The Phnom Penh Post Search

Search form




Logo of Phnom Penh Post newspaper Phnom Penh Post - បទល្មើស​គ្រឿង​ញៀន​កើន​ឡើង​ដល់​ជាង ៣០០%

បទល្មើស​គ្រឿង​ញៀន​កើន​ឡើង​ដល់​ជាង ៣០០%

Content image - Phnom Penh Post
ជនសង្ស័យនិង​គ្រឿង​​ញៀន​ជាង ​១០ ០០០ គ្រាប់​​​។ រូបថតនគរបាល​ជាតិ

បទល្មើស​គ្រឿង​ញៀន​កើន​ឡើង​ដល់​ជាង ៣០០%

កំពង់ឆ្នាំង/ភ្នំពេញៈ នគរបាល នឹង​បញ្ជូន​ជន​សង្ស័យ​ចំនួន ៣ នាក់ ពាក់​ព័ន្ធ​នឹង​ការ​ជួញដូរ​គ្រឿង​ញៀន ជាង ១ ម៉ឺន​គ្រាប់ ទៅ​សាលា​ដំបូង​ខេត្ត​កំពង់ឆ្នាំង​ នៅ​ថ្ងៃ​នេះ ខណៈ​ដែល​អត្រា​នៃ​បទ​ល្មើស​គ្រឿង​ញៀន​ដែល​ត្រូវ​សមត្ថកិច្ច​បង្ក្រាប​បាន​ ក្នុង​រយៈ​ពេល ៩ ​ខែ​ដើម​ឆ្នាំ​ ២០១៥ នេះ ​មាន​ការ​កើន​ឡើង​​រហូត​ដល់​ជាង ៣០០ % គឺ​មាន​ដល់​ទៅ​ជាង ១ ៦០០ ករណី បើ​ ធៀប​នឹង​រយៈពេល​ដូចគ្នា​កាល​ពី​ឆ្នាំ ២០១៤ ដែល​មាន​ជាង ៥០០ ករណី។

លោក ​ជុន ថារិទ្ធ​ ស្នងការ​រង​នគរបាល​ខេត្ត​កំពង់ឆ្នាំង បាន​​ឲ្យ​ដឹងថា ជន​សង្ស័យ​ទាំង​បី​នាក់ ដែល​ត្រូវ​សមត្ថកិច្ច​ចាប់​ខ្លួន​បាន​​កាលពី​ថ្ងៃ​សៅរ៍នៅ​ភូមិ​អង្គ ស្រុក​បរិបូណ៌ ជាមួយ​នឹង​គ្រឿង​ញៀន​មេតំហ្វេតាមីន​ ចំនួន ១០ ១០០ គ្រាប់ ត្រូវ​បាន​សមត្ថកិច្ច​បញ្ចប់​ការ​​សួរ​ចម្លើយ​កាល​ពី​ម្សិល​មិញ​ហើយ​នឹង​ត្រូវ​បញ្ជូន​ទៅ​សាលា​ដំបូង​ខេត្ត​នៅ​ថ្ងៃ​ចន្ទ​នេះ។

លោក​បញ្ជាក់​ថា សមត្ថកិច្ច​ចាប់​ជន​សង្ស័យ​ ក្នុង​បទ​ល្មើស​ជាក់ស្តែង​ ហើយ​ជន​ល្មើស​ទាំង​បី​​នាក់​នេះ ក៏​ជា​មុខ​សញ្ញា​តាម​ចាប់​របស់​នគរបាល​ប្រឆាំង​គ្រឿងញៀន​ពី​ក្រសួង​មហាផ្ទៃ​ផង​ដែរ ដោយ​មាន​ភ្នាក់ងារ​បង្កប់​ជា​អ្នក​ចរចា​ទិញ​ថ្នាំញៀន។ ជន​សង្ស័យ​ត្រូវ​សមត្ថកិច្ច​ចាប់​ខ្លួន ខណៈ​កំពុង​ដោះដូរ​គ្រឿង​ញៀន ដែល​តាម​មន្រ្តី​ប្រឆាំង​គ្រឿងញៀន​ថា គ្រឿង​ញៀន​ ១០ ១០០ គ្រាប់​នេះ មាន​តម្លៃ​​ប្រមាណ​​ ៣៥ ០០០ ដុល្លារ។

លោក​ ថារិទ្ធ បញ្ជាក់ថា៖​ «សមត្ថកិច្ច​យើង បាន​ណាត់​គ្នាដោះ​ដូរ​ទំនិញ​នៅ​ស្រុក​បរិបូណ៌ ​ដោយ​សមត្ថកិច្ច​យើង​ជា​កម្លាំង​បង្កប់​ប្រើ​រូបភាព​ជា​អ្នក​បញ្ជា​ទិញ»។

