ស្ទឹងត្រែង: រោងសិប្បកម្មកែច្នៃឈើចំនួន ១៥១ កន្លែង ក្នុងចំណោម ១៦៤ កន្លែង ក្នុងខេត្តស្ទឹងត្រែង ត្រូវបានគណៈកម្មការទប់ស្កាត់ និងបង្ក្រាបបទល្មើសធនធានធម្មជាតិថ្នាក់ជាតិ ចុះបង្ក្រាប និងតម្រូវឲ្យបិទបណ្ដោះអាសន្ន ក្រោយពីរកឃើញគ្មានច្បាប់អនុញ្ញាតត្រឹមត្រូវ ខណៈម៉ាស៊ីនកែច្នៃឈើសរុបចំនួន ៣៧ គ្រឿង ត្រូវរឹបអូស និងរថយន្តដែលបម្រើបទល្មើស ២៣ គ្រឿង ត្រូវដុតបំផ្លាញចោល។
លោក ម៉ែន គុង អ្នកនាំពាក្យសាលាខេត្តស្ទឹងត្រែងបានថ្លែងកាលពីថ្ងៃម្សិលមិញថា រោងសិប្បកម្មកែច្នៃឈើចំនួន ១៦៤ កន្លែង នៅក្នុងខេត្តស្ទឹងត្រែងត្រូវបានគណៈកម្មការទប់ស្កាត់ និងបង្ក្រាបបទល្មើសធនធានធម្មជាតិថ្នាក់ជាតិចុះត្រួតពិនិត្យក្នុងនោះរកឃើញគ្មានច្បាប់ចំនួន ១៥១ កន្លែង ខណៈមានច្បាប់តែ ១១ កន្លែងប៉ុណ្ពោះ។ លោកបន្តថា ចំពោះសម្ភារៈកែច្នៃឈើដែលរឹបអូសពីសិប្បកម្មទាំង ១៥១ កន្លែងនោះ មានម៉ាស៊ីនកែច្នៃ ៣៧ គ្រឿង ត្រូវបានរឹបអូសយកទៅស្នាក់ការរដ្ឋបាលព្រៃឈើ និងរថយន្តដែលបម្រើការឲ្យបទល្មើសចំនួន ២៣ គ្រឿង ត្រូវបានដុតបំផ្លាញ។
លោកថា៖ «ករណីខ្លះត្រូវបានបិទទាំងស្រុង និងមានករណីខ្លះយើងតម្រូវឲ្យគាត់ធ្វើកិច្ចសន្យា និងសុំច្បាប់ឡើងវិញ ដើម្បីឲ្យស្របតាមច្បាប់។ ក្រោយពីមានច្បាប់ យើងតម្រូវឲ្យគាត់ត្រូវតែគោរពតាមការណែនាំរបស់អាជ្ញាធរទាក់ទងទំហំអាជីវកម្ម ប៉ុន្ដែបើគាត់មិនព្រមគោរពតាមទេ យើងនឹងបិទបញ្ឈប់អាជីវកម្មទាំងអស់នោះតែម្ដង»។
លោក ម៉ែន គុង បន្ថែមថា ក្រៅពីនេះ អាជ្ញាធរបានចុះត្រួតពិនិត្យ និងអនុវត្តច្បាប់លើដេប៉ូលក់ឈើ (ហាងលក់ឈើ) នៅទូទាំងខេត្តស្ទឹងត្រែង ប៉ុន្ដែចំនួនឈើគឺសមត្ថកិច្ចមិនទាន់បានបញ្ចប់ការវាស់វែងទេ។ រីឯរោងសិប្បកម្មទាំងអស់នេះ សុទ្ធតែជារបស់ខ្មែរ ដែលមានទ្រង់ទ្រាយតូចធំ និងមធ្យម។
លោក អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស និងជាអ្នកនាំពាក្យគណៈកម្មការទប់ស្កាត់ និងបង្ក្រាបបទល្មើសធនធានធម្មជាតិថ្នាក់ជាតិបានថ្លែងថា រហូតមកទល់ពេលនេះមិនទាន់មានរបាយការណ៍លម្អិតជុំវិញការបង្ក្រាបបទល្មើសព្រៃឈើនោះទេ ដោយសារប៉ុន្មានថ្ងៃនេះ ថ្នាក់ដឹកនាំ គ្រាន់តែចុះត្រួតពិនិត្យសកម្មភាពការងាររបស់មន្ត្រី និងចុះស្ដាប់ការរាយការណ៍របស់ពួកគាត់ប៉ុណ្ណោះ។
