ភ្នំពេញៈ បាតុភូត El Nino នឹងធ្វើឲ្យសីតុណ្ហភាព ក្នុងបរិយាកាសនៅក្នុងប្រទេសកម្ពុជា កើនឡើងកម្តៅដល់ចន្លោះពី ៤០ ទៅ ៤២ អង្សាសេ ចាប់ពីចុងខែមីនា រហូតដល់ចុងខែឧសភា ខាងមុខ ដែលនឹងបង្កឲ្យមានភាពក្ដៅហួតហែង និងស្អុះស្អាប់ខ្លាំង នៅក្នុងក្របខ័ណ្ឌទូទាំងប្រទេស។ នេះបើតាម លោក ចាន់ យុត្ថា អ្នកនាំពាក្យក្រសួងធនធានទឹក និងឧតុនិយម បានប្រាប់ភ្នំពេញប៉ុស្តិ៍កាលពីម្សិលមិញ។
លោកយុត្ថា បានថ្លែងថា នៅពេលនេះប្រទេសកម្ពុជា មានសីតុណ្ហភាពអប្បបរមាពី ២៥ ទៅ ២៦ អង្សាសេ និងសីតុណ្ហភាពអតិបរិមា ពី ៣៣ ទៅ ៣៥ អង្សាសេ ពោលគឺកំពុងកើនឡើងកំដៅក្នុងចន្លោះពី ១ ទៅ ២ អង្សាសេ។ និន្នាការនៃការកើនឡើងសីតុណ្ហភាព ក្នុងបរិយាកាសនាពេលនេះ គឺបណ្ដាលមកពីឥទ្ធិពលខ្យល់មូសុងឦសាន ដែលធ្វើឲ្យបរិយាកាសនៅលើផ្ទៃដីគ្របដណ្តប់ដោយកម្រិតសម្ពាធទាប និង ដែលជាផ្នែកមួយនៃបាតុភូត El Nino។
លោកបញ្ជាក់ថា៖ «ចាប់ពីចុងខែមីនា ដល់ចុងខែឧសភាខាងមុខនេះ សីតុណ្ហភាពអតិបរិមានឹងកើនឡើងក្នុងរង្វង់ ៤០ ទៅ ៤២ អង្សាសេ ដែលបង្កឲ្យមានភាពក្ដៅហួតហែង និងស្អុះស្អាប់ខ្លាំង ក្នុងក្របខ័ណ្ឌទូទាំងប្រទេស។ ក្នុងរយៈពេលនេះ ភ្លៀងកក់ខែស្ទើរតែនឹងមិនអាចកើតមាននោះទេ មិនតែប៉ុណ្ណោះ បានធ្វើឲ្យមានដំណើរប្រែប្រួល នៃរដូវវស្សាក្នុងប្រទេស កម្ពុជា យើង មានភាពយឺតយ៉ាវខុសពីធម្មតា»។
ទន្ទឹមជាមួយគ្នានេះ លោកបានអំពាវនាវ ឲ្យប្រជាកសិករ ត្រូវចេះប្រើប្រាស់ទឹកដោយសន្សំសំចៃ ធ្វើយ៉ាងណាកុំបូមបាចទឹកចេញពីក្នុងស្រះ ត្រពាំង ឬតាមប្រភពដៃទន្លេ បឹងបួនានា ដើម្បីចាប់ត្រីមកបរិភោគ តែក្នុងរយៈពេលខ្លី ហើយធ្វើឲ្យមានកង្វះខាតទឹកសម្រាប់ប្រើប្រាស់ក្នុងអំឡុងពេលដែលមានគ្រោះរាំងស្ងួត កំពុងចូលមកដល់។ ពិសេសការធ្វើស្រែប្រាំងក្នុងរយៈពេល ២ ដងក្នុង ១ ឆ្នាំ គួរតែត្រូវបានបញ្ឈប់ ខណៈប្រភពទឹកសម្រាប់ស្រោចស្រពនៅមានកម្រិតនៅឡើយ។
ជាមួយគ្នានេះ លោក កែវ សុភក្ត្រា ប្រធានមន្ទីរសុខាភិបាលខេត្តបន្ទាយមានជ័យ ក៏បានលើកឡើងដែរថា ភាពស្អុះស្អាប់នៃបរិយាកាស អាចបង្កឲ្យមានជំងឺឆ្លងកើតឡើងផងដែរពិសេសជំងឺផ្លូវដង្ហើម ដែលងាយនឹងកើតមានទៅលើមនុស្សចាស់និងកុមារ ដែលទាមទារឲ្យមានការសម្អាតអនាម័យទាំងក្នុងមជ្ឈដ្ឋាននៃការរស់នៅ និងការបរិភោគចំណីអាហារប្រចាំថ្ងៃ។
