.jpg)
មន្ត្រីជលផលបណ្តុះបណ្តាលប្រជាសហគមន៍នេសាទនៅខេត្តស្ទឹងត្រែងថ្ងៃទី ១៦ មិថុនា។ រូបថត សហការី
ស្ទឹងត្រែងៈ រដ្ឋបាលជលផលខេត្ដស្ទឹងត្រែងបានបើកវគ្គបណ្តុះបណ្តាលរយៈពេល ២ ថ្ងៃពីថ្ងៃទី ១៥-១៦ ខែមិថុនា ពង្រឹងសមត្ថភាពដល់សហគមន៍នេសាទចំនួន ៥២ នៅទូទាំងខេត្តនេះដើម្បីបង្កើនមធ្យោបាយការពារ និងអភិរក្ស ធនធានជលផល និងពូជត្រីនៅតាមដែននេសាទក្នុងសហគមន៍នីមួយៗ។ នេះបើតាមលោក ទុំ នីរ៉ូ នាយខណ្ឌរដ្ឋបាលជលផល ខេត្តស្ទឹងត្រែងប្រាប់ពីម្សិលមិញ។
ក្រោយបញ្ចប់ការបណ្ដុះបណ្ដាលដល់សហគមន៍នេសាទទាំង ៥២ ក្នុងខេត្ដស្ទឹងត្រែងពីម្សិលមិញ លោក ទុំ នីរ៉ូ ថ្លែងថា បើគិតចាប់ពីឆ្នាំ ២០១៧-២០១៨ ករណីបទល្មើសនេសាទមានការកើតឡើងច្រើនករណី។ ក្រោយមានការបណ្ដុះបណ្ដាលអំពីមធ្យោបាយការពារ និងអភិរក្សធនធានជលផល និងពូជត្រីដល់សហគមន៍ជាបន្ដបន្ទាប់ រហូតដល់ឆ្នាំ ២០១៩ និងពាក់កណ្ដាលឆ្នាំ ២០២០ បទល្មើសនេសាទក្នុងសហគមន៍ ដូចជា ឆក់ត្រី និងការដាក់សំណាញ់ មង អួន ល្មើសច្បាប់គឺនៅមានតិចតួចប៉ុណ្ណោះ។
លោកថ្លែងថា៖ «ការបណ្តុះបណ្តាលរយៈពេល ២ ថ្ងៃ ១៥-១៦ ខែមិថុនានេះ យើងពង្រឹងសមត្ថភាពដល់សហគមន៍នេសាទទាំង ៥២ នៅទូទាំងខេត្តស្ទឹងត្រែង និងសហគមន៍ចំនួន ៤ ទៀតដែលកំពុងរៀបចំបង្កើតឡើង ដើម្បីឱ្យពួកគាត់មានសមត្ថភាពមានចំណេះដឹងកាន់តែច្រើនឡើងក្នុងការឆ្លើយតបទៅនឹងការថែរក្សា ការការពារធនធានជលផលក្នុងដែននេសាទក្នុងសហគមន៍នីមួយៗ»។
នាយខណ្ឌរដ្ឋបាលជលផលរូបនេះឲ្យដឹងថា ទោះបីជាមានការអប់រំផ្សព្វផ្សាយពីរដ្ឋបាលជលផលទៅដល់សហគមន៍ជាបន្តបន្ទាប់ក្តី ប៉ុន្ដែបទល្មើសនេសាទលក្ខណៈគ្រួសារមិនអាចទប់ស្កាត់បាន ១០០ ភាគរយនោះទេ។ លោកថា៖ «កាលពី ៣ ឆ្នាំមុនក្នុង ១ ឆ្នាំយើងឃាត់បានករណីបទល្មើសនេសាទពី ២០០ ទៅ ៣០០ ករណី។ ក៏ប៉ុន្ដែក្នុងឆ្នាំ ២០១៩-២០២០ នេះ បទល្មើសនៅក្នុងរង្វង់ប្រហាក់ប្រហែល ២០ ភាគរយប៉ុណ្ណោះ»។