លោកថា៖ «ចំណែករបាយការណ៍លម្អិត ថ្នាក់ដឹកនាំគណៈកម្មការនឹងរៀបចំកម្មវិធីប្រជុំធំមួយទៀត ដើម្បីផ្សព្វផ្សាយ ប៉ុន្ដែខ្ញុំមិនទាន់ដឹងពីពេលវេលាជាក់លាក់ទេ។ ចំណែកសកម្មភាពរបស់គណៈកម្មការទប់ស្កាត់ និងបង្ក្រាបបទល្មើសធនធានធម្មជាតិថ្នាក់ជាតិនៅតែបន្តធ្វើរហូត»។
លោក សៅ សុខា មេបញ្ជាការកងរាជអាវុធហត្ថលើផ្ទៃប្រទេស និងជាប្រធានគណៈកម្មការទប់ស្កាត់ និងបង្ក្រាបបទល្មើសធនធានធម្មជាតិថ្នាក់ជាតិបានចុះមកពិនិត្យការងារទប់ស្កាត់ និងបង្ក្រាបបទល្មើសធនធានធម្មជាតិជាបន្តបន្ទាប់ចាប់ពីខេត្តមណ្ឌលគិរី កំពង់ធំ ក្រចេះ រតនគិរី និងព្រះវិហារ។ ក្នុងនោះលោកបានចុះដល់ខេត្តស្ទឹងត្រែង កាលពី ថ្ងៃទី ៩ ខែ សីហា។
លោកបានថ្លែងក្នុងកិច្ចប្រជុំនៅខេត្តស្ទឹងត្រែងថា ទីតាំងកាប់ឈើអនាធិបតេយ្យភាគច្រើនជ្រកក្រោមស្លាកដីសម្បទានសេដ្ឋកិច្ច និងសង្គមកិច្ច ដោយជនល្មើសបានលួចកាប់ឈើពីតំបន់ព្រៃអភិរក្ស ហើយមកកែច្នៃនៅដីសម្បទាន «យើងត្រូវតែជំរុញការបង្ក្រាបឲ្យអស់គឺទាំងបទល្មើសតូច និងទ្រង់ទ្រាយធំ»។
លោក ហូ សំអុល មន្ត្រីសម្របសម្រួលផ្នែកសិទ្ធិមនុស្សនៃសមាគមការពារសិទ្ធិមនុស្សអាដហុកខេត្តស្ទឹងត្រែងបានថ្លែងថា លោកគាំទ្រចំណាត់ការនេះ នៅទូទាំងប្រទេស ខណៈនៅខេត្តស្ទឹងត្រែងបានស្ងប់ស្ងាត់បន្ដិចរឿងកាប់បំផ្លាញព្រៃឈើនេះ។
លោកបន្តថា ក្រៅពីការបង្ក្រាបបទល្មើសរឹបអូសវត្ថុតាង និងដុតបំផ្លាញរថយន្តដែលបម្រើបទល្មើសព្រៃឈើនោះ សមត្ថកិច្ចត្រូវចាត់វិធានការលើជនល្មើស និងអ្នកពាក់ព័ន្ធ។ លោកកត់សម្គាល់ឃើញថា ជនល្មើសជាឧកញ៉ាមួយចំនួនដែលតុលាការខេត្តមណ្ឌលគិរីកោះហៅនោះក៏ជាឈ្មួញរកស៊ីឈើនៅខេត្តស្ទឹងត្រែងដែរ។
លោក សំអុល បញ្ជាក់ថា៖ «យើងសំណូមពរថា បទល្មើសព្រៃឈើ ជាបទល្មើសឧក្រិដ្ឋ អ៊ីចឹងអាជ្ញាយុកាលវា ១៥ ឆ្នាំ ទើបអាចផុតអាជ្ញាយុកាល អ៊ីចឹងក្នុង ១៥ ឆ្នាំហ្នឹង ដែលពួកគាត់បានប្រព្រឹត្ត ៥ ឬ ៦ ឆ្នាំមុន គឺយើងត្រូវតែសើរើយកមកទូទាត់ឲ្យអស់។ ឧកញ៉ាផ្សេងៗទៀត ដែលធ្លាប់រកស៊ីកន្លងមក ក៏ត្រូវចូលមកទទួលទោសដូចគ្នាដែរ»៕