មន្ត្រីនគរបាលការិយាល័យបង្ការ និងពន្លត់អគ្គិភ័យនៃស្នងការដ្ឋាននគរបាលខេត្តព្រះសីហនុម្នាក់ ត្រូវបានក្រសួងសម្រេចដាក់ពិន័យដោយបណ្តេញចេញពីក្របខ័ណ្ឌមន្ត្រីនគរបាលជាតិ បន្ទាប់ពីមន្ត្រីនគរបាលរូបនោះ បានប្រព្រឹត្តបទល្មើសពាក់ព័ន្ធករណីជួញដូរគ្រឿងញៀន។
យោងប្រកាសចុះថ្ងៃទី ១៩ ខែ មិថុនា ឆ្នាំ ២០២០ ដែលភ្នំពេញប៉ុស្តិ៍ទទួលបានពីម្សិលមិញ លោកស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានសម្រេចអនុវត្តវិន័យចំពោះ លោក ស វាសនា ជាមន្ត្រីនគរបាលការិយាល័យបង្ការនិងពន្លត់អគ្គិភ័យនៃស្នងការដ្ឋាននគរបាលខេត្តព្រះសីហនុ មានឋានៈជាអនុសេនីយ៍ទោ ក្រោមរូបភាព «ដកហូតឋានន្តរស័ក្តិ និង បណ្តេញចេញពីក្របខ័ណ្ឌមន្ត្រីនគរបាលជាតិ។ ចំណែកប្រាក់បៀវត្សរ៍ និងរបបឧបត្ថម្ភផ្សេងៗមួយចំនួនទៀត ក៏ត្រូវបានកាត់ផ្ដាច់ និងលុបចេញពីក្របខ័ណ្ឌផងដែរ»។
ក្នុងប្រកាសនោះ លោកស ខេង បានគូសបញ្ជាក់ពីមូលហេតុ ដែលឈានទៅដល់ការចេញសេចក្ដីសម្រេចប្រកាសបណ្ដេញលោក ស វាសនា ចេញពីក្របខ័ណ្ឌមន្ត្រីនគរបាលជាតិ ដោយសារមន្ត្រីរូបនោះមានជាប់ពាក់ព័ន្ធ ករណី «ជួញដូរដោយខុសច្បាប់នូវសារធាតុញៀន»។
ជុំវិញករណីនេះ លោក ជួន ណារិន្ទ ស្នងការនគរបាលខេត្តព្រះសីហនុ ប្រាប់ភ្នំពេញប៉ុស្តិ៍ នៅថ្ងៃអង្គារថា ក្រោយពីទទួលបានប្រកាសរបស់ក្រសួង នៅថ្ងៃទី ២២ ខែមិថុនា លោកបានអនុវត្តសេចក្ដីសម្រេចនៃប្រកាសនោះ ដោយបានដកហូតឋានន្តរស័ក្កិ និងបណ្ដេញមន្ត្រីនគរបាលរូបនោះ ចេញពីក្របខ័ណ្ឌជាមន្ត្រីនគរបាលការិយាល័យបង្ការនិងពន្លត់អគ្គិភ័យខេត្តព្រះសីហនុ។
លោកបញ្ជាក់ថា៖ «ជាទូទៅមន្ត្រីក្នុងមុខងារសាធារណៈ ទាំងស៊ីវិល និងកងកម្លាំង គឺរមែងទទួលបានការលើកទឹកចិត្តនិងផ្ដល់មុខតំណែង ឬឋានន្តរស័ក្កិ ពីថ្នាក់ដឹកនាំអង្គភាពឬក្រសួង សា្ថប័ន ក្នុងករណីពិនិត្យឃើញថាមន្ត្រីនោះ បានបំពេញការងារបានល្អត្រឹមត្រូវ តាមតួនាទីនិងភារកិច្ច ក្នុងការបម្រើជាតិនិងប្រជាជន»។
