ភ្នំពេញៈ ខណៈជំនន់ទឹកភ្លៀង និងទឹកទន្លេមេគង្គកំពុងហក់ឡើង និងជន់លិចចូលទៅក្នុងស្ទឹងព្រែក និងបឹងបួនានាដែលជាតំបន់វាលទំនាបព្រៃលិចទឹក និងជាជម្រកត្រីពងកូននារដូវវស្សានេះ បទល្មើសនេសាទក៏បានចាប់ផ្ដើមកើតមានជាថ្មីផងដែរ បន្ទាប់ពីមានភាពស្ងប់ស្ងាត់មួយរយៈ ពិសេសបណ្ដាខេត្តនៅជុំវិញបឹងទន្លេសាប។
ជាក់ស្ដែងកាលពីថ្ងៃទី ១៦ ខែកញ្ញាកន្លងទៅថ្មីៗនេះ មន្ត្រីខណ្ឌរដ្ឋបាលជលផល និងកម្លាំងសមត្ថកិច្ចកងរាជអាវុធហត្ថខេត្តពោធិ៍សាត់បានចុះបង្ក្រាបបទល្មើសនេសាទនៅចំណុចភូមិកំពង់ថ្គោល ឃុំអន្សាចំបក់ ស្រុកក្រគរ បានរកឃើញ និងកម្ទេចចោលនូវសាច់អួនក្រឡាញឹកចំនួន ៤ ខ្សែ សរុបប្រវែង ១១២០ ម៉ែត្រ, ក្បាលបណរ៉ាវចំនួន ៤ វង់ របាំងស្បៃមុង ១២ ខ្សែ សរុបប្រវែង ១៧៥០ ម៉ែត្រ លូស្បៃមុងចំនួន ១៣ មាត់ និង បង្គោលចម្រឹងសរុបចំនួន ១៧៨០ ដើម។ នេះបើតាមការប្រាប់ឲ្យដឹងពីមន្ត្រីខណ្ឌរដ្ឋបាលជលផលខេត្តពោធិ៍សាត់ លោក ភុំ វិមល កាលពីម្សិលមិញ។
លោកថ្លែងថា៖ «ក្នុងប្រតិបត្តិការនាថ្ងៃនោះ កម្លាំងសមត្ថកិច្ចយើងក៏បានចាក់លែងកូនត្រីចម្រុះប្រភេទ ដែលចាប់រឹបអូសបានពីបទល្មើសខាងលើនេះសរុបជាង ៣០០ គីឡូក្រាមចូលទៅក្នុងបឹងធម្មជាតិវិញផងដែរ។ នៅពេលនេះក្រុមសមត្ថកិច្ចកំពុងបន្តចុះល្បាត ស្រាវជ្រាវ និង បង្ក្រាបបទល្មើសនៅលើផ្ទៃបឹងទន្លេសាបនៅឡើយ»។
ប្រជាសហគមន៍នេសាទ និង អាជ្ញាធរដែនដីនៅឯស្រុកកំពង់លែង ខេត្តកំពង់ឆ្នាំ និង ស្រុកកំពង់ស្វាយ ខេត្តកំពង់ធំបានឲ្យដឹងថា បទល្មើសនេសាទកើតឡើងគួរឲ្យកត់សម្គាល់ផងដែរក្នុងអំឡុងពេលមានទឹកជំនន់នេះ ខណៈនៅខេត្តបាត់ដំបង ក្រុមសហគមន៍ប្រជានេសាទបានរាយការណ៍ថា បទល្មើសដាក់បណរ៉ាវ និង លបកន្ទុយកណ្ដុរ កំពុងកើតមានច្រើនកន្លែងក្នុងឃុំជីហ្វាំង និង ឃុំព្រៃចាស់នៃស្រុកឯកភ្នំ។
លោក ហ៊ុត ហាន ប្រធានសហគមន៍នេសាទខេត្តបាត់ដំបងបានប្រាប់ភ្នំពេញប៉ុស្តិ៍ថា ក្រុមជនប្រព្រឹត្តបទល្មើសភាគច្រើន លួចធ្វើសកម្មភាពនៅពេលយប់ ដោយប្រើប្រាស់ទូកដែលមានកម្លាំងម៉ាស៊ីនខ្លាំង។ ពួកគេភាគច្រើនប្រើឧបករណ៍ខុសច្បាប់ ដូចជា បណរ៉ាវ និង លបកន្ទុយកណ្ដុរ ព្រមទាំងយ៉ាំងកាវអូសដោយប្រើផ្គួបជាមួយដុំឆក់ត្រជាក់ ដែលធ្វើឲ្យមានផលប៉ះពាល់ធ្ងន់ធ្ងរដល់ធនធានជលផល និងជីវចម្រុះ។
លោកថ្លែងថា៖ «កម្លាំងសមត្ថកិច្ចរួមជាមួយប្រជាសហគមន៍នេសាទបានចុះល្បាត ស្រាវជ្រាវ និង បង្ក្រាបបានជាបន្តបន្ទាប់ដែរ តែបទល្មើសហាក់ដូចជាមិនស្រាកស្រាន្តទាល់តែសោះ»។
