កំពង់ធំៈ យោងតាមទំព័រហ្វេសប៊ុករបស់គម្រោងរេដបូកទំរីង បានឲ្យដឹងនៅថ្ងៃទី ១៩ មេសាថា ក្រុមការងារពង្រឹងការអនុវត្តច្បាប់នៃគម្រោងរេដបូកទំរីងទាំងបីក្រុម និងកងកម្លាំងសហការទាំងបីក្រុម បានចុះល្បាតព្រៃនៅតំបន់អូរដៃជ្រៃ និងតំបន់ ៣៥ ស្ថិតនៅក្នុងឃុំបឹងល្វា ស្រុកសន្ទុក ខេត្តកំពង់ធំ នៅតែរកឃើញបទល្មើសព្រៃឈើក្នុងតំបន់ការពារ ក្នុងពេលដែលជំងឺកូវីដ១៩កំពុងរីករាលដាលនៅក្នុងប្រទេស។
ទំព័រហ្វេសប៊ុកដដែលបានឲ្យដឹងថា៖ «ជាលទ្ធផល ក្រុមការងារបានជួបប្រទះទីតាំងកាប់រានថ្មីមួយកន្លែងហើយជនល្មើសបានរត់គេចខ្លួនបាត់ ដោយបន្សល់ទុកម៉ូតូចំនួន ០១ គ្រឿង ហើយវត្ថុតាងត្រូវបានរក្សាទុកនៅសង្កាត់រដ្ឋបាលព្រៃឈើក្រយា»។
ឆ្លើយតបទៅនឹងបញ្ហានេះ ក្រុមការងារគ្រប់គ្រងគម្រោងរេដបូកទំរីង និងមន្ត្រីពង្រឹងការអនុវត្តច្បាប់នៅតែបន្តធ្វើការយ៉ាងយកចិត្តទុកដាក់ ដើម្បីការពារធនធានព្រៃឈើនៅក្នុងតំបន់គម្រោងទាំងមូល។
លោក ឈុន ឌឺលុច ប្រធានគម្រោងរេដបូកទំរីង បានប្រាប់ភ្នំពេញប៉ុស្តិ៍នៅថ្ងៃនេះ ថា បទល្មើសកាប់បំផ្លាញព្រៃឈើ នៅតែបន្តកើតមានដោយក្រុមជនល្មើសបានយកឱកាសដែលមន្ត្រី និងសហគមន៍មិនសូវចុះល្បាត ប្រព្រឹត្តសកម្មភាពកាប់បំផ្លាញ។
លោកបន្តថា៖ «តំបន់ព្រៃនេះ គឺមិនមានមនុស្សច្រើន ដែលអាចឲ្យឆ្លងកូវីដនោះទេ ដូច្នេះសូមមន្ត្រីបន្តចុះល្បាតបន្តទៀត។ ហើយមួយទៀត យើងត្រូវតែជួយសហគមន៍មួយចំនួននៅក្នុងតំបន់នេះ ដូចជាជួយផ្តល់ជាអាហារហូបចុក ដើម្បីឲ្យពួកគាត់ បានចុះល្បាត ព្រោះរាល់ថ្ងៃនេះ គាត់ខ្វះអាហារហូបចុកច្រើនណាស់»៕