The Phnom Penh Post Search

Search form

Logo of Phnom Penh Post newspaper Phnom Penh Post - បណ្តេញ​កម្មករ​រោងចក្រ SL ៧០០​នាក់​ពី​ការងារ​បន្ទាប់​ពី​តវ៉ា




បណ្តេញ​កម្មករ​រោងចក្រ SL ៧០០​នាក់​ពី​ការងារ​បន្ទាប់​ពី​តវ៉ា

បណ្តេញ​កម្មករ​រោងចក្រ SL ៧០០​នាក់​ពី​ការងារ​បន្ទាប់​ពី​តវ៉ា

130905_05
កម្មកររោងចក្រ SL ធ្វើការតវ៉ា កម្មករ ៧០០នាក់ត្រូវបានបណ្ដេញចេញបន្ទាប់ពីធ្វើការតវ៉ា ផា លីណា

ភ្នំពេញៈ មាន​ការ​អះអាង​ផ្ទុយ​គ្នា​ទាក់​ទិន​ទៅ​នឹង​ការ​បណ្តេញ​ចេញ​កម្មករ​រោងចក្រ SL ពី​ការងារ ដោយ​មន្រ្តី​សហជីព​បាន​អះអាង​ថា កម្មករ​ប្រហែល ៥០០០ នាក់​ត្រូវ​បាន​បណ្ដេញ​ចេញ​ពី​ការងារ​កាល​ពី​ថ្ងៃ​ម្សិលមិញ ប៉ុន្តែ​អាជ្ញាធរ​មូលដ្ឋាន​បាន​អះអាង​ថា មាន​កម្មករ​ប្រមាណ​ជាង ៧០០ នាក់​ប៉ុណ្ណោះ ព្រម​ជាមួយ​គ្នា​នេះ​ដែរ​កម្មករ​គ្រោង​នឹង​ជួប​ជុំ​គ្នា​ដើរ​ក្បួន​ទៅ​កាន់ សាលា​រាជធានី​ភ្នំពេញ​នៅ​ថ្ងៃ​ព្រហស្បតិ៍​នេះ។

លោក សាង យ៉ូត ជា​មន្ត្រី​សម្ព័ន្ធ​សហជីព​ប្រជាធិបតេយ្យ​កម្មករ​កាត់​ដេរ​កម្ពុជា​ហៅ​កាត់​ថា (ស៊ីខៅឌូ) បាន​ឲ្យ​ដឹង​ពី​ថ្ងៃ​ម្សិលមិញ​ថា រោងចក្រ​កាត់​ដេរ SL បាន​ចេញ​លិខិត​បញ្ឈប់​កម្មករ​ស្ទើរ​តែ​ទាំង​អស់​ខណៈ​ពេល​ដែល​ពួក​គេ​ទទួល​បាន​អត្ថ​ប្រយោជន៍​តែ​ពីរ​ចំណុច​ប៉ុណ្ណោះ។ លោក​បាន​ថ្លែង​ថា៖ «កម្មករ​នឹង​ជួប​ជុំ​គ្នា​ដើរ​ក្បួន​ទៅ​កាន់​សាលា​រាជធានី​នៅ​ថ្ងៃ​នេះ​ដើម្បី​សុំ​ឲ្យ​អភិបាល​ក្រុង​ជួយ​ធ្វើ​អន្តរាគមន៍ ដល់​ពួកគេ ព្រោះ​ក្រុមហ៊ុន​កំពុង​មាន​បំណង​បិទ​ទ្វារ​រោងចក្រ​ដោយ​មិន​ផ្ដល់​អត្ថ​ប្រយោជន៍​ដល់​កម្មករ​តាម​ផ្លូវ​ច្បាប់»។

លោក​បាន​បន្ត​ថា ក្រុមហ៊ុន​ប្រកាស​ផ្ដល់​ប្រាក់​តែ​ពីរ​ចំនុច​ទៅ​ដល់​កម្មករ គឺ​ប្រាក់​ខែ​ចុង​ក្រោយ និង​ប្រាក់​បំណាច់​ឆ្នាំ​ប៉ុណ្ណោះ​ប៉ុន្តែ​កម្មករ​បាន​ទាមទារ​ឲ្យ​ក្រុមហ៊ុន​ផ្ដល់​ប្រាក់​ដល់​ពួក​គេ​តាម​ច្បាប់​ការងារ​ដែល​មាន ៥ ចំណុច​គឺ​ប្រាក់​ជូន​ដំណឹង ប្រាក់​សង​ជម្ងឺ​ចិត្ត ប្រាក់​បណ្ដេញ​ចេញ ប្រាក់​ខែ​ចុង​ក្រោយ និង​ប្រាក់​បំណាច់​ឆ្នាំ។