ចំណែក លោក ងួន ធារិទ្ធ មេបញ្ជាការកងរាជអាវុធហត្ថស្រុកអន្លង់វែងក្នុងខេត្តឧត្តរមានជ័យបាននិយាយថា តំបន់ព្រៃលិចទឹកជាប់ដងស្ទឹងសែន និង មាត់បឹងតាម៉ុក ដែលជាដែនជម្រកត្រីពងកូនក៏មានបទល្មើស ដាក់បណរ៉ាវ និង សៃយ៉ើនផងដែរ។
លោកថ្លែងថា គ្រាន់តែក្នុងរយៈពេល ២ ថ្ងៃ (១៦-១៧ ខែកញ្ញ) នៃប្រតិបត្តិការចុះល្បាតតាមដងស្ទឹង ព្រែក និង តាមតំបន់ព្រៃលិចទឹក ក្នុងភូមិសាស្ត្រស្រុកអន្លង់វែង ក្រុមសមត្ថកិច្ចបានរកឃើញ និងរុះរើយកមកដុតបំផ្លាញចោលនូវឧបករណ៍ល្មើសច្បាប់រួមមានស្បៃមុងប្រវែងជាង ៣០០ ម៉ែត្រ និងបង្គោលឈើចំនួនជាង ២០០ ដើម។
លោក ធារិទ្ធ បានបញ្ជាក់ថា៖ «ក្នុងអំឡុងពេលនេះ បទល្មើសនេសាទបានកើតមានស្ទើរគ្រប់កន្លែង។ ជនប្រព្រឹត្តបទល្មើសភាគច្រើនធ្វើសកម្មភាពនៅក្នុងតំបន់ដែលមានព្រៃ និងដុះស្មៅក្រាស់ៗ និង ឆ្ងាយពីភូមិ»។
មិនចំពោះតែខេត្តជាប់ផ្ទៃបឹងទន្លេសាបទេដែលបទល្មើសនេសាទបានផ្ទុះឡើងគួរឲ្យកត់សម្គាល់ក្នុងអំឡុងពេលទឹកបានជន់លិចព្រៃលិចទឹក និង ព្រៃរនាមក្នុងតំបន់វាលទំនាប នារដូវហាមឃាត់ការនេសាទនេះ តែខេត្តភាគឦសាន និង ខេត្តដែលស្ថិតនៅតាមដងទន្លេមេគង្គក្រោមដែលរួមមាន ខេត្តកំពង់ចាម ត្បូងឃ្មុំ កណ្ដាល និង ព្រៃវែង ក៏មានករណីកើតឡើងស្រដៀងគ្នានេះដែរ។
លោក ប៉ៃ ថងឈុត តំណាងប្រជានេសាទនៅឃុំតាឡាត ស្រុកសេសាន ខេត្តស្ទឹងត្រែងបានប្រាប់ភ្នំពេញប៉ុស្តិ៍ថា បទល្មើសនេសាទបានចាប់ផ្ដើមកើតមានជាថ្មីឡើងវិញនៅក្នុងតំបន់វាលទំនាបព្រៃលិចទឹកមួយចំនួនដែលស្ថិតនៅតាមប្រព័ន្ធដៃទន្លេសេសាន ទន្លេស្រែពក និង ទន្លេសេកុង បន្ទាប់ពីទឹកបានជន់លិចតាំងពីដើមខែកញ្ញានេះមក។
លោក ឈុត ថ្លែងថា៖ «ជនប្រព្រឹត្តបទល្មើស ភាគច្រើនមកពីស្រុកវ៉ើនសៃ ខេត្តរតនគិរី និង មួយចំនួនជាប្រជាពលរដ្ឋមកពីសហគមន៍ភូមិក្បាលរមាស និង ភូមិស្រែគរថ្មី។ ពួកគេភាគច្រើនប្រើមង និងឧបករណ៍ឆក់»។
ទោះជាបែបណាក្ដី សំណុំរឿងចំនួន ១១៥ ករណីក្នុងចំណោមសំណុំរឿងបទល្មើសជលផលសរុបចំនួន ១៨៤៣ ករណីត្រូវបានក្រុមសមត្ថកិច្ចជំនាញរដ្ឋបាលជលផលបញ្ជូនទៅតុលាការ។ ក្នុងនោះជនប្រព្រឹត្តបទល្មើសចំនួន ១៩ នាក់ក្នុងចំណោម ៨៩ នាក់ត្រូវបានតុលាការផ្ដន្ទាទោសដាក់ពន្ធនាគារ។ នេះបើយោងតាមរបាយការណ៍បូកសរុបលទ្ធផលនៃការបង្ក្រាបបទល្មើសជលផលនៅទូទាំងប្រទេសក្នុងរយៈពេល ៨ ខែរបស់រដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទ ។
ក្នុងនោះសមត្ថកិច្ចរដ្ឋបាលជលផលបានធ្វើការផាកពិន័យអន្តរកាលទៅលើជនប្រព្រឹត្តបទល្មើសចំនួន ៦១ ករណី ស្មើនឹងទឹកប្រាក់សរុបចំនួន ១៤២ ៧៨៩- ០០០ រៀល ។ រីឯវត្ថុតាងរឹបអូសបាននៅនឹងកន្លែងមានចំនួន ១៦៦៧ ករណី៕