កណ្ដាល និងកំពតៈ បន្លែ និងផ្លែឈើប្រមាណ ៦ តោនដែលនាំចូលពីប្រទេសវៀតណាម ត្រូវបានកម្លាំងសមត្ថកិច្ចគយ និងរដ្ឋាករចល័ត ខេត្តកណ្ដាល និងខេត្តកំពតចាប់ដកហូតយកទៅដុតបំផ្លាញចោល បន្ទាប់ពីរកឃើញមានផ្ទុកកំណកសារធាតុថ្នាំពុលកសិកម្ម ដែលធ្វើឲ្យប៉ះពាល់ដល់សុខភាព និងអាយុជីវិតអ្នកបរិភោគ។ មន្ត្រីបានឲ្យដឹងថា បន្លែជាង ៥ តោនបានរឹបអូសនៅច្រកអន្តរជាតិជ្រៃធំ និងផ្លែឈើ ៥០០ គីឡូក្រាមត្រូវបានរឹបអូសនៅក្នុងខេត្តកំពតដែលបន្លែ និងផ្លែឈើទាំងនោះត្រូវបាននាំចូលពីវៀតណាម។
លោក មួង ដារ៉ា ប្រធានក្រុមការងារគយចល័តច្រកទ្វារអន្តរជាតិជ្រៃធំ ដែលមានទីតាំងស្ថិតនៅក្នុងស្រុកកោះធំ ខេត្តកណ្ដាលបានប្រាប់ភ្នំពេញប៉ុស្តិ៍ថា កាលពីថ្ងៃទី ១៧ មិថុនា ក្រុមការងាររបស់លោកបានរកឃើញបន្លែជាង ៥ តោនមានផ្ទុកកំណកសារធាតុថ្នាំពុលកសិកម្មត្រូវបានគេដឹកនាំចូលពីប្រទេសវៀតណាមតាមរថយន្តកាំមីញ៉ុងចំនួន ១០ គ្រឿង។ បន្លែទាំងនោះសុទ្ធសឹងជាប្រភេទបន្លែដែលត្រូវបានហាមឃាត់ការនាំចូល។
កាលពីថ្ងៃទី ១៥ មិថុនា សមត្ថកិច្ចគយ និងរដ្ឋាករចល័ត រួមសហការជាមួយកម្លាំងសមត្ថកិច្ចសាខាកាំកុងត្រូល ខេត្តកណ្ដាលបានដាក់បម្រាមនាំចូលបន្លែ ៦ មុខពីប្រទេសវៀតណាមរួមមាន ស្ពៃបូកគោ ស្លឹកគូឆាយ ក្រូចឆ្មារ (សម្រាប់ធ្វើតែជ្រក់) ផ្កាឡៃហ៊ាង ល្ពៅ និង ផ្កាខាត់ណា ដោយសារតែបន្លែទាំងនោះមានកំណកជាតិពុលនៃថ្នាំសម្លាប់សត្វល្អិតកម្រិតខ្ពស់។
លោក ដារ៉ា បានថ្លែងថា៖ «ដើម្បីការពារសុវត្ថិភាពអ្នកបរិភោគ យើងគ្រាន់តែចាប់ដកហូតយកបន្លែដែលមានសារធាតុគីមីពុលទាំងនោះមកបំផ្លាញចោល និងតម្រូវឲ្យពួកគាត់ធ្វើកិច្ចសន្យាបញ្ឈប់ការនាំចូលនូវមុខបន្លែទាំងនោះ ប៉ុន្តែបើពួកគាត់នៅតែលួចលាក់នាំចូលនូវមុខបន្លែដែលហាមឃាត់ទាំងនោះទៀត យើងនឹងចាប់ឃាត់ខ្លួនពួកគាត់ ហើយកសាងសំណុំរឿងបញ្ជូនទៅតុលាការចាត់វិធានការបន្តទៅតាមនីវិធីច្បាប់»។
លោក យី ថុល ប្រធានការិយាល័យគយ និងរដ្ឋាករប្រចាំច្រកទ្វារអន្តរជាតិព្រែកចាក ខេត្តកំពតបានឲ្យដឹងថាកាលពីថ្ងៃទី ១៦ មិថុនា សមត្ថកិច្ចគយចល័ត និងសមត្ថកិច្ចកាំកុងត្រូលខេត្តកំពតបានសហការគ្នាចុះត្រួតពិនិត្យគុណភាពទំនិញនាំចូលពីប្រទេសវៀតណាមតាមច្រកអន្តរជាតិព្រែកចាក ស្រុកកំពង់ត្រាច ហើយបានរកឃើញ និងចាប់រឹបអូសផ្លែគូលែនចំនួន ៥០០ គីឡូក្រាម ដែលមានផ្ទុកកំណកសារធាតុថ្នាំគីមីពុលកសិកម្មយកទៅដុតបំផ្លាញចោល និងបានចេញបម្រាមហាមឃាត់ការនាំចូលនូវមុខទំនិញនេះ៕