លោក​យិន​ បញ្ញារិទ្ធ​ នាយ​ការិ​យាល័យ​ «ក៩» នៃ​មន្ទីរ​ប្រឆាំង​គ្រឿងញៀន​ ក្រសួង​មហាផ្ទៃ​​បាន​ឲ្យ​ដឹង​ថា ​ជន​សង្ស័យ​ឈ្មោះ មី រ៉េម​ ហៅ រ៉ន ភេទ​ប្រុស​ អាយុ ​៤៥​ ឆ្នាំ​ រស់​នៅ​ភូមិ​កណ្តាល​ ឃុំ​ពានរោង​ស្រុក​ស្វាយ​អន្ទរ ​ខេត្ត​ព្រៃវែង​ សំ សារឿន​ ភេទ​ប្រុស ​អាយុ ៥៦ ឆ្នាំ និង​ប្រពន្ធ​ឈ្មោះ យ៉ន មុំ អាយុ ៣៦ ឆ្នាំ​ រស់នៅ​បន្ទប់​ជួលក្នុង​សង្កាត់​ឫស្សីកែវ រាជធានី​ភ្នំពេញ។

តាម​រយៈ​វីដេអូ​កិច្ច​សម្ភាសន៍​របស់ លោក ម៉ក់ ជី​តូ អគ្គ​ស្នង​ការរង​នគរបាល​ជាតិ​ទទួល​បន្ទុក​ប្រឆាំង​គ្រឿង​ញៀន ស្តីពី​លទ្ធផល​កិច្ច​ប្រតិបត្តិ​ការ​ប្រយុទ្ធ​ប្រឆាំង​នឹង​គ្រឿង​ញៀន​ក្នុង​រយៈពេល ៩​ខែ ឆ្នាំ ២០១៥ បាន​ឲ្យ​ដឹង​ថា សមត្ថកិច្ច បាន​បង្ក្រាប​ករណី​គ្រឿង​ញៀន​ចំនួន ១៦៦៨ ករណី ឃាត់​ខ្លួន​ជន​សង្ស័យ និង​ជនល្មើស​បាន ៣៤០២ ​នាក់ និង​ដក​ហូត​គ្រឿង​ញៀន​ជាច្រើន​ប្រភេទ​បាន ជាង​ ៨៧ ​គីឡូក្រាម​កន្លះ។

លោក​ថា ទិន្ន​ន័យ ៩ ខែ ដើមឆ្នាំ​ ២០១៥ ​នេះ បាន​កើនឡើង​ជាង ៣ ដង បើ​ធៀប​នឹង​រយៈពេល​ដូចគ្នា​ក្នុង​ឆ្នាំ ២០១៤ សមត្ថកិច្ច ​បង្ក្រាប​បាន​តែ ៥៦៤ ករណី ឃាត់​ខ្លួន​ជន​សង្ស័យ និង​ជន​ល្មើស​បាន ១៣៤៥ នាក់ និង​ដកហូត​គ្រឿង​ញៀន​បាន ៤៣ ​គីឡូក្រាម។

បើ​តាម​លោក ជីតូ ក្នុង ៩ ​ខែ​ឆ្នាំ ២០១៥ នេះ សមត្ថ​កិច្ច បង្ក្រាប​បាន​ករណី​ធំ​ៗ​ជាង ៤០ ​ករណី ក្នុង​នោះ​មាន ករណី​ធ្ងន់ធ្ងរ​មួយ ដែល​សមត្ថកិច្ច​រឹបអូស​បាន​គ្រឿង​ញៀន​ប្រភេទ​មេតំហ្វេតាមីន​ដល់​ទៅ​ជិត ៥៥ ​គីឡូក្រាម និង​មួយ​ករណី​ទៀត រឹបអូស​បាន​កញ្ឆា​ចំនួន ១,៥​តោន និង​ប្រេង​កញ្ជា ១,៥ គីឡូក្រាម។

យ៉ាង​ណា​ក៏​ដោយ លោក​ ជីតូ ​អះអាងថា បរិមាណ​កើនឡើង​នៃ​គ្រឿង​ញៀន ដែល​រឹបអូស​នេះ មិន​មាន​អ្វី​ប្លែក​នោះទេ។

