ព្រះសីហនុៈ ប្រធានមន្ទីរការងារខេត្តព្រះសីហនុលោក យ៉ូវ ខេមរា បានឲ្យដឹងថា បុគ្គលិកកាស៊ីណូ ហាវ ឆឹង ស្ថិតនៅភូមិ៣ សង្កាត់លេខ ៤ ក្រុង និងខេត្តព្រះសីហនុប្រមាណ ១៧០ នាក់យល់ព្រមទទួលយកប្រាក់ខែ ហើយសម្រេចចិត្តលាឈប់ពីការងារដើម្បីបញ្ចប់ការតវ៉ា ខណៈបុគ្គលិកជាង ១០០ នាក់ទៀតនៅបន្តធ្វើការងារជាធម្មតា។
ការទទួលយកដំណោះស្រាយនេះបានធ្វើឡើងកាលពីរសៀលថ្ងៃទី ២៥ មីនា បន្ទាប់ពីបុគ្គលិកកាស៊ីណូហាវឆឹងជាង ១០០ នាក់បានផ្ទុះការតវ៉ានៅមុខកន្លែងធ្វើការរបស់ពួកគេកាលពីថ្ងៃទី ២៤ ខែមីនា ក្រោយពីថៅកែសម្រេចបញ្ឈប់ពួកគេភ្លាមៗ ដោយមិនបើកប្រាក់ខែជូនពួកគាត់ និងមិនអាចទ្រាំធ្វើការក្រោមការគាបសង្កត់ពីអ្នកគ្រប់គ្រងជាជនជាតិចិនបាន។
លោក យ៉ូវ ខេមរា ប្រាប់ភ្នំពេញប៉ុស្តិ៍ថ្ងៃទី ២៥ មីនា ថា៖ «តាមការសម្របសម្រួលដែលមានបុគ្គលិកតវ៉ាទាំងអស់ ២៣០ នាក់ហើយអ្នកលាឈប់ ១៧០ នាក់។ មានន័យថាគាត់អត់បន្តធ្វើបាតុកម្មទៀតទេ ហើយព្រមទទួលប្រាក់ខែចុងក្រោយ»។
ប្រធានមន្ទីររូបនេះឲ្យដឹងទៀតថាក្នុងការទទួលយកប្រាក់ខែនេះគឺភាគីថៅកែកាស៊ីណូបានចំណាយថវិកាសរុបប្រមាណ ២៩ ៧១០ ដុល្លារសម្រាប់បើកផ្តល់ជូនបុគ្គលិកដែលព្រមលាឈប់។ ចំណែកឯបុគ្គលិកដែលនៅសេសសល់ជិត ១០០ នាក់ទៀតគឺនឹងបន្តធ្វើការជាធម្មតា។
តាមលោក យ៉ូវ ខេមរា គឺថាមានមូលហេតុចំនួន ៣ ដែលនាំឲ្យកាស៊ីណូនេះ មិនអាចបើកលុយជូនបុគ្គលិកបានគឺទី ១ កាស៊ីណូនេះភាគច្រើនចំណូលបានមកពីអនឡាញដល់ពេលបិទហ្គេមអនឡាញទៅធ្វើឲ្យចំណូលគាត់ថយ។ ឯករណីទី ២ លោកថា មកពីគ្មានមនុស្សចូលទៅលេង ដោយសារតែតំបន់នេះធ្វើការអភិវឌ្ឍផ្លូវ។ ដូច្នេះប៉ះពាល់កន្លែងគាត់ និងទី ៣ ដោយសារស្ងាត់ភ្ញៀវ ព្រោះតែការរីករាលជំងឺកូវីដ ១៩។
ទោះយ៉ាងណាលោកបានឲ្យដឹងថា ក្រុមហ៊ុននេះមិនទាន់ប្រកាសបិទអាជីវកម្មរបស់ខ្លួននោះទេ គឺនៅបន្តដំណើរការជាធម្មតាហើយក្នុងករណីបុគ្គលិកតវ៉ាគឺមន្ត្រីនៃមន្ទីរការងារនឹងបន្តចុះសម្របសម្រួល និងតាមដានបន្តទៀត។