លោកបន្ថែមថា៖ «ប៉ុន្តែបើអសកម្មការងារ ឬប្រព្រឹត្តបទល្មើស ដែលនាំឲ្យប៉ះពាល់ដល់កិត្តិយស និងសេចក្ដីថ្លៃថ្នូររបស់អង្គភាព ឬក្រសួងស្ថាប័ន មន្ត្រីនោះនឹងត្រូវរងការដាក់ពិន័យ ដោយដកហូតមុខតំណែងជាបណ្ដោះអាសន្ន ឬ បង្ខំឲ្យបង្ហាញមុខនៅកន្លែងធ្វើការរៀងរាល់ម៉ោងធ្វើការ ហើយបើ[កំហុសឆ្គង] ធ្ងន់ធ្ងរ នឹងត្រូវបណ្ដេញចេញពីក្របខ័ណ្ឌមន្ត្រីរាជការ ឬ មន្ត្រីកងកម្លាំងរបស់ជាតិ»។
បើតាមលោក ជួន ណារិន្ទ អតីតមន្ត្រីនគរបាលឈ្មោះ ស វាសនា ធ្លាប់ត្រូវបានប្រធានអង្គភាពអប់រំណែនាំ និងដាក់ពិន័យជាច្រើនលើកមកហើយពាក់ព័ន្ធភាពអសកម្មក្នុងការងារ។ កាលពីកន្លងទៅថ្មីៗនេះ អតីតមន្ត្រីរូបនេះ បានប្រព្រឹត្តបទល្មើសជួញដូរសារធាតុញៀន ដែលធ្វើឲ្យប៉ះពាល់ដល់កិត្តិយស និងសេចក្ដីថ្លៃថ្នូររបស់មន្ត្រីកងកម្លាំងនគរបាលជាតិ។
លោក ណារិន្ទ ប្រាប់ទៀតថា ករណីគ្រឿងញៀននៅតែជាបញ្ហាប្រឈមដ៏ធំមួយ ដែលទាមទារឲ្យមានការចូលរួម ដោះស្រាយពីគ្រប់ភាគីពាក់ព័ន្ធទាំងអស់ ជាពិសេសយុវជន។
លោកបានបន្តថា នៅក្នុងឆមាសទី១ ឆ្នាំ ២០២០ នេះ សមត្ថកិច្ចនគរបាលបង្ក្រាបបទល្មើសជួញដូរគ្រឿងញៀនទូទាំងខេត្តព្រះសីហនុ បានបង្ក្រាបបទល្មើសជួញដូរគ្រឿងញៀនបាន ១៦៦ ករណី ឃាត់ខ្លួនមនុស្ស ៣៣៧ នាក់ ក្នុងនោះមានជនបរទេសចំនួន ១៥០ នាក់។
យោងតាមរបាយការណ៍របស់មន្ទីរប្រឆាំងគ្រឿងញៀននៃក្រសួងមហាផ្ទៃ ដែលបានចេញផ្សាយកាលពីថ្ងៃ ២៥ ខែ ឧសភា ឆ្នាំ ២០២០ បង្ហាញថា ការបង្ក្រាបបទល្មើសគ្រឿងញៀនក្នុងក្របខ័ណ្ឌទូទាំងប្រទេស សម្រាប់ឆមាសទី១ ឆ្នាំ ២០២០ សមត្ថកិច្ចបង្ក្រាបបានចំនួន ១ ៩៥៩ លើ ១ ៥២៨ ករណី កើនឡើង ៤៣១ ករណី ស្មើនឹង ២៨.២០% ឃាត់ខ្លួនមនុស្ស ៣ ៨៩៥ នាក់ (ស្ត្រី ២៦៥ នាក់) ក្នុងនោះជនជាតិខ្មែរ ៣ ៨៣៧ នាក់ វៀតណាម ៥០ នាក់ ចិន ៣ នាក់ ថៃ ១ នាក់ ឡាវ ២ នាក់ នីហ្សេរីយ៉ា ១ នាក់ ជប៉ុន ១ នាក់ និងដកហូតសាធាតុញៀនសរុបទម្ងន់ជាង ១៧៤ គីឡូក្រាម៕