The Phnom Penh Post Search

Search form




Logo of Phnom Penh Post newspaper Phnom Penh Post - បុគ្គលិក​នៅ​សួន​កម្សាន្ត​ ឌ្រីមលែនឌ៍ តវ៉ា​ទាមទារ​សំណង​

បុគ្គលិក​នៅ​សួន​កម្សាន្ត​ ឌ្រីមលែនឌ៍ តវ៉ា​ទាមទារ​សំណង​

បុគ្គលិក​នៅ ឌ្រីមលែនឌ៍ ​ធ្វើការ​តវ៉ា​កាលពី​ម្សិលមិញ​។
បុគ្គលិក​នៅ ឌ្រីមលែនឌ៍ ​ធ្វើការ​តវ៉ា​កាលពី​ម្សិលមិញ​។ ហុង មិនា

បុគ្គលិក​នៅ​សួន​កម្សាន្ត​ ឌ្រីមលែនឌ៍ តវ៉ា​ទាមទារ​សំណង​

ភ្នំពេញៈ អតីត​បុគ្គលិក​បម្រើការ​នៅ​សួនកម្សាន្ត​ ឌ្រីមលែនឌ៍ (Dream Land) ជិត ១០០ ​នាក់​មាន​ទីតាំង​ក្នុង​រាជធានី​ភ្នំពេញ​កាលពី​ម្សិលមិញ​បាន​តវ៉ា​ទាមទារ​ឱ្យ​ម្ចាស់​ក្រុមហ៊ុន​ផ្តល់​ប្រាក់​អត្ថប្រយោជន៍​ផ្សេងៗ​តាម​ច្បាប់​ការងារ​បន្ទាប់ពី​ពួកគេ​ត្រូវ​បាន​ក្រុមហ៊ុន​បញ្ឈប់​​ពី​ការងារ​ខណៈ​សួន​កម្សាន្ត​មួយ​នេះ​ប្រកាស​បិទ​ទ្វារ​នៅ​ថ្ងៃ​ទី​ ៣១ ខែ​មីនា​ខាង​មុខ​នេះ​។

អតីត​បុគ្គលិក​នៅ​ ឌ្រីមលែនឌ៍ ​​មក​ពី​គ្រប់​ផ្នែក​រួមមាន​សេវាកម្ម សន្តិសុខ អ្នក​គិត​លុយ អ្នកគ្រប់គ្រង និង​អ្នក​សម្អាត​ជិត ១០០ នាក់​បាន​ប្រមូល​ផ្តុំ​នៅ​មុខ​សួនច្បារ​ចាប់​ពី​ម៉ោង​ជាង ៨ ព្រឹក​ដល់​ម៉ោង​ជាង ៩ ព្រឹក​កាលពី​ម្សិលមិញ​ក្រោយ​មក​រំសាយ​វិញ​បន្ទាប់ពី​ទទួល​បាន​ព័ត៌មាន​ថា​តំណាង​ក្រុមហ៊ុន​នឹង​ធ្វើ​ការ​ចរចា​នៅ​ព្រឹក​ថ្ងៃ​នេះ។

អគ្គហេរញ្ញិក​នៃ​សហព័ន្ធ​សហជីព​ពលកម្ម​កម្ពុជា​លោក​ ជា ឆែសំអាត់ ដែល​បាន​ទទួល​​ការ​ពឹងពាក់​ពី​បុគ្គលិក​ ឌ្រីមលែនឌ៍ ប្រាប់​ភ្នំពេញ​​ប៉ុស្តិ៍​ថា​យោង​តាម​ច្បាប់​ការងារ​ពួកគេ​ដែល​បាន​ធ្វើ​កិច្ចសន្យា​មិន​កំណត់​ជាមួយ​ក្រុមហ៊ុន ឌ្រីមលែនឌ៍ នឹង​ត្រូវ​ទទួល​បាន​អត្ថប្រយោជន៍​ផ្សេងៗ​រួមមាន​ប្រាក់​ជំងឺ​ចិត្ត​ការ​បណ្តេញ​ចេញ​ និង​​​​ប្រាក់​ដំណាច់​ឆ្នាំ​នៅពេល​ក្រុមហ៊ុន​ប្រឈម​ការ​បិទ​ទ្វារ។ តែ​លោក​ថា​ទាំង​បី​ចំណុច​នេះ​ក្រុមហ៊ុន​ពុំ​បាន​ទូទាត់​ដល់​បុគ្គលិក​ទេ​ទើប​បណ្តាល​ឱ្យ​ការ​តវ៉ា​ផ្ទុះ​ឡើង។

