សៀមរាម: អាជ្ញាធរជាតិអប្សរាបានហាមជាបណ្ដោះអាសន្នការទៅទស្សនាថ្ងៃលិចនៅលើបរិវេណប្រាសាទប្រែរូបចាប់ពីថ្ងៃស្អែកទៅ ដោយសាររចនាសម្ព័ន្ធប្រាសាទនេះមានហានិភ័យជាក់ស្ដែងមួយចំនួនដែលអាចបង្កគ្រោះថ្នាក់ដល់ភ្ញៀវទេសចរជាយថាហេតុ។
តាមសេចក្ដីជូនដំណឹងចុះថ្ងៃទី ២៦ សីហា ដែលភ្នំពេញប៉ុស្ដិ៍ទទួលពីម្សិលមិញ អាជ្ញាធរជាតិអប្សរាបានជម្រាបដល់ក្រសួង ស្ថាប័នជាតិអន្តរជាតិ អាជ្ញាធរដែនដី មន្ទីរអង្គភាព សមាគមទីភ្នាក់ងារទេសចរណ៍ សមាគមមគ្គុទ្ទេសក៍ទេសចរណ៍ សមាគមដឹកជញ្ជូនភ្ញៀវទេសចរ ក្រុមហ៊ុនទេសចរណ៍ ភ្ញៀវជាតិ និងអន្តរជាតិ និងពលរដ្ឋពីស្ថានភាពហានិភ័យមួយចំនួននៃរចនាសម្ព័ន្ធប្រាសាទប្រែរូបនេះ។ ក្នុងនោះនៅបណ្ដោយកម្រាលនៃខឿនលើបង្អស់ផ្នែកខាងលិច ដែលជាទីតាំងទស្សនាថ្ងៃលិច មានកម្រាលថ្មរំកិលចេញពីទីតាំងដើមដែលអាចបង្កគ្រោះថ្នាក់ដល់ភ្ញៀវទេសចរ។
សេចក្ដីជូនដំណឹងបន្តថា ដើម្បីថែរក្សាសុវត្ថិភាពដល់ភ្ញៀវទេសចរជាតិ និងអន្តរជាតិ អាជ្ញាធរជាតិអប្សរានឹងបិទការទស្សនាថ្ងៃលិចនៅប្រាសាទប្រែរូបជាបណ្ដោះអាសន្នគិតចាប់ថ្ងៃទី ១ ខែកញ្ញា ឆ្នាំ ២០២០ តទៅរហូតដល់ចំណុចគ្រោះថ្នាក់នៃប្រាសាទជួសជុលរួចរាល់។
លោក ឡុង កុសល ប្រធាននាយកដ្ឋានផ្សព្វផ្សាយ និងជាអ្នកនាំពាក្យនៃអាជ្ញាធរជាតិអប្សរាបានថ្លែងថា ការផ្អាកភ្ញៀវទៅទស្សនាថ្ងៃលិចនេះដោយសារក្រុមការងារបច្ចេកទេសរបស់អាជ្ញាធរជាតិអប្សរាគ្រោងចុះទៅសិក្សាដើម្បីជួសជុលឆាប់ៗនេះ។ ដូច្នេះអាជ្ញាធរជាតិអប្សរាត្រូវតែប្រុងប្រយ័ត្ន ចៀសវាងការបង្កគ្រោះថ្នាក់ដល់ភ្ញៀវទេសចរ។
លោកបញ្ជាក់ថា៖ «បញ្ហាសំខាន់បំផុតគឺយើងត្រូវគិតពីសុវត្ថិភាពភ្ញៀវទេសចរ អ៊ីចឹងយើងត្រូវការបិទកន្លែងហ្នឹងសិន ដើម្បីជួសជុល ហើយក្នុងអំឡុងពេលជួសជុលគឺយើងត្រូវធ្វើយ៉ាងណាឲ្យកន្លែងនោះមានសុវត្ថិភាពខ្ពស់ ហើយក៏មិនចង់ឲ្យមានបញ្ហាណាមួយរំខានដល់កិច្ចការរបស់អ្នកជំនាញពេលជួសជុលដែរ»។
