The Phnom Penh Post Search

Search form




Logo of Phnom Penh Post newspaper Phnom Penh Post - បន្ត​ឃុំ​ខ្លួន​អ្នក​ធ្វើ​យុទ្ធនាការ​ ខណៈ​ជនបរទេស​ឃាត់​សួរ

បន្ត​ឃុំ​ខ្លួន​អ្នក​ធ្វើ​យុទ្ធនាការ​ ខណៈ​ជនបរទេស​ឃាត់​សួរ

ជនបរទេស​ជាតិ​អេស្ប៉ាញ​ពេល​សមត្ថកិច្ច​ឃាត់​ខ្លួន​បញ្ជូន​ទៅ​ក្រសួង​មហា​ផ្ទៃ​ពី​ម្សិលមិញ។
ជនបរទេស​ជាតិ​អេស្ប៉ាញ​ពេល​សមត្ថកិច្ច​ឃាត់​ខ្លួន​បញ្ជូន​ទៅ​ក្រសួង​មហា​ផ្ទៃ​ពី​ម្សិលមិញ។ ផា លីណា

បន្ត​ឃុំ​ខ្លួន​អ្នក​ធ្វើ​យុទ្ធនាការ​ ខណៈ​ជនបរទេស​ឃាត់​សួរ

ភ្នំពេញៈ អ្នកស្រី​ ទេព វន្នី និង​អ្នកស្រី ប៊ូវ សោភា ដែល​ត្រូវ​បាន​សមត្ថកិច្ច​ឆ្មក់​ចូល​ចាប់​ខ្លួន​កាលពី​ម៉ោង​ជិត ៧ យប់​ថ្ងៃ​ចន្ទ​ខណៈ​ពួកគេ​កំពុង​ប្រារព្ធ​យុទ្ធនាការ​ថ្ងៃ​ចន្ទ​ពណ៌​ខ្មៅ​មាន​ទាំង​រៀបចំ​ទីងមោង​អត់​មាន​ក្បាល​ចំនួន ៤ ដាក់​ដេក​ទន្ទឹម​គ្នា​ដោយ​សរសេរ​ថា​មន្ត្រី​រលួយ តុលាការ និង​ឃាតករ​ដើម្បី​ទាមទារ​ឱ្យ​ដោះលែង​មន្ត្រី​សិទ្ធិ​មនុស្ស និង​ស្វែងរក​អ្នក​នៅ​ពី​ក្រោយ​ឃាតកម្ម​លើ​លោក​បណ្ឌិត កែម ឡី នោះ​រហូត​មក​ទល់​ព្រលប់​ល្ងាច​មិញ​នៅ​មិន​ទាន់​ត្រូវ​បាន​ដោះលែង​មក​វិញ​ទេ​ប៉ុន្តែ​ថែម​ទាំង​បាន​ឃាត់​ខ្លួន​ស្ត្រី​ជនបរទេស​ម្នាក់​ទៀត​យក​ទៅ​សួរ​នាំ​ផង​ដែរ​។ នេះ​បើ​តាម​សាច់ញាតិ​អ្នកស្រី ទេព វន្នី​។

អ្នកស្រី ហួត ចាន់សុវណ្ណ ត្រូវ​ជា​បងស្រី​អ្នកស្រី​ ទេព វន្នី ថ្លែង​ថា​គាត់​បាន​ចូល​ជួប​ប្អូនស្រី​បាន​ចំនួន​ពីរ​ដង​ដោយ​មាន​ទាំង​ការ​យក​ថ្នាំ​បំបាត់​រាក និង​ថ្នាំ​ឈឺ​ក្រពះ​ឱ្យ​អ្នកស្រី ទេព វន្នី ដែល​កំពុង​មាន​ជំងឺ​ប្រចាំ​កាយ​ផង​តែ​មិន​ទាន់​ដឹង​ថា​ដោះ​លែង​ឬ​យ៉ាង​ណា​ទេ។

