.jpg)
ទិដ្ឋភាពនៅកន្លែងរលំបាក់សាលាឆាន់ពីម្សិលមិញ។ រូបថត សហការី
សៀមរាបៈ យ៉ាងហោចណាស់មានមនុស្សចំនួន ៣ នាក់បានស្លាប់ និងជាង ១០ នាក់ផ្សេងទៀតបានរងរបួសធ្ងន់-ស្រាល ដោយសារការរលំបាក់ប្លង់សេសាលាឆាន់ដែលកំពុងសាងសង់នៅវត្តប្រាសាទគោកចកស្ថិតក្នុងសង្កាត់គោកចក ក្រុងសៀមរាបកាលពីរសៀលម្សិលមិញ។
លោក ទិត្យ ណារ៉ុង ស្នងការខេត្តសៀមរាបបានប្រាប់ភ្នំពេញ-ប៉ុស្តិ៍ថា គិតមកដល់វេលាម៉ោង ៦ ល្ងាចម្សិលមិញ ក្រុមអ្នកជួយសង្គ្រោះដែលមានកម្លាំងកងរាជអាវុធហត្ថ ទាហាន នគរបាលខេត្ត និងពលរដ្ឋបានរកឃើញជនរងគ្រោះចំនួន ១៦ នាក់ក្នុងគំនរដែក និងថ្មនៃសាលាឆាន់ដែលបាក់រលំនោះ ហើយក្នុងនោះមាន ៣ នាក់ស្លាប់ និងអ្នកដែលរងរបួសធ្ងន់-ស្រាលចំនួន ១៣ នាក់គឺមានព្រះសង្ឃចំនួន ២ អង្គ និងមេការសំណង់ម្នាក់។
លោកបញ្ជាក់ថា៖ «មូលហេតុដែលបាក់ហ្នឹងដោយសារសំណង់វាអត់រឹងមាំ។ សំណង់ហ្នឹងគឺកំពុងចាក់ប្លង់សេ។ យើងមិនបានឃាត់ (ខ្លួន) អីទេ ប៉ុន្តែយើងក៏បានរកមេការដែរប៉ុន្តែមេការហ្នឹងកំពុងតែសន្លប់»។ លោកបន្តថា លោកមិនទាន់ដឹងអំពីចំនួនជាក់លាក់នៃអ្នកដែលបានរងគ្រោះក្នុងគ្រោះថ្នាក់នេះនៅឡើយទេ។
នៅពេលរលំបាក់សាលាឆាន់ដែលកំពុងសាងសង់នេះគេឃើញរថយន្តពេទ្យជាច្រើនគ្រឿងត្រូវបានបញ្ជូនទៅកាន់កន្លែងកើតហេតុ ដើម្បីរង់ចាំដឹកជនរងគ្រោះទៅកាន់មន្ទីរពេទ្យ ខណៈក្រុមអ្នកជួយសង្គ្រោះ និងគ្រឿងចក្រជាច្រើនគ្រឿងបានព្យាយាមរុករកជនរងគ្រោះ។
លោក នួន ពុទ្ធារ៉ា អភិបាលក្រុងសៀមរាបថ្លែងថា លោកមិនអាចបញ្ជាក់លម្អិតអំពីករណីគ្រោះថ្នាក់នេះបានទេ ដោយសារតែកម្លាំងសមត្ថកិច្ចកំពុងចុះប្រតិបត្តិការជួយជនរងគ្រោះ។
ព្រះសង្ឃ ១ អង្គ ដែលគង់នៅវត្តប្រាសាទគោកចកដែលជាវត្តកើតមានគ្រោះថ្នាក់នេះមានសង្ឃដីកាថា សាលាឆាន់នោះគឺបានចាប់ផ្ដើមសាងសង់ រយៈពេលយូរឆ្នាំមកហើយ ដោយសសរទើបបានចាក់នៅក្នុងឆ្នាំនេះប៉ុណ្ណោះ។ ព្រះអង្គបន្តថា ករណីគ្រោះថ្នាក់នេះគឺកើតឡើងនៅអំឡុងពេលកំពុងតែចាក់ប្លង់សេ។ សាលាឆាន់នេះគឺមានកម្ពស់ ៨ ម៉ែត្រទទឹង ២០ ម៉ែត្រ និងបណ្ដោយ ២០ ម៉ែត្រដែលបានធ្លាក់សង្កត់មនុស្សចំនួន ២០ នាក់៕