លោក​ថា៖ «ពីមុន​បងប្អូន (សមត្ថកិច្ច) ដឹង​ដែរ តែ​មិន​សូវ​ចេះ ថា​ធ្វើ​ម៉េច​ចាប់​ឲ្យ​បាន លើក​នេះ ខុសពី​មុន ព្រោះ​យើង​បាន​ពិភាក្សា​ជាមួយ​តុលាការ និង​ព្រះ​រាជ​អាជ្ញា ពង្រឹង​វិធានការ​ច្បាប់ និង​ជំនាញ...ការបង្ក្រាប ដកហូត​វត្ថុ​តាង និង​កសាង​សំណុំ​រឿង​យ៉ាង​ម៉េច ដល់​ពេល​ឥឡូវ​ពួកគាត់​ចេះ គាត់​មិន​ភ័យ​ខ្លាច​ប្រតិកម្ម​ពី​ជន​ល្មើស​ឬ​ធ្វើ​ទៅ​ហើយ​ខុស​​ច្បាប់​ទេ គាត់​មិន​​ខ្លាច​ចំពោះ​អ្នកគាំទ្រ​ជន​ល្មើស ជាក់​ស្តែង​ការ​បង្ក្រាប​បទ​ល្មើស​គ្រឿង​ញៀនធំៗ ឥឡូវ​លែង​មាន​អ្នក​នៅ​ខាង​ក្រោយ​ខ្នង​ការពារ​ទៀត​ហើយ»។

បើ​តាម លោក ជីតូ កត្តា​ដែល​នាំ​ឲ្យ​មាន​ការ​ប្រើ​ប្រាស់​គ្រឿង​ញៀន គឺ​ដោយសារ​តែ​ពលរដ្ឋ​ខ្មែរ​ធ្វើ​ចំណាក​ស្រុក​ច្រើន​ទៅ​ធ្វើ​ការ​នៅ​ប្រទេស​ជិត​ខាង និង​មួយ​ចំនួន​យល់​ច្រឡំ​ថា គ្រឿង​ញៀន​ជា​ឱសថ​ប៉ូវ​កម្លាំង អាច​បង្កើន​ប្រសិទ្ធភាព​ការងារ កាត់​បន្ថយ​ភាព​នឿយហត់​ធ្វើ​ឲ្យ​មាន​ភាព​សប្បាយ​រីករាយ និង​បង្កើន​​សមត្ថភាព​ផ្លូវ​ភេទ​ជាដើម។

តាម​ការស្រាវជ្រាវ​បឋម លោក ជីតូ បាន​ឲ្យ​ដឹង​ដែរ​ថា ចំពោះ​អ្នក​ប្រើ​ប្រាស់​គ្រឿងញៀន​នៅ​កម្ពុជា​រក​ឃើញ មាន​ជាង ៨ ពាន់​នាក់ តែ​ការ​សន្និដ្ឋាន​របស់​សមត្ថកិច្ច អាច​មាន​ប្រហែល​ ២ ម៉ឺន​នាក់។

លោក ហង្ស ជឿន ប្រធាន​សមាគម​អប់រំ ព្យាបាល​ជន​ប្រើប្រាស់​គ្រឿង​ញៀន និង​បណ្តុះ​បណ្តាល​ចំណេះ​ដឹង (DTA) ដែល​ជា​មណ្ឌល​ស្តារនីតិ​សម្បទា​ឯកជន​មួយ​កន្លែង នៅ​សង្កាត់​ភ្នំពេញ​ថ្មី រាជ​​ធានី​ភ្នំពេញ បាន​ឲ្យ​ដឹងថា គិត​ចាប់​ពី​បើក​ដំណើរ​ការ​នៅ​ឆ្នាំ​ ២០០៨ មក អ្នក​ញៀន​ថ្នាំ​ជា​ង ២ ២០០ នាក់ ត្រូវ​បាន​ទទួល​ការ​ព្យាបាល​នៅ​សមាគម​នេះ ក្នុង​នោះ ១០% គឺ​ជា​ស្ត្រី​ហើយ​ភាគ​ច្រើន​មាន​អាយុ​ចន្លោះ​ពី ២០ទៅ ៣០ ឆ្នាំ រីឯ​អនីតិជន គឺមាន​ប្រមាណ​ ៣%។

លោក​ថា៖«អ្នក​មក​ទទួល​ការ​ព្យាបាល​នេះ ៧០ % ជា​អ្នក​រស់​នៅ​ភ្នំពេញ ៣០% មក​ពី​បណ្តា​ជន​បទ ភាគ​ច្រើន គឺ​អាណា​ព្យាបាល​បញ្ជូន​មក ហើយ​អ្នកខ្លះ​ធ្លាប់​មក​ដល់​ទៅ ៣ ដង ព្រោះ​បញ្ហា​លាប់​ឡើងវិញ... តាម​ការ​ពិសោធ ការ​ព្យាបាល​គឺ​ទាម​ទារ​រយៈពេល​ពី ១ ​ឆ្នាំ​ទៅ​ ២ ឆ្នាំ ទើប​អាច​ជា៕

អត្ថបទគួរចាប់អារម្មណ៍