យ៉ាង​ណា​ក៏ដោយ​អ្នកស្រី​យល់​ថា​ការ​ឃាត់​ខ្លួន​លើក​នេះ​អាច​បណ្តាល​ពី​សហគមន៍​ស្រី្ត​បឹងកក់​បាន​ធ្វើ​រូប​ទីមោង​អត់​ក្បាល​ដោយ​បាន​ប្រៀបធៀប​ទៅ​នឹង​តុលាការ​គ្មាន​យុត្តិធម៌។

អ្នកស្រី​ថា៖ «លើក​នេះ​គាត់​ធ្វើ​ទីមោង​កាត់​ក្បាល​គេ​ប្រហែល​គិត​ថា​ប៉ះពាល់​ដល់​ពួកគាត់​បាន​ជា​ចាប់​អ៊ីចឹង​ព្រោះ​មាន​បាច​អំបិល​ម្ទេស និង​ដាក់​បណ្តាសា​ដល់​តុលាការ​ថា​អយុត្តិធម៌​មិន​ដោះលែង​មន្ត្រី​សិទ្ធិ​មនុស្ស»។

កញ្ញា សុង ស្រីលាភ ដែល​ត្រូវ​ជា​មិត្ត​ជិតស្និទ្ធ​នឹង​សកម្មជន​ដែល​ត្រូវ​ឃាត់​ខ្លួន​បាន​ប្រាប់​ភ្នំពេញ​ប៉ុស្តិ៍​ថា​សមត្ថកិច្ច​នឹង​ចាប់​ខ្លួន​សកម្មជន​ដីធ្លី​បឹងកក់​បន្ថែម​ទៀត។ នេះ​បើ​តាម​ការ​អះអាង​របស់​គាត់​នៅ​ពេល​ជួប​ជាមួយ​អ្នកស្រី ទេព វន្នី។

អ្នកស្រី​បញ្ជាក់​ថា៖ «បង​ វន្នី គាត់​ប្រាប់​មក​ពួក​ខ្ញុំ​ថា​គេ​នឹង​មាន​ការ​ចាប់​ខ្លួន​តំណាង​សហគមន៍​បឹងកក់​បន្ត​ទៀត​ប៉ុន្តែ​មិន​ដឹង​គេ​ចាប់​តាម​របៀប​ណា​ទេ»។

ស្រប​ពេល​ដែល​ពលរដ្ឋ​រងគ្រោះ​ដីធ្លី​ប្រមាណ ២០ នាក់​ស្រែក​ទាមទារ​ឱ្យ​ដោះលែង​អ្នក​ទាំង​ពីរ​នៅ​អធិការដ្ឋាន​ខណ្ឌ​ដូនពេញ​កាលពី​ម្សិលមិញ​នោះ​សមត្ថកិច្ច​ក៏​បាន​ឃាត់​ខ្លួន​ស្រី្ត​ជនបរទេស​ជា​អ្នក​ស្រាវជ្រាវ​ជាតិ​អេស្ប៉ាញ​ម្នាក់​ទៀត​គឺ​កញ្ញា Marga Bujosa Segado រួច​បាន​បញ្ជូន​ទៅ​នាយកដ្ឋាន​អន្តោប្រវេសន៍​នៃ​ក្រសួង​មហាផ្ទៃ​ដោយ​អះអាង​ថា​ដើម្បី​មើល​លិខិត​ឆ្លង​ដែន។

ប្រធាន​នាយកដ្ឋាន​ស៊ើប​អង្កេត​ និង​អនុវត្ត​នីតិវិធី​នៃ​អគ្គនាយកដ្ឋាន​អន្តោប្រវេសន៍​ក្រសួង​មហាផ្ទៃ​លោក អ៊ុក ហៃសីឡា បាន​ថ្លែង​ថា​ជនបរទេស​រូប​នោះ​ត្រូវ​បាន​ឱ្យ​ត្រឡប់​ទៅ​វិញ​នៅ​ម៉ោង ៤ និង​ ៣០ នាទី​ល្ងាច​បន្ទាប់ពី​រកឃើញ​ថា​រស់នៅ​ស្រប​ច្បាប់។