លោកថ្លែងថា៖ «អាកាសធាតុក្ដៅ ស្អុះស្អាប់ ងាយនឹងកើតមានជំងឺឆ្លង ពិសេសជំងឺផ្លូវដង្ហើម ដូច្នេះ បើមិនចាំបាច់ សូមបងប្អូនប្រជាពលរដ្ឋ គប្បីកុំធ្វើដំណើរផ្លូវឆ្ងាយនៅពេលថ្ងៃ ដែលសីតុណ្ហភាពកំពុងក្ដៅខ្លាំង។ ត្រូវទទួលទានរបបអាហារឲ្យបានគ្រប់គ្រាន់និងប្រកបដោយអនាម័យស្អាត ពិសេស ត្រូវហូបទឹកឲ្យបានច្រើន»។
អាកាសធាតុក្ដៅខ្លាំង នៅលើផ្ទៃដី និងលើមហាសមុទ្រនេះត្រូវបានអ្នកជំនាញនិយាយថា បានកើតមានឡើងចាប់តាំងពីឆ្នាំ ២០១៥ មក ហើយករណីនេះ មិនមែនកើតមានតែក្នុងប្រទេសកម្ពុជានោះទេ តែវាបានកើតឡើងនៅក្នុងក្របខ័ណ្ឌទូទាំងពិភពលោក។
រដ្ឋាភិបាលកាលពីថ្ងៃទី ១៧ ខែមករាឆ្នាំ ២០១៩ បានចេញសារាចរណែនាំមួយ ស្ដីពីការចាត់វិធានការថែរក្សាទឹកទុក ដើម្បីទប់ទល់នឹងបាតុភូត អែលនីណូ ដែលបាតុភូតនេះ មិនត្រឹមតែធ្វើឲ្យអាកាសធាតុក្ដៅហួតហែងខ្លាំងប៉ុណ្ណោះទេ ប៉ុន្តែ វាក៏នឹងធ្វើឲ្យមានភ្លៀងកក់ខែតិច មានបាតុភូតផ្គរ រន្ទះ និងខ្យល់កន្ត្រាក់កើតឡើងច្រើន ហើយជាពិសេសរដូវវស្សា ក៏នឹងចូលមកដល់យឺតជាងបណ្តាឆ្នាំកន្លងទៅផងដែរ។
សារាចរណែនាំរបស់រដ្ឋាភិបាលនេះ បានដាក់ចេញនូវវិធានការមួយចំនួនដូចជា៖ ទី១. ការងារបង្កបង្កើនផលស្រូវប្រាំង ក្នុងឆ្នាំ ២០១៩ នេះ គឺអាចធ្វើបានតែ ១ ដងប៉ុណ្ណោះ ដោយមិនអាចធ្វើស្រូវប្រាំងលើកទី២ បានទេ បើទោះបីជាទឹកនៅតាមបណ្តាអាងដែលបានរក្សាទុក និងកន្លែងមួយចំនួន ដែលមានទឹកជាធម្មជាតិក្តី ដោយគួរតែរក្សាទឹកទាំងនោះទុក សម្រាប់ប្រើប្រាស់ប្រចាំថ្ងៃ និងការដាំដំណាំរួមផ្សំផ្សេងទៀតក្រៅពី ស្រូវ។ ទី២. ក្រសួងស្ថាប័នពាក់ព័ន្ធអាជ្ញាធរដែនដីគ្រប់លំដាប់ថ្នាក់ ត្រូវចូលរួមចាត់វិធានការ ថែរក្សាទឹកទុកឲ្យបានល្អ ដើម្បីផ្គត់ផ្គង់ការប្រើប្រាស់ប្រចាំថ្ងៃ រហូតដល់ពេលមានភ្លៀងធ្លាក់ ជាធម្មតាឡើងវិញ និងទី៣. ក្រសួង ស្ថាប័នពាក់ព័ន្ធ អាជ្ញាធរដែនដីគ្រប់លំដាប់ថ្នាក់ ត្រូវត្រៀមលក្ខណៈជួយសង្គ្រោះ ប្រជាពលរដ្ឋដោយគ្រោះធម្មជាតិ នានាដូចជាខ្យល់កន្ត្រាក់ជាដើម៕