កណ្ដាលៈ បន្ទាប់ពីកម្មករប្រមាណ ១៧៣ នាក់ នៃរោងចក្រសិប្បកម្ម តម្បាញតេវ៉ៃ ស្ថិតក្នុងភូមិទួលសាលា ឃុំស្អាងភ្នំ ស្រុកស្អាង បានផ្ទុះការតវ៉ា បិទផ្លូវរថយន្ដដឹកអីវ៉ាន់ចេញពីរោងចក្រ ដោយសារតែថៅកែរោងចក្រ មិនទាន់បានបើកប្រាក់ខែឲ្យហើយបម្រុងដឹកអីវ៉ាន់ចេញ ថៅកែរោងចក្រ បានយល់ព្រមបើកប្រាក់ខែឲ្យកម្មករវិញ បន្ទាប់ពីមានការសម្របសម្រួលពីអាជ្ញាធរ។
លោក អឿន ប៉េងអាន អធិការងស្រុកស្អាង បានប្រាប់ភ្នំពេញបុស្ដិ៍នៅថ្ងៃទី ៩ ខែសីហាថា មូលហេតុដែលឈានដល់កម្មករ ផ្ទុះការតវ៉ា និងបិទផ្លូវ គឺបណ្ដាលមកពីកម្មករបានឮថា រោងចក្រក្ស័យធន ហើយថៅកែប្រុងដឹកអីវ៉ាន់ចេញទៅ ដោយមិនបើកប្រាក់ឈ្នួលឲ្យកម្មករ។
លោកថ្លែងថា៖«កម្មករគាត់គិតថា រោងចក្រ ក្ស័យធន ផ្អើលថា គាត់(ម្ចាស់រោងចក្រ) នឹងឈប់ធ្វើការរកស៊ី ក៏ផ្អើលរឿងដឹកខោអាវ ចេញពីរោងចក្រនឹង ដោយមិនឲ្យលុយ គេចពីលុយបើកប្រាក់ខែរវាងកម្មករអីហ្នឹង»។
លោកបានឲ្យដឹងថា រឿងនេះដោយសារថៅកែបានដឹកអីវ៉ាន់ចេញពីរោងចក្រ យកទៅលក់បន្ដឲ្យរោងចក្រមួយទៀតនៅព្រែកហូរ ប៉ុន្ដែព្រោះតែមានរឿងដែលកម្មករតវ៉ាបែបនេះ ទើបរោងចក្រនៅព្រែកហូរមិនទាន់ទិញអីវ៉ាន់ដែលដឹកចេញពីរោងចក្រនោះទេ ដោយឲ្យរោងចក្រ ចែស៊ីង បើកប្រាក់ខែ ឲ្យកម្មករសិន។
លោកថា៖«ថៅកែរោងចក្រគាត់ថា បានទាក់ទងជាមួយថៅកែក្រុមហ៊ុនធំ ដែលនៅព្រែកហូរ ដែលទទួលយកខោអាវពីគាត់ ព្រោះគាត់ជារោងចក្រដែលធ្វើខោអាវបោះទៅរោងចក្រធំនោះ»។
បើតាមលោក ប៉េងអាន រោចក្រ តម្បាញតេវ៉ៃ ជារោងចក្រសិប្បកម្ម ផលិតខោអាវចម្រុះ និងមានបុគ្គលិកសរុប ១៧៣ នាក់ដែលមានទីតាំងស្ថិតនៅក្នុងស្រុកស្អាងនេះ ប៉ុន្ដែរោងចក្រនេះ មានសាខាផ្សេងទៀត នៅក្នុងស្រុកស្អាងនេះដែរ។
លោកថា៖«រោងចក្រនឹងមាន ៣សាខា តែនៅជិតៗនឹងដែរទេ ហើយឃ្លាំងស្ថិតនៅភូមិទួលសាលានេះ គឺផុតកុងត្រាជួលហើយ ត្រូវឈប់ជួល អ៊ីចឹងឲ្យកម្មករ ដែលចង់នៅបន្ដធ្វើការជាមួយគាត់អាចនៅធ្វើបន្ដជាមួយគាត់ទៀតបាន ឬទៅធ្វើការនៅរោងចក្រផ្សេងក៏បាន»។