លោក​ថា៖ «ដំបូង​យើង​ឃើញ​គាត់​អត់​មាន​លិខិត​ឆ្លងដែន​ជាប់​ខ្លួន​ទើប​យក​គាត់​មក​សួរ​នាំ​បន្ទាប់​មក​មិត្តភក្តិ​គាត់​យក​លិខិត​ឆ្លងដែន​មក​បង្ហាញ​ហើយ​មាន​ទិដ្ឋាការ​ត្រឹមត្រូវ»។

ភ្នំពេញ​ប៉ុស្តិ៍​បាន​ព្យាយាម​ទាក់ទង​ជាច្រើន​ដង​ទៅ​អធិការ​ខណ្ឌ​ដូនពេញ​លោក ហួត ចាន់យ៉ារ៉ាន់ ដើម្បី​សុំ​ការ​អត្ថាធិប្បាយ​ដែរ​តែ​លោក​ថា​ជាប់​រវល់​រហូត​ដល់​ត្រឹម​ម៉ោង​ ៧ ​យប់​។

ចំណែក​អ្នក​នាំពាក្យ​ក្រសួង​មហាផ្ទៃ​លោក ខៀវ សុភ័គ ថ្លែង​ថា​មិន​ជាប់​ពាក់ព័ន្ធ​នឹង​រឿង​នេះ​ទេ។ តែ​លោក​ថា​៖ «អាជ្ញាធរ​មូលដ្ឋាន​ឃាត់​គាត់​ច្រើន​ដង​ហើយ​ដដែលៗ​ យូរៗ ​គេ​បញ្ជូន​ទៅ​តុលាការ​ម្តង​ហើយ​ល្មម​គេ​ធុញ​ដែរ​ព្រោះ​​អ្នក​ធ្វើ​បាតុកម្ម​មុខ​ដដែលៗ​ជាពិសេស​បងស្រី ទេព វន្នី ​អ៊ីចឹង​គេ​ហៅ​ទៅ​សួរ​នាំ​ហើយ​ព្រោះ​ប្រទេស​មាន​ច្បាប់​»​។

រីឯ​អ្នក​នាំ​ពាក្យ​សាលា​រាជធានី​ភ្នំពេញ​លោក មាន ចាន់យ៉ាដា ប្រាប់​ភ្នំពេញ​ប៉ុស្តិ៍​ថា​ប៉ូលិស​កំពុង​ធ្វើការ​រឿង​នេះ​តែ​លោក​មិន​អត្ថាធិប្បាយ​ឱ្យ​ចំ​ថា​នឹង​បញ្ជូន​សកម្មជន​ដីធ្លី​ទៅ​តុលាការ​នោះ​ទេ។

នៅ​ពេល​សួរ​ថា​សារព័ត៌មាន​ក្នុង​ស្រុក​ចុះ​ផ្សាយ​ថា​អធិការ​ខណ្ឌ​នឹង​បញ្ជូន​ពួកគាត់​ទៅ​តុលាការ​នោះ​លោក មាន ចាន់យ៉ាដា ឆ្លើយ​ថា៖ «ព័ត៌មាន​ហ្នឹង​មាន​អី បើ​ដឹង​អ៊ីចឹង​គឺ​អ៊ីចឹង​ហើយ»​។