តំណាង​កម្មករ​លោក ឡាច ស៊ីផន បាន​ឲ្យ​ដឹង​ពី​ថ្ងៃ​ម្សិលមិញ​ដែរ​ថា កម្មករ​បាន​ទៅ​ធ្វើ​ការ​តាម​ការ​បង្គាប់​របស់​តុលាការ ប៉ុន្តែ​រោងចក្រ​បាន​បិទ​ទ្វារ​ចូល​ក្នុង​រោងចក្រ​ដោយ​មិន​អនុញ្ញាត​ឲ្យ​កម្មករ​ចូល​ទៅ​ខាង​ក្នុង។

លោក​បន្ថែម​ថា៖ «កម្មករ​បាន​ខឹង​សម្បា​ហើយ​ពួកគេ​ចាប់​ផ្ដើម​ជ្រួល​ច្របល់ នៅ​ពេល​ពួក​គេ​ឃើញ​សេចក្ដី​ជូន​ដំណឹង​របស់​រោងចក្រ​ពី​ការ​បញ្ចប់​កិច្ច​សន្យា​ការងារ​របស់​ពួក​គេ»។

លោក ហៀក ចាន់លាង អភិបាល​រង​ខណ្ឌ មានជ័យ ដែល​បាន​ចុះ​ជួយ​អន្តរាគមន៍​នៅ​រោងចក្រ​នេះ​ពី ថ្ងៃ​ម្សិលមិញ​បាន​មាន​ប្រសាសន៍​ថា កម្មករ​បាន​តវ៉ា​នៅ​ខាង​មុខ​រោងចក្រ​នៅ​លើ​ផ្លូវ​លេខ ៣៧១ ប៉ុន្តែ​ពួក​គេ​មិន​បាន​បិទ​ផ្លូវ​ទេ។ លោក​បាន​បន្ថែម​ថា៖ «តាម​បញ្ជី​រាយ​ឈ្មោះ​កម្មករ​ដែល​ខ្ញុំ​បាន​ទទួល​ពី​រោងចក្រ គឺ​មាន​កម្មករ​ជាង ៧០០ នាក់​ត្រូវ​បាន​ក្រុមហ៊ុន​បញ្ឈប់​កិច្ច​សន្យា​ការងារ​ពួក​គេ។ សម្រាប់​កម្មករ​ផ្សេង​ទៀត​ត្រូវ​បាន​អនុញ្ញាត​ឲ្យ​ឈប់​សម្រាក​រយៈ​ពេល​បួន​ថ្ងៃ​ដោយ​គិត​ចាប់​ពី​ថ្ងៃ​នេះ​រហូត​ដល់​ថ្ងៃ​សៅរ៍ ហើយ​ពួក​គេ​ត្រូវ​ត្រឡប់​មក​ធ្វើ​ការ​វិញ​នៅ​ថ្ងៃ​ចន្ទ ប៉ុន្តែ​ក្រុមហ៊ុន​គិត​ប្រាក់​ខែ ៥០ ភាគរយ​ដល់​ពួក​គេ»។

លោក បាន​លើក​ឡើង​ថា​លោក​បាន​រាយការណ៍​ជូន​ទៅ​អភិបាល​រាជធានី​ពី​ករណី នៅ​រោងចក្រ​កាត់ដេរ SL នេះ​រួច​ហើយ។ លោក​បាន​បញ្ជាក់​ថា៖ «ខ្ញុំ​បាន​រាយការណ៍​រួច​ហើយ ប៉ុន្តែ​ខ្ញុំ​មិន​ទាន់​ដឹង​ពី​គម្រោង​របស់​កម្មករ​ក្នុង​ការ​ជួប​ជុំ​គ្នា ដើរ​ក្បួន​ទៅ​កាន់​សាលា​ក្រុង​នៅ​ថ្ងៃ​ស្អែក​ឡើយ។ ខ្ញុំ​គិត​ថា ភាគី​ទាំង​ពីរ​គួរ​តែ​អង្គុយ​ចរចា​ទល់​មុខ​គ្នា​រក​ដំណោះស្រាយ​បញ្ចប់ ករណី​នេះ​ប្រសើរ​ជាង»។

លោក ឈិន សៅ ប្រធាន​គ្រប់​គ្រង​រដ្ឋបាល​រោងចក្រ SL ២ បាន​ថ្លែង​ពី​ថ្ងៃ​ម្សិលមិញ​ថា ក្រុមហ៊ុន​បាន​បញ្ចប់​កិច្ច​សន្យា​ពួក​គេ ព្រោះ​ពួកគេ​មិន​ព្រម​ធ្វើ​ការ​ឲ្យ​ក្រុមហ៊ុន ហើយ​មាន​កម្មករ​ប្រហែល ៦០០ ទៅ ៧០០ នាក់​ត្រូវ​បាន​បញ្ឈប់។ លោក​បាន​បន្ត​ថា៖ «យើង​បាន​បញ្ឈប់​កិច្ច​សន្យា​ពួកគេ​ជាមួយ​ក្រុមហ៊ុន ព្រោះ​ពួក​គេ​មិន​ធ្វើ​ការងារ​ឲ្យ​យើង។ ដូច្នេះ​យើង​ត្រូវ​ធ្វើ​តាម​ច្បាប់​ពួក​គេ​មិន​គោរព​នូវ​ប្រសាសន៍​របស់​លោក​អភិបាល​ក្រុង​ដែល​បាន​សុំ​ឲ្យ​ពួក​គេ​ត្រឡប់​ទៅ​ធ្វើ​ការងារ​វិញ​។ យើង​មិន​មាន​ជម្រើស​ទេ»។

