ក្រចេះ: ប្រជាសហគមន៍នេសាទកាំពីបាននិយាយថា បទល្មើសនេសាទក្នុងតំបន់ដែនអភិរក្សអន្លង់ផ្សោតកាំពីនៅតែបន្តកើតមាន បើទោះជាមានការហាមឃាត់ និងបង្ក្រាបចាប់ជនល្មើសបានជាបន្តបន្ទាប់ក្ដី។ ក្រុមជនល្មើសភាគច្រើនបានប្រើឧបករណ៍ឆក់ត្រជាក់ដែលមានកម្លាំងថាមពលខ្លាំងភ្ជាប់ជាមួយមងរបស់ពួកគេ ដើម្បីចាប់ត្រីក្នុងអន្លង់ទឹកជ្រៅ ដែលប៉ះពាល់ធ្ងន់ធ្ងរដល់ធនធានមច្ឆជាតិ ពិសេសសត្វផ្សោតដែលជាប្រភេទសត្វកម្រ និងជិតផុតពូជ។
លោក ថុន ថារង់ ប្រធានសហគមន៍នេសាទកាំពីប្រាប់ភ្នំពេញប៉ុស្តិ៍ថា អាជ្ញាធរពាក់ព័ន្ធ ពិសេសសមត្ថកិច្ចជំនាញរដ្ឋបាលជលផល គប្បីបើកយុទ្ធនាការបង្ក្រាបបទល្មើសនេសាទជាលក្ខណៈទ្រង់ទ្រាយធំនៅក្នុងរដូវបិទនេសាទនេះ និងធ្វើការស្រាវជ្រាវស៊ើបអង្កេតចាប់ក្រុមជនប្រព្រឹត្តបទល្មើសនេសាទ ដែលប្រើឧបករណ៍ល្មើសច្បាប់ក្នុងតំបន់ហាមឃាត់ ឬតំបន់អភិរក្សអន្លង់ផ្សោតកាំពី យកមកផាកពិន័យ ឬកសាងសំណុំរឿងបញ្ជូនឲ្យតុលាការផ្ដន្ទាទោសទៅតាមច្បាប់ បើពុំនោះទេធនធានមច្ឆជាតិ ពិសេសផ្សោតទន្លេមេគង្គនឹងផុតពូជមិនខាន។
លោក ថារង់ បញ្ជាក់ថា៖ «ក្រុមជនប្រព្រឹត្តបទល្មើសនេសាទ ភាគច្រើនបានប្រើឧបករណ៍ឆក់ត្រជាក់ដែលមានថាមពលរហូតដល់ ៣ ម៉ឺនវ៉ាត់ភ្ជាប់ជាមួយមងរបស់ពួកគេ ដើម្បីចាប់ត្រីក្នុងអន្លង់ទឹកជ្រៅ។ សកម្មភាពរបស់ពួកគេភាគច្រើនធ្វើឡើងនៅពេលយប់ ប៉ុន្តែយូរៗម្ដងពួកគេក៏បានលួចធ្វើសកម្មភាពនៅពេលថ្ងៃផងដែរ»។
លោកបន្តថា កាលពីពេលថ្មីៗកន្លងមកនេះ ក្រុមការងារនៃសហគមន៍របស់លោកបានសហការជាមួយកម្លាំងប្រជាការពារ និងក្រុមឆ្មាំទន្លេនៃរដ្ឋបាលជលផលចុះបង្ក្រាបចាប់បានក្រុមជនប្រព្រឹត្តបទល្មើសនេសាទ ៣ នាក់ និងរឹបអូសបានឧបករណ៍ឆក់ អាគុយ និងដុំអាំងឌុចទ័រជាច្រើនគ្រឿងនៅក្នុងតំបន់អន្លង់ផ្សោតកាំពី។
ជាមួយគ្នានេះលោក ថេង ភាព ប្រធានក្រុមប្រជាការពារភូមិកាំពីនៃឃុំសំបុក ស្រុកចិត្របុរីថ្លែងថា ការបង្ក្រាបចាប់ក្រុមជនប្រព្រឹត្តបទល្មើសនេសាទ មិនមានភាពងាយស្រួលដូចជាការនិយាយនោះទេ។ ពេលខ្លះក្រុមការងាររបស់លោកបានរងការគំរាមកំហែងដល់អាយុជីវិតពីក្រុមជនល្មើសផងដែរ។
