.jpg)
ទិដ្ឋភាពកាប់បំផ្លាញព្រៃឈើនៅតំបន់ព្រៃឡង់ដែលរកឃើញកាលពីចុងឆ្នាំមុន។ សហការី
ព្រះវិហារៈ បណ្ដាញសហគមន៍ការពារព្រៃឡង់ នៅភូមិធ្មា ឃុំធ្មា ស្រុកជ័យសែន ខេត្តព្រះវិហារ បានលើកឡើងថា អាជ្ញាធរពាក់ព័ន្ធក្នុងតំបន់នេះ មិនទាន់អាចទប់ស្កាត់សកម្មភាពការកាប់ព្រៃឈើក្នុងតំបន់ព្រៃឡង់បាននៅឡើយ ទេខណៈបទល្មើសក្នុងតំបន់នេះ បានកើតឡើងជាច្រើនខែ ហើយសកម្មភាពដឹកជញ្ជូនឈើចេញពីព្រៃនៅតែដំណើរការបានយ៉ាងងាយស្ទើររៀងរាល់ថ្ងៃ។
លោក ចាន់ សារិន យុវជនការពារព្រៃឡង់នៅភូមិធ្មាប្រាប់កាសែតភ្នំពេញប៉ុស្ដិ៍ថា បច្ចប្បន្នតំបន់ព្រៃឡង់ ស្ថិតក្នុងឃុំធ្មា គឺមានជនល្មើសជាច្រើនក្រុមដែលមួយក្រុមមានគ្នាប្រហែល ១០ នាក់បាននិងកំពុងបន្តកាប់បំផ្លាញនិងដឹកជញ្ជូនឈើចេញពីព្រៃហើយសកម្មភាពបែបនេះ កើតមានជាច្រើនកន្លែង ដូចជា ទីតាំងប្រឡាយជ្រឹង និងនៅក្បែរអូររោងជាដើម។
លោក សារិន បន្តថា កាលពីថ្ងៃទី ២៣ ខែឆ្នូ ឆ្នាំមុន ក្រុមយុវជនរបស់លោកមានគ្នា ៤ នាក់បានចុះល្បាតព្រៃឡង់ហើយក៏បានឃើញនិងថតបានសកម្មភាព ក្រុមកាប់ឈើកំពុងដឹកជញ្ជូនឈើចេញពីតំបន់ព្រៃឡង់ស្ថិតក្នុងឃុំធ្មា ស្រុកជ័យសែន ឆ្ពោះទៅកាន់សិប្បកម្មកែច្នៃឈើមួយកន្លែងស្ថិតក្នុងស្រុកឆែប។ ក្រោយ ១ ថ្ងៃមកក៏មានមន្ត្រីឧទ្យានុរក្សនៅទីស្នាក់ការឃុំធ្មាចុះទៅតាមក្រោយដល់ទីតាំងនោះប៉ុន្តែរហូតមកទល់ ពេលនេះសកម្មភាពកាប់ព្រៃបំផ្លាញ ព្រៃឈើ នៅតែកើតមានដដែល។
លោកថា៖ «មន្ត្រីឧទ្យានុរក្សគាត់ចុះតែអត់មានធ្វើសកម្មភាពអីទេ ប្រហែលគ្រាន់តែចុះមើលអីមិនដឹងទេ។ នៅដដែល (ការកាប់ឈើ) និយាយរួមទៅអាជ្ញាធរគាត់ដូចជា អត់យកចិត្តទុកដាក់ចំពោះការបាត់បង់ព្រៃឈើរបស់យើងផង។នៅពេលចុះទៅពួកខ្ញុំបានស្នើមន្ត្រីឧទ្យានុរក្សចុះជាមួយពួកឧទ្យានុរក្សនោះថាគាត់ជាប់រវល់ អ៊ីចឹងពួកខ្ញុំទៅយើងធ្វើអីអត់កើតនៅពេលពួកខ្ញុំត្រឡប់មកវិញហើយពួកគាត់[អនុរក្ស] ចុះអត់មានធ្វើសកម្មភាពអីទេ»។
លោក ស្រី ថី អ្នកសម្របសម្រួលព្រៃឡង់ប្រចាំខេត្តព្រះវិហារដែលបានចុះល្បាតព្រៃឡង់កាលពីថ្ងៃទី ២៣ ខែធ្នូដែរ នោះបានលើកឡើងថា ក្នុង ១ ទីតាំងគឺលោកឃើញមានរថយន្តធំៗដឹកឈើចេញពីព្រៃឡង់ពី ២ ទៅ ៣ គ្រឿង ហើយឈើទាំងនោះមានដូចជា ខ្លុង ត្បែង រាំង ស្រឡៅ ជាដើមដែលមានទំហំមុខកាត់ចាប់ពី ៥០ សង់ទីម៉ែត្រឡើងនិងមានប្រវែងប្រហែល ៦ ម៉ែត្រ។ លើសពីនេះក៏មានដើមច្បោះជ័ររបស់ពលរដ្ឋក៏ត្រូវបានគេកាប់បំផ្លាញដែរ ។បើតាមលោក ថី អ្នកកាប់ឈើនោះគឺជាអ្នកមកពីខេត្តផ្សេងៗហើយមូលហេតុដែលមន្ត្រីឧទ្យានុរក្ស មិនចាត់វិធានការលើអ្នកប្រព្រឹត្តល្មើសបានអាចដោយសារទទួលបានលុយកាក់ ហើយលោកថាមានតែអាជ្ញាធរថ្នាក់ជាតិប៉ុណ្ណោះ ដែលអាចទប់ស្កាត់បាន។