លោក ប៉េងអាន បានឲ្យដឹងថា បន្ទាប់ពីមានការសម្របសម្រួលពីអាជ្ញាធរ កាលពីល្ងាចថ្ងៃពុធ មកដល់ព្រឹកថ្ងៃព្រហស្បតិ៍ម្សិលមិញ ម្ចាស់រោងចក្រ បានយល់ព្រមបើកប្រាក់ខែដល់កម្មករទាំង ១៧៣ នាក់នោះហើយ។
លោកថ្លែងថា៖«ឥឡូវហ្នឹងដំណោះស្រាយគឺបានដោះស្រាយរួចអស់ហើយ គឺបានបើកប្រាក់ខែឲ្យកម្មករទាំង ១៧៣ នាក់នោះហើយ នាព្រឹកថ្ងៃព្រហស្បតិ៍ និងមិនមានប៉ះពាល់អ្វីទេ»។
លោក ស វិចិត្យ មេឃុំស្ដីទី ឃុំស្អាងភ្នំ បានឲ្យដឹងដែរថា គិតត្រឹមព្រឹកថ្ងៃទី ៩ ខែសីហា មានកម្មករប្រហែលជាង៥០ នាក់ ដែលមិនទាន់បានបើកប្រាក់ខែ ព្រោះមិនបានមកធ្វើការ កាលពីល្ងាចថ្ងៃទី៨ខែសីហា ដូច្នេះប្រាក់ខែទាំងអស់ទើបបានបើកបង្ហើយនៅព្រឹកថ្ងៃទី ៩ ខែសីហា។
លោកបន្ថែមថា៖«យើងបានជួយសម្រួលដល់ភាគីរោងចក្រ ឲ្យបើកប្រាក់ខែ ដល់កម្មករគ្រប់គ្នាអស់ហើយ គិតត្រឹមព្រឹកថ្ងៃព្រហស្បតិ៍នេះ។ យើងក៏បានជួយពិនិត្យលើការបញ្ចប់កុងត្រាជួលឃ្លាំង សម្រាប់ឲ្យរោងចក្រនេះ បើកជាមួយម្ចាស់ឃ្លាំងដែរ ហើយថ្ងៃមិញ ម្ចាស់រោងចក្រ គេបានដឹកម៉ាស៊ីន និងអីវ៉ាន់គេចេញទៅអស់ហើយ»។
កម្មការិនី ម្នាក់ ឈ្មោះ ចិន្ដា ដែលបានចូលរួមធ្វើការតវ៉ា កាលពីថ្ងៃពុធដើម្បីទាមទាប្រាក់ខែ ដែលថៅកែ មិនទាន់បើកឲ្យ បានប្រាប់ភ្នំពេញបុស្ដិ៍កាលពីល្ងាចម្សិលមិញថា រោងចក្រដែលនាងកំពុងធ្វើការនេះ មានការពិបាកចំពោះការបើកប្រាក់ខែ ខណៈដែលនាងទើបតែទទួលបានប្រាក់ខែជាង ១០០ ដុល្លារប៉ុណ្ណោះ។
ចិន្ដានិយាយថា៖«ប៉ុន្ដែមកដល់ព្រឹកថ្ងៃព្រហស្បតិ៍នឹង ខ្ញុំបានបើកប្រាក់ខែអស់ហើយ ឥឡូវខ្ញុំទៅធ្វើការនៅរោងចក្រផ្សេងហើយ»។
ចិន្តា ដែលមានស្រុកកំណើតនៅខេត្តព្រៃវែងបាននិយាយថា៖«ពួកខ្ញុំនាំគ្នាតវ៉ា ព្រោះឃើញថៅកែរោងចក្របានរើអីវ៉ាន់ចេញអស់ ហើយឮគេប្រាប់ថា គាត់ប្រុងរត់ អត់បើកប្រាក់ខែឲ្យ»៕