លោកថ្លែងថា៖ «ពេលខ្លះក្រុមជនប្រព្រឹត្តបទល្មើសមានគ្នាច្រើន និងមានឧបករណ៍ឆក់ដែលមានកម្លាំងខ្លាំង ព្រមទាំងមានទូកម៉ាស៊ីនធំៗកម្លាំងខ្លាំង បានបើកដេញបុកពន្លិចទូករបស់ពួកយើងវិញ នៅពេលឃើញក្រុមការងារយើងមានគ្នាតិចត្រឹមតែ ៤-៥ នាក់ ហើយគ្មានក្រុមឆ្មាំទន្លេដែលជាកម្លាំងនគរបាលយុត្តិធម៌ចូលរួមនោះ»។ លោកថា៖ «ការការពារធនធានមច្ឆជាតិពិសេសផ្សោតទន្លេមេគង្គក្នុងតំបន់អភិរក្សអន្លង់កាំពីគឺជាតួនាទីរបស់យើងទាំងអស់គ្នា»។
បើតាមលោក ភាព ជីវភាពរស់នៅរបស់ប្រជាពលរដ្ឋក្នុងឃុំសំបុក ជាពិសេសអ្នកភូមិកាំពីមានភាពល្អប្រសើរអាស្រ័យដោយការរកប្រាក់ចំណូលពីទេសចរជាតិ និងអន្តរជាតិដែលមកទស្សនា សត្វផ្សោតដ៏ជាទីទាក់ទាញក្នុងតំបន់ដែនអភិរក្សសត្វផ្សោតអន្លង់កាំពីដែលជារមណីយដ្ឋានដ៏ទាក់ទាញបំផុតនៅខេត្តក្រចេះ។
ការប្រើឧបករណ៍ឆក់ និងមងសម្រាប់ការនេសាទត្រីនៅក្នុងតំបន់អន្លង់កាំពី ឬតំបន់ដែនអភិរក្សសត្វផ្សោតទន្លេមេគង្គដែលគិតចាប់ពីព្រំប្រទល់ខេត្តក្រចេះ ដល់ខេត្តស្ទឹងត្រែងជាប់ព្រំប្រទល់ប្រទេសឡាវត្រូវបានហាមឃាត់ ប៉ុន្តែការលួចឆ្មក់របស់ក្រុមជនប្រព្រឹត្តបទល្មើស នៅតែបន្តកើតមានដែលបង្កឲ្យមានក្ដីព្រួយកង្វល់អំពីសុវត្ថិភាពរបស់ផ្សោតទន្លេមេគង្គ។ នេះបើតាមលោក ម៉ុក ពន្លក នាយរងខណ្ឌរដ្ឋបាលជលផលខេត្តក្រចេះ និងជាប្រធានក្រុមការងារអភិរក្សសត្វផ្សោតក្នុងតំបន់អន្លង់កាំពី។
លោកបន្តថា នៅក្នុងឆ្នាំ ២០២០ នេះមានសត្វផ្សោត ៣ ក្បាលបានងាប់ ដោយសង្ស័យថា ជាប់មង ឬរងការឆក់ដោយឧបករណ៍ឆក់របស់ក្រុមប្រព្រឹត្តបទល្មើសនេសាទខុសច្បាប់។
លោកថ្លែងថា៖ «យើងមានការព្រួយបារម្ភអំពីករណីនេះ ប៉ុន្តែយើងក៏ត្រូវខិតខំការពារ និងអភិរក្សឲ្យបានល្អផងដែរ តាមរយៈការពង្រឹងការចុះល្បាតទាំងយប់ទាំងថ្ងៃក្នុងរយៈពេលពី ២០ ទៅ ២២ ថ្ងៃ ក្នុង ១ ខែ ដើម្បីការពារធនធានមច្ឆជាតិ និងសត្វផ្សោត។ ផ្សោតទន្លេមេគង្គក្នុងតំបន់នេះគឺជាអត្តសញ្ញាណរបស់ខេត្តក្រចេះ និងស្ទឹងត្រែង ហើយវាជាសម្បត្តិរបស់ជាតិទាំងមូល»។
បើតាមលោក ពន្លក ក្រុមជនប្រព្រឹត្តបទល្មើស ៩ នាក់ត្រូវបានចាប់ខ្លួន និងកសាងសំណុំរឿងបញ្ជូនទៅតុលាការ ហើយត្រូវតុលាការសម្រេចផ្ដន្ទាទោសឲ្យជាប់ពន្ធនាគារទៅតាមកម្រិតនៃបទល្មើសរបស់ពួកគេផងដែរ ក្នុងនោះមានជនប្រព្រឹត្តបទល្មើសម្នាក់ជាប់ពន្ធនាគាររយៈពេល ៣ ឆ្នាំ៕