកក្កដា។
លោកបានថ្លែងថា៖ «ការផ្តល់ចំណេះដឹងផ្នែកសង្គ្រោះបឋមដល់ភ្នាក់ងារទេសចរណ៍តាមប្រាសាទជាភារកិច្ចចាំបាច់បំផុតសម្រាប់អាជ្ញាធរជាតិអប្សរា ដើម្បីឱ្យភ្នាក់ងារទេសចរណ៍អាចមើលថែ និងជួយសង្គ្រោះភ្ញៀវទេសចរបានទាន់ពេលវេលា ករណីភ្ញៀវជួបគ្រោះថ្នាក់ជាយថាហេតុ។ កាយវិការ និងការគិតគូរពីសុខទុក្ខ សុវត្ថិភាពចំពោះភ្ញៀវដូច្នេះកន្លងមកទទួលបានការគាំទ្រការថ្លែងអំណរគុណ និងការកោតសរសើរយ៉ាងខ្លាំងចំពោះស្ថាប័នមួយនេះ»។
តួលេខរបស់គ្រឹះស្ថានអង្គរបានបង្ហាញថា ក្នុងឆ្នាំ ២០១៩ រមណីយដ្ឋានអង្គរ ទទួលបានភ្ញៀវទេសចរបរទេសជាង ២ លាន (២ ២០២ ៦៩៧) នាក់ដោយទទួលបានចំណូលជិត ១០ លាន (៩៩ ០៨៨ ៨៩៤) ដុល្លារសហរដ្ឋអាមេរិក។ ប៉ុន្តែចំនួនភ្ញៀវទេសចរបានចុះ ១៤,៨៦% បើប្រៀបធៀបឆ្នាំ ២០១៨។
កាលពីចុងខែមុនលោក ឡុង កុសល អ្នកនាំពាក្យអាជ្ញាធរជាតិអប្សរាបានថ្លែងថា រាល់ប្រាសាទគឺមានភ្នាក់ងារប្រចាំការដើម្បីជួយសង្គ្រោះបឋមទៅដល់ភ្ញៀវទេសចរ។ ប៉ុន្តែមិនមានតួលេខអំពីចំនួនភ្នាក់ងារទេសចរណ៍ ឬចំនួនភ្ញៀវទេសចរប៉ុន្មាននាក់ដែលធ្លាប់បានជួយសង្គ្រោះបឋមនាពេលកន្លងមកនោះទេ។
លោកបញ្ជាក់ថា៖ «យើង [មាន] ភ្នាក់ងារទេសចរណ៍ច្រើននៅគ្រប់ប្រាសាទ ហើយពួកគេគ្រប់គ្នា គឺសុទ្ធទទួលបានការបណ្ដុះបណ្ដាលស្ដីពីការសង្គ្រោះបឋមហ្នឹង»។
កាលពីពេលថ្មីៗនេះលោកនាយករដ្ឋមន្ត្រី ហ៊ុន សែន បានណែនាំឱ្យក្រសួងទេសចរណ៍ និងក្រសួងស្ថាប័នពាក់ព័ន្ធធ្វើយុទ្ធនាការដើម្បីរៀបចំសកម្មភាព និងព្រឹត្តិការណ៍នានា ដូចជា អង្គរសង្ក្រាន្ត ពិធីបុណ្យប្រពៃណី សាសនា កម្មវិធីកីឡា ការប្រគំតន្ត្រី ការបញ្ចាំងភាពយន្ត និងការបង្ហាញម៉ូដសម្លៀកបំពាក់ជាដើម ដើម្បីទាក់ទាញភ្ញៀវទេសចរ។
លោក ហ៊ុន សែន ក៏បានណែនាំឱ្យរក្សាតម្លៃសំបុត្រចូលទស្សនាអង្គរ និងថែមទាំងអនុញ្ញាតឱ្យអ្នកទិញសំបុត្រចូលទស្សនាសម្រាប់ ១ ថ្ងៃគឺអាចចូលទស្សនាបាន ២ ថ្ងៃ។ សំបុត្រសម្រាប់ ៣ ថ្ងៃអាចចូលទស្សនា ៥ ថ្ងៃ និងសំបុត្រសម្រាប់ ៧ ថ្ងៃគឺអាចចូលទស្សនា ១០ ថ្ងៃ ដើម្បីទាក់ទាញទេសចរឱ្យស្នាក់នៅបន្ថែមនៅកម្ពុជា។
ការណែនាំរបស់នាយករដ្ឋមន្ត្រីបែបនេះបានធ្វើឡើងស្របពេលចំនួនភ្ញៀវទេសចរកំពុងថយចុះយ៉ាងខ្លាំង ដោយសារប្រទេស ចិន និងប្រទេសមួយចំនួនទៀតក្នុងពិភពលោកកំពុងរាតត្បាតកាន់តែខ្លាំងឡើងដោយវីរុសកូរ៉ូណាថ្មី ឬ Covid-19៕