តែ​លោក​សង្កត់​ធ្ងន់​ថា​ការ​ឃាត់​ខ្លួន​នា​ពេល​នេះ​ដោយសារ​ពួកគាត់​ផ្គើន​នឹង​បម្រាម​របស់​រដ្ឋាភិបាល​ដែល​ហាម​មិន​ឱ្យ​មាន​យុទ្ធនាការ​ថ្ងៃ​ចន្ទ​ពណ៌​ខ្មៅ។ លោក​ថា៖ «ទោះបី​ជា​គាត់​មាន​កិច្ចសន្យា​​អប់រំ​ជាច្រើន​លើក​ច្រើន​សា​ជាមួយ​អាជ្ញាធរ​ថា​ឈប់​ធ្វើ​សកម្មភាព​នេះ​តែ​គាត់​នៅ​តែ​ធ្វើ​ដដែល​»។​​

លោក​បន្ថែម​ថា​មូលហេតុ​ដែល​សមត្ថកិច្ច​មិន​ឃាត់​ខ្លួន​ពួកគាត់​មួយ​រយៈ​មក​នេះ​គឺ​ចង់​បង្ហាញ​ពី​ភាព​ទន់ភ្លន់​របស់​អាជ្ញាធរ​ដែល​ចង់​ឱ្យ​គាត់​កែ​ខ្លួន​ «បើ​សិន​យើង​ធ្វើ​ភ្លាម​ថា​អាជ្ញាធរ​ប្រើ​ហិង្សា​តែ​យើង​បាន​ប្រើ​វិធានការ​អប់រំ​តែ​នៅ​ធ្វើ​ដដែលៗ​អ៊ីចឹង​មាន​ន័យ​ថា​បំពាន​គោលការណ៍​ច្បាប់​»។

ប៉ុន្តែ​ប្រធាន​បចេ្ចកទេស​ស៊ើប​អង្កេត​នៃ​អង្គការ​សិទ្ធិ​មនុស្ស​លីកាដូ​លោក អំ សំអាត បាន​មើល​ឃើញ​ថា​រដ្ឋាភិបាល​នឹង​ខាតបង់​ច្រើន​ប្រសិន​បើ​មាន​ការ​ឃុំ​ខ្លួន​ស្ត្រី​សកម្មជន​ទាំង​នោះ។

លោក​ថា៖​ «បើ​សិន​ជា​រឿង​នេះ​ត្រូវ​បាន​បញ្ចូន​ទៅ​តុលាការ ខ្ញុំ​ឃើញ​ថា​នឹង​ទទួល​រង​នូវ​ការ​រិះគន់​កាន់​តែ​ធ្ងន់ធ្ងរ​អំពី​មតិ​ជាតិ និង​អន្តរជាតិ​ហើយ​កន្លង​មក​យើង​ឃើញ​ថា​មាន​ភាព​ចម្រូង​ចម្រាស​ជាមួយ​ប្រទេស​ម្ចាស់​ជំនួយ​នៅ​សហគមន៍ អឺរ៉ុប សហរដ្ឋ​អាមេរិក អ៊ីចឹង​ខ្ញុំ​គិត​ថា​វា​មិន​ចំណេញ​ទេ និង​ធ្វើ​ឱ្យ​ប៉ះពាល់​ដល់​មុខមាត់​រដ្ឋាភិបាល​កាន់តែ​ធ្ងន់ធ្ងរ»។

យ៉ាង​ណា​ក៏ដោយ​ លោក​ថា​ បើ​គ្រាន់​តែ​ពួកគាត់​ប្រារព្ធ​យុទ្ធនាការ​ថ្ងៃ​ចន្ទ​ពណ៌​ខ្មៅ​នៅ​តាម​មូលដ្ឋាន​របស់​ខ្លួន​ដោយ​មិន​ហែ​ក្បួន​តែ​ត្រូវ​បាន​អាជ្ញាធរ​ហាមឃាត់​ទៀត​នោះ​នឹង​ធ្វើ​ឱ្យ​សិទ្ធិ​សេរីភាព​នៃ​ការ​បញ្ចេញ​មតិ​កាន់​តែ​ចង្អៀត​ទៅ​ហើយ៕

អត្ថបទគួរចាប់អារម្មណ៍