លោកថា៖ « (ករណីដឹកជញ្ជូនឈើ) កើតឡើងតាំងពីឆ្នាំ ២០១៨ អំឡុងខែ ៥ ទៅខែ ៦។ កន្លែងហ្នឹងដូចថា យើងអត់ដែលបានដើរទៅប៉ះចំ ណា៎ ដល់យើងចុះទៅដោយសារពលរដ្ឋរាយការណ៍ហើយទៅឃើញ»។
ឆ្លើយតបនឹងបញ្ហានេះ លោក វ៉ាន់ ស៊ុយ មន្ត្រីឧទ្យានុរក្សប្រចាំឃុំធ្មាបញ្ជាក់ ថា កម្លាំងចម្រុះដែលមានទាំងមន្ត្រីនគរបាលគឺបានចុះទៅដល់ទីតាំងកាប់ឈើក្នុងតំបន់ព្រៃឡង់នោះមែន ប៉ុន្តែពេលចុះទៅដល់គឺក្រុមជនល្មើសបានដឹងខ្លួន ជាមុនដោយសារបែកការពីពលរដ្ឋ។
លោកថា៖ «នៅពេលពួកយើងចុះទៅវាស្ងាត់ជ្រងំនៅពេលដកមកវិញពួកវា (ជនកាប់ឈើ) បានធ្វើការវិញអ៊ីចឹងណា៎ វាពិបាកអ៊ីចឹង។ នៅពេលទៅដល់កន្លែងហ្នឹងពិតជាកន្លែងកាប់មែន តែគេជញ្ជូនចេញអស់ហើយ ដល់ពេលឱ្យជួបអាជនប្រព្រឹត្តហ្នឹងគឺអត់ជួបទេ។ ធម្មតាកាលណាយើងចេញទៅពលរដ្ឋខ្លះស្រឡាញ់ធនធានធម្មជាតិគាត់ជួយការពារយើង ប៉ុន្តែពលរដ្ឋខ្លះអត់ជួយការពារយើងទេ ដល់ពេលយើងចុះទៅ គាត់ប្រាប់តៗគ្នាទៅ មានពលរដ្ឋខ្លះគាត់ជាអ្នកបំផ្លាញដែរហ្នឹងណា៎»។
លោក ស៊ុយ បញ្ជាក់ថា បច្ចុប្បន្នដោយសារកម្លាំងចុះការពារព្រៃមិនគ្រប់ ទើបធ្វើឱ្យជនល្មើសនៅតែអាចប្រព្រឹត្តការកាប់ព្រៃបែបនេះ។
រីឯលោក សុង ច័ន្ទសុជាតិ ប្រធានមន្ទីរបរិស្ថានខេត្តព្រះវិហារបញ្ជាក់ថា លោកមិនទាន់ដឹងអំពីករណីនេះទេ ព្រោះតំបន់ព្រៃឡង់ក៏មានករណីកាប់ព្រៃឈើនៅតំបន់ផ្សេងដែរ។
លោក មាស ញឹម ប្រធានការិយាល័យដែនជម្រកសត្វព្រៃបឹងពែរ បានអះអាងថា តំបន់មានកាប់ឈើនេះគឺស្ថិតនៅក្នុងតំបន់ដែនជម្រកសត្វព្រៃតែម្ដង ហើយកន្លងមក ខាងលោកក៏ធ្លាប់បង្ក្រាបករណីបញ្ជូនទៅតុលាការខ្លះដែរ។ លោកបន្តថា ករណីកាប់ឈើក្នុងភូមិធ្មានេះ គឺមានអ្នកកាប់មួយចំនួនជាពលរដ្ឋក្នុងភូមិតែម្ដង ដោយសារតែមានឈ្មួញមានលុយពីខាងក្រៅចាំទទួលទិញ។
លោកបានបញ្ជាក់ថា៖ «ជាង ១០ ម៉ឺនហិកតាហើយមនុស្សមានតែ ១០ នាក់ អ៊ីចឹងបើយើងចង់បង្ក្រាបឱ្យគ្រប់តែម្ដង គឺទាល់តែមនុស្សទាំងអស់បុកចូលកន្លែងហ្នឹងហើយឈរប្រចាំការចាំចាប់កន្លែងហ្នឹងតែម្ដង។ អ៊ីចឹងព័ត៌មានបទល្មើសកើតឡើងមិនមែនតែម៉ាកន្លែងទេ ដូចថា នៅកន្លែង A កន្លែង B និងកន្លែង C អ៊ីចឹងនៅពេលយើងទៅកន្លែង A វាដកអស់ ទៅកន្លែង B ទៀត»។
លោក អាង ជាតិឡោម នាយកប្រតិបត្តិអង្គការពន្លកខ្មែរខេត្តព្រះវិហារលើកឡើងថា បទល្មើសព្រៃនៅតំបន់ព្រៃឡង់គឺកើតឡើងស្ទើរជារៀងរាល់ថ្ងៃ ហើយការបង្ក្រាបរបស់កម្លាំងសមត្ថកិច្ចកន្លងមក គឺបានត្រឹមតែធ្វើឱ្យជនល្មើសស្ងប់ស្ងាត់មួយរយៈពេលខ្លីប៉ុណ្ណោះ។
លោកថា៖ «មន្ត្រីអនុវត្តច្បាប់ហ្នឹង គាត់ប្រយុទ្ធប្រឆាំងមែនទែន ចាប់មែនទែន ហើយមន្ត្រីរដ្ឋាភិបាលហ្នឹងត្រូវតែយកច្បាប់ជាធំមិនត្រូវមានការយោគយល់ទេ»៕