លោកបញ្ជាក់ថា៖ «ការថយចុះនូវបទល្មើសបែបនេះ ព្រោះតែការអនុវត្ដច្បាប់បានតឹងរ៉ឹងចំពោះជនល្មើស។ នៅពេលបង្ក្រាបបានគឺយើងបញ្ជូនទៅតុលាការជានិច្ច»។ លោក នីរ៉ូ បន្ថែមថាគោលដៅធំរបស់រដ្ឋបាលជលផលគឺធ្វើយ៉ាងណាឱ្យប្រជាពលរដ្ឋយល់ដឹងពីផលប៉ះពាល់នៃបទល្មើសជលផល និងការនេសាទខុសច្បាប់។ ធ្វើឱ្យពលរដ្ឋស្ម័គ្រចិត្ដបញ្ឈប់ប្រព្រឹត្ដបទល្មើសដោយខ្លួនឯង នោះទើបការអនុវត្តទប់ស្កាត់បទល្មើសនេសាទទទួលបានជោគជ័យ។
លោកឱ្យដឹងថា ក្នុងទឹកដីខេត្តស្ទឹងត្រែងមានទន្លេចំនួន ៤ បានហូរកាត់ ដែលមានប្រវែងជិត ៥០០ គីឡូម៉ែត្រ ដែលភូមិសាស្ដ្រនេះធ្វើឱ្យមានការលំបាកក្នុងការបង្ក្រាប និងទប់ស្កាត់បទល្មើសនេសាទនានា។ កត្តានេះហើយដែលរដ្ឋបាលជលផលចង់ឱ្យមានការចូលរួមដោយផ្ទាល់ពីប្រជាសហគមន៍ក្នុងការទប់ស្កាត់បទល្មើសនេសាទនេះ។
ប្រធានសហគមន៍នេសាទ កោះព្រះ លោក ថេង ឌឿន ដែលបានចូលរួមវគ្គបណ្ដុះបណ្ដាលរយៈពេល ២ ថ្ងៃនេះឱ្យដឹងថាបទល្មើសនេសាទក្នុងសហគមន៍កោះព្រះមានការថយចុះច្រើន គឺនៅមានតែបទល្មើសនេសាទតូចៗលក្ខណៈគ្រួសារប៉ុណ្ណោះ ដូចជា ការដាក់មងជាដើម។
លោកថ្លែងថា៖ «សហគមន៍យើងបានបន្តធ្វើការចុះផ្សព្វផ្សាយដល់ប្រជាពលរដ្ឋនៅក្នុងសហគមន៍ដើម្បីឱ្យពួកគាត់យល់ដឹងពីច្បាប់ជលផល និងផលប៉ះពាល់នៃបទល្មើសនេសាទខុសច្បាប់។ សហគមន៍យើងតែងតែផ្ដល់ឱកាសច្រើនដល់ប្រជាពលរដ្ឋនៅក្នុងសហគមន៍ដែលបានប្រព្រឹត្តល្មើសក្នុងដែននេសាទ»។
លោកបញ្ជាក់ថា៖ «គឺយើងតែងតែធ្វើការណែនាំដល់ពួកគាត់ដើម្បីឱ្យពួកគាត់យល់ និងស្ម័គ្រចិត្ដបញ្ឈប់។ ប៉ុន្ដែពេលខ្លះភាពខ្វះខាតបានធ្វើឲ្យពួកគាត់នៅតែបន្តប្រព្រឹត្ដបទល្មើសនេសាទបន្ថែមទៀត»។
លោក ថេង ឌឿន និយាយថាតាមរយៈកិច្ចប្រជុំតំណាងសហគមន៍បានជួបប្រជុំគ្នា ពិភាក្សាគ្នាក្នុងការបន្តស្វែងរកវិធីសាស្ដ្រ ការពារ ថែរក្សាធនធានជលផលនៅក្នុងសហគមន៍។ ក្នុងនោះគណៈកម្មការសហគមន៍នេសាទកំពុងរៀបចំបង្កើតគម្រោង ចិញ្ចឹមសត្វ ដូចជា មាន់ ត្រី ជ្រូក នៅក្នុងសហគមន៍ដើម្បីឱ្យពលរដ្ឋមានមុខរបរបញ្ឈប់ការនេសាទខុសច្បាប់បន្ដទៀត៕