លោក​បាន​អះអាង​ថា លោក​បាន​អនុញ្ញាត​ឲ្យ​កម្មករ​ផ្សេង​ទៀត​ឈប់​សម្រាក​បួន​ថ្ងៃ​ដើម្បី​ចៀសវាង មាន​បញ្ហា​ណា​មួយ​កើត​ឡើង​ដល់​ពួក​គេ​។ លោក​ព្រួយ​បារម្ភ​ថា អ្នក​តវ៉ា​នឹង​ធ្វើ​អ្វី​មួយ​អាក្រក់​ដល់​កម្មករ​ដែល​មក​ធ្វើ​ការ​ដូច្នេះ​ហើយ​ទើប​លោក​អនុញ្ញាត​ឲ្យ​ពួក​គេ​ឈប់​សម្រាក។

ទន្ទឹម​គ្នា​នេះ​ដែរ កម្មករ​នៅ​រោងចក្រ Dayup Global ដែល​បាន​ធ្វើ​ការ​តវ៉ា​ប្រមាណ​ជាមួយ​សប្ដាហ៍​បាន​ត្រឡប់​ទៅ​ធ្វើ​ការ​វិញ កាល​ពី​ថ្ងៃ​ចន្ទ​បន្ទាប់​ពី​ករណី​នេះ​ត្រូវ​បាន​ដោះស្រាយ។

អ្នក​ស្រី YH Ban នាយក​ចាត់ការ​ទូទៅ​នៅ​រោងចក្រ Dayup Global បាន​ថ្លែង​តាម​អ៊ីមែល​ពី​ថ្ងៃ​ម្សិលមិញ​ថា៖ «រោងចក្រ និង​ក្រុម​សហជីព​ខាង​ក្នុង​រោងចក្រ​បាន​យល់​ព្រម​ដោះស្រាយ​បញ្ហា​តាម​ការ ពិភាក្សា និង​ចរចា​ដោយ​សន្តិវិធី​ក្រោម​ការ​សម្រប​សម្រួល​ពី​មន្ត្រី​ការងារ ហើយ​ទាំង​អស់​គ្នា​ទទួល​បាន​ការ​ពេញ​ចិត្ត​ទាំង​សង់​ខាង​ផង​ដែរ»។

អ្នក​ស្រី​បាន​អះអាង​ថា រោងចក្រ​នឹង​ផ្ដល់​សំណង​នៅ​ក្នុង​ការ​ផ្ដល់​ប្រាក់​ខែ​នៅ​ខែ កញ្ញា​ដល់ កម្មករ​ដែល​បាត់​ប្រាក់​ខែ​ប្រចាំ​ថ្ងៃ​ក្នុង​រយៈ​ពេល ៥ ថ្ងៃ​ដល់​អ្នក​តវ៉ា ហើយ​រោងចក្រ​រក្សា​ទុក​ប្រាក់​បំពេញ​ការងារ​សម្រាប់​រយៈ​ពេល​នេះ​។ អ្នក​ស្រី YH Ban ថ្លែង​ថា៖ «រោងចក្រ​ប្ដេជ្ញា​ផ្ដល់​សេរីភាព​ក្នុង​ការ​ជួប​ជុំ​គ្នា និង​គាំទ្រ​ឲ្យ​មាន​ការ​ប្រមូល​ផ្ដុំ​គ្នា​ជាមួយ​សហជីព​ខាង​ក្នុង​។ ចំពោះ​ក្រុម​ការងារ​ខាង​ក្រៅ​រោងចក្រ​សង្ឃឹម​ថា ភាគី​ទាំង​សង​ខាង​នឹង​អនុវត្ត​តាម​ច្បាប់​ការងារ​ដែល​មាន​ស្រាប់​នៅ​កម្ពុជា»។

អ្នក​ស្រី​ថា ថ្នាក់​គ្រប់​គ្រង​មូលដ្ឋាន​គួរ​តែ​ផ្ដល់​វេទិកា និង​លើក​ទឹក​ចិត្ត​ឲ្យ​មាន​កិច្ច​ចរចា​បើក​ទូលាយ​រវាង​ក្រុម​ការងារ និង​ក្រុម​ផលិតករ​ក្នុង​ការ​លើក​តម្កើង​ចំណេះ​ដឹង​រវាង​ភាគី​ទាំង​ពីរ៕ PN

អត្ថបទគួរចាប់អារម្មណ៍