បើតាមលោក កុសល រចនាសម្ព័ន្ធប្រាសាទប្រែរូបមួយចំនួនបានបាក់បែក និងពុកផុយ។ ដូច្នេះអ្នកជំនាញរបស់អាជ្ញាធរជាតិអប្សរាត្រូវការពេលវេលាសិក្សា និងជួសជុលធ្វើឲ្យប្រសើរឡើងវិញនូវរាល់សំណង់ចាស់។ ប្រាសាទនេះធ្លាប់មានភ្ញៀវទេសចរចូលទស្សនាច្រើន ពិសេសនៅពេលថ្ងៃលិចដែលរំលេចពណ៌ទេសភាពដ៏ស្រស់ត្រកាល និងធ្វើឲ្យអ្នកទស្សនារំសាយចិត្តក្រៀមក្រំ ក៏ដូចជាធ្វើឲ្យអារម្មណ៍ស្រស់ថ្លាផងដែរ។
លោក ជា ហ៊ាងប៊ូ អាជីវករលក់ដូរនៅក្រុងសៀមរាបបានថ្លែងពីម្សិលមិញថា លោកធ្លាប់បានទៅទស្សនាថ្ងៃលិចនៅប្រាសាទប្រែរូបនេះដែរ ប៉ុន្ដែមិនបានទៅញឹកញាប់ដូចភ្នំបាខែងទេ។ នៅភ្នំបាខែងទេសភាពទីនោះគួរឲ្យចាប់អារម្មណ៍ខ្លាំង ហើយក៏មានអ្នកទៅទស្សនាថ្ងៃលិចច្រើនដែរ។
លោកបន្តថា ប្រាសាទប្រែរូបនេះពិតជាទ្រុឌទ្រោមច្រើនមែន។ ដូច្នេះអាជ្ញាធរជាតិអប្សរាគួរតែប្រញាប់ជួសជុលតាមដែលអាចធ្វើទៅបាន ព្រោះខ្លាចបង្កគ្រោះថ្នាក់ដល់ភ្ញៀវទេសចរ។
លោកថា៖ «ខ្ញុំគិតថាបើអាជ្ញាធរជាតិអប្សរាហាមឃាត់មិនឲ្យទៅទស្សនាបែបនេះ គឺក៏ល្អម្យ៉ាងដែរ ព្រោះខ្ញុំធ្លាប់ឆ្លងកាត់ទីនោះ គឺមើលទៅប្រាសាទហ្នឹងបែកបាក់ច្រើនដែរ អ៊ីចឹងគួរតែប្រញាប់ជួសជុល ព្រោះខ្លាចបង្កគ្រោះថ្នាក់ដល់ភ្ញៀវទេសចរ»។
តាមរបាយការណ៍របស់អាជ្ញាធរជាតិអប្សរាបង្ហាញថា ប្រាសាទប្រែរូបគឺជាអច្ឆរិយវត្ថុដ៏ល្អឯកមួយក្នុងចំណោមប្រាសាទនានាក្នុងរមណីយដ្ឋានអង្គរដែលត្រូវបានទទួលនូវការការពារ និងអភិរក្សកម្រិតខ្ពស់។
តាមឯកសារបុរាណវិទ្យារបស់លោក សាន ញ៉ន មន្ដ្រីអភិរក្សក្រុមប្រាសាទប្រែរូប ប្រាសាទតាសោម និងប្រាសាទមេបុណ្យបានឲ្យដឹងថា ប្រាសាទនេះមានទីតាំងនៅខាងកើតឆៀងខាងជើងស្រះស្រង់មានចម្ងាយ ៥០០ ម៉ែត្រ និងនៅទិសខាងត្បូងបារាយណ៍ខាងកើត។
របាយការណ៍បន្តថា ប្រាសាទប្រែរូបនេះត្រូវបានកសាងឡើងនៅពាក់កណ្ដាលសតវត្សរ៍ទី ១០ ក្នុងរជ្ជកាលព្រះបាទរាជេន្ទ្រវរ្ម័នទី ២ (ឆ្នាំ ៩៤៤-៩៦៨) ដើម្បីឧទ្ទិសដល់ព្រាហ្មណ៍ សាសនា ព្រះសិវៈ ក្នុងរចនាប័ទ្មប្រែរូប៕