ព្រះសីហនុៈ ជនបរទេស និងខ្មែរចំនួន ៥៣ នាក់ត្រូវបានចាប់ខ្លួនកាលពីម្សិលមិញនៅក្នុងសង្កាត់លេខ ៤ ក្រុងព្រះសីហនុពេលកំពុងប្រព្រឹត្តបទល្មើស ជួញដូរ និងប្រើប្រាស់គ្រឿងញៀននៅក្នុងរង្គសាលស្កាយឡាញ ១ កន្លែង។
លោក ស៊ុន សុផាត ស្នងការរងនគរបាលខេត្តព្រះសីហនុបានថ្លែងថា ជនបរទេសដែលត្រូវបានចាប់ខ្លួននៅក្នុងប្រតិបត្តិការខាងលើរួមមានជនជាតិចិន ១០ នាក់ ឥណ្ឌូនេស៊ី ១៧ នាក់ និងជនជាតិកូរ៉េ ២ នាក់ក្រៅពីនោះគឺជាពលរដ្ឋខ្មែរ ហើយពួកគេភាគច្រើនជាបុគ្គលិកដែលបម្រើការងារនៅក្នុងកាស៊ីណូហ្គោលឌិនស៊ី និងតុងហ្វាងមិនជូ។
លោក សុផាត បានថ្លែងបន្តថានៅក្នុងប្រតិបត្តិការនោះផងដែរកម្លាំងសមត្ថកិច្ចបានធ្វើការរឹបអូសវត្ថុតាងថ្នាំញៀនប្រភេទខេតាមីន (Ketamine) និង អិចស្តាស៊ី (Ecstasy) ចំនួន ២៦ កញ្ចប់ និងដបថ្នាំញៀនសម្រាប់លាយជាមួយទឹក ៤ ដប ដែលថ្នាំញៀនទាំងនោះរកឃើញនៅកៀនៗសាឡុងអង្គុយក្នុងបន្ទប់ទឹក និងទីកន្លែងផ្សេងគ្នាក្នុងរង្គសាលនោះតែម្ដង។
លោក សុផាត បានបញ្ជាក់ថា៖ «តាមរយៈលទ្ធផលនៃការធ្វើតេស្តទឹកនោម បានបង្ហាញថាពួកគេទាំងអស់គ្នាសុទ្ធតែមានផ្ទុកនូវសារធាតុញៀន ហើយនៅពេលនេះពួកគេទាំងអស់កំពុងតែស្ថិតនៅក្រោមការសាកសួរចម្លើយពីក្រុមមន្ត្រីជំនាញរបស់យើងដើម្បីរៀបចំកសាងសំណុំរឿងបញ្ជូនឲ្យតុលាការចាត់វិធានការបន្តតាមនីតិវិធីច្បាប់»។
លោកបានប្រាប់ឲ្យដឹងទៀតថា គិតត្រឹមល្ងាចថ្ងៃព្រហស្បតិ៍ម្សិលមិញនេះ សមត្ថកិច្ចទើបតែសាកសួរទៅលើពួកគេបាន ២២ នាក់ប៉ុណ្ណោះ ហើយតាមចម្លើយសារភាពរបស់ពួកគេ ភាគច្រើនជាអ្នកធ្លាប់ប្រើប្រាស់គ្រឿងញៀន ខណៈបុរសម្នាក់ក្នុងចំណោម ២២ នាក់ដែលបានសាកសួររួចនោះ បានអះអាងថា ថ្នាំញៀនដែលគេបានប្រើប្រាស់នោះជាប្រភេទថ្នាំអិចស្តាស៊ី ដែលបានទិញពីបុរសម្នាក់នៅក្នុងរង្គសាលនេះតែម្ដង។
លោកបានបន្ថែមថា៖ «តាមរយៈចម្លើយសារភាពរបស់ជនសង្ស័យខាងលើនេះសមត្ថកិច្ចយើងក៏បានកោះអញ្ជើញលោក គ្រុយ ផាន់ណា ដែលជាម្ចាស់រង្គសាលស្កាយឡាញនោះមកធ្វើការសាកសួរផងដែរ ដែលមកទល់ពេលនេះយើងនៅពុំទាន់បញ្ចប់ការសាកសួរនៅឡើយទេ»។
នៅព្រឹកថ្ងៃព្រហស្បតិ៍ម្សិលមិញនេះផងដែរលោក លឹម ប៊ុនហេង ព្រះរាជអាជ្ញារងអមសាលាដំបូងខេត្តព្រះសីហនុដែលបានសហការចូលរួមដឹកនាំនៅក្នុងប្រតិបត្តិការនេះបានសម្រេចបិទរង្គសាលស្កាយឡាញនេះជាបណ្ដោះអាសន្នដើម្បីបន្តធ្វើការស្រាវជ្រាវតាមនីតិវិធីច្បាប់៕