លោក ណែម វី បុគ្គលិកម្នាក់ក្នុងចំណោមបុគ្គលិកដែលព្រមទទួលយកដំណោះស្រាយប្រាប់ភ្នំពេញប៉ុស្តិ៍ថា បុគ្គលិកទាំង ១៧០ នាក់បានទទួលប្រាក់ខែរបស់ពួកគេអស់ហើយដោយក្នុងម្នាក់ៗទទួលបានចន្លោះពី ២០០ ទៅ ជិត ៣០០ ដុល្លារ។
លោកបញ្ជក់ថា៖ «មានអី គេដោះស្រាយល្អតើ បន្ទាប់ពីពួកយើងបានធ្វើការតវ៉ា។ យើងបានយល់ព្រមចំពោះដំណោះស្រាយនេះដោយមានអ្នកខ្លះគេទទួលប្រាក់ខែគឺគេទទួលយកប្រាក់ខែ ហើយអ្នកចង់បន្តធ្វើការក្នុងកាស៊ីណូនេះបន្ត គេនៅបន្ត និងមិនមានការតវ៉ាបន្តទៀតនោះទេ»។
ក្រុមហ៊ុនកាស៊ីណូ ហាវ ឆឹង មានបុគ្គលិកសរុបជិត ៣០០ នាក់ចែកចេញជា ២ វេនដោយក្នុង ១ វេនមានគ្នាជាង ១០០ នាក់ហើយកាស៊ីណូនេះទើបបានដំណើរការក្នុងអំឡុងខែតុលា ឆ្នាំ ២០១៩។ តាមអ្នកស្រី សាន សំអេង បុគ្គលិកកាស៊ីណូដែលចូលរួមតវ៉ាបានលើកឡើងក្នុងវីដេអូឡាយកាលពីថ្ងៃទី ២៤ មីនា ថាការផ្ទុះការតវ៉ានេះបន្ទាប់ពីពួកគេមិនអាចទ្រាំទ្រនឹងការគាបសង្កត់ពីថៅកែចិន។ ម្យ៉ាងថៅកែកាស៊ីណូនេះមិនបានបើកប្រាក់ខែជូនពួកគេនោះទេ ក្រោយពីបញ្ឈប់ការងាររបស់ពួកគេ។
អ្នកស្រីរៀបរាប់យ៉ាងដូច្នេះថា៖ «ពួកខ្ញុំមិនអាចបន្តការងារបានទេ បើទោះជាបើកប្រាក់ខែហើយក៏ដោយ ព្រោះតែពួកគាត់ (ថៅកែ) ហ្នឹងមានមេចិនម្នាក់ គាត់ធ្វើតែតាមអារម្មណ៍របស់គាត់។ ពេលណាដែលគាត់អារម្មណ៍ល្អ ពួកខ្ញុំធ្វើការតាមធម្មតា ប៉ុន្តែពេលណាដែលគាត់មានអារម្មណ៍មិនល្អ គាត់ចង់បញ្ឈប់ការងារនរណាគេ ក៏ស្រេចតែចិត្តរបស់គាត់ ហើយគាត់កាត់លុយ កាត់អីខ្ញុំ ដោយគ្មានមូលហេតុ»។
ក្រោយពីមានការផ្ទុះការតវ៉ាភ្លាមៗតំណាងក្រុមហ៊ុនកាស៊ីណូដែលមានទាំងជនជាតិចិន និងខ្មែរបានចេញមុខមកបកស្រាយ និងអះអាងថានឹងធ្វើការបើកជូនដល់បុគ្គលិកទាំងអស់មិនឲ្យលើសពីរយៈពេល ២ ថ្ងៃ បន្ទាប់ពីស្រង់វត្តមាន និងកត់លេខអាយឌីរបស់ពួកគាត់សាជាថ្មី ដើម្បីបានដឹងពីចំនួនទឹកលុយ ដែលត្រូវបើកជូនបុគ្គលិកទាំងនោះ៕