លោក​បាន​ថ្លែង​ថា៖ ​«ពួកគេ​ចង់​បាន​បី​ចំណុច និង​សំណង​​អតីតភាព​ការងារ​របស់​ពួកគាត់​តែ​ក្រុមហ៊ុន​បាន​កិបកេង​ខ្លះ​មិន​បាន​ទូទាត់​តាម​ផ្លូវ​ច្បាប់​ដូចជា​ប្រាក់​ដំណាច់​ឆ្នាំ​ជាទូទៅ​ ១ ឆ្នាំ​បុគ្គលិក​ត្រូវ​ឈប់​ ១៨ ​ថ្ងៃ​តែ​អ្នក​ខ្លះ​ឈប់​បាន​តែ​ ១០ ថ្ងៃ​ចឹង​ក្រុមហ៊ុន​ត្រូវ​ទូទាត់​ឱ្យ​គាត់ ៨ ថ្ងៃ​ទៀត​ក្នុង​មួយ​ឆ្នាំ»។

ប្រធាន​សន្តិសុខ​រហ័ស​នាម S ១១ អាយុ ៥០ ឆ្នាំ​ដែល​ធ្វើការ​នៅ ឌ្រីមលែន តាំង​ពី​ឆ្នាំ ២០១២ មក​ថ្លែង​ថា​ពួកគាត់​មិន​ចង់​បាន​អ្វី​ច្រើន​នោះ​ទេ​គ្រាន់តែ​​ស្នើ​ឱ្យ​ក្រុមហ៊ុន​ធ្វើការ​ដោះស្រាយ​ជូន​បុគ្គលិក​តាម​ច្បាប់​ការងារ​ខណៈ​ក្រុមហ៊ុន​បញ្ឈប់​ពី​ការងារ។

លោក​ថា៖ ​«ខ្ញុំ​ស្នើ​ឱ្យ​ក្រុមហ៊ុន​ជួយ​ដោះស្រាយ​អំពី​បញ្ហា​ផ្តល់​អត្ថប្រយោជន៍​តាម​ច្បាប់​ការងារ​ដោយសារ​មួយ​រយៈ​កន្លង​មក​ពួកខ្ញុំ​ដាក់​សំណើ​ទៅ​​ក្រុមហ៊ុន​តាំងពី​ថ្ងៃ​ ២៩ កុម្ភៈ​ឱ្យ​ដោះស្រាយ​តែ​មិន​មាន​ការ​ឆ្លើយតប»។

យ៉ាង​ណា​ក៏ដោយ​លោក​ទទូច​ឱ្យ​ក្រុមហ៊ុន​ជួយ​ដោះស្រាយ​ជូន​ពួក​គាត់​ខណៈ​ពួកគេ​មួយ​ចំនួន​ប្រឈម​បាត់បង់​ការងារ។ តែ​លោក​ថា​បើ​សិន​មិន​មាន​ដំណោះស្រាយ​សមរម្យ​លោក​នឹង​ដាក់​​លិខិត​សុំ​អន្តរាគមន៍​ទៅ​ក្រសួង​ការងារ អាជ្ញាធរ​មូលដ្ឋាន រដ្ឋសភា និង​ខុទ្ទកាល័យ​នាយករដ្ឋមន្ត្រី​។

អគ្គលេខាធិការ​រង​នៃ​គណៈកម្មការ​សម្រាប់​ដោះស្រាយ​កូដកម្ម បាតុកម្ម​នៅ​តាម​គ្រប់​មុខ​សញ្ញា​នៃ​ក្រសួង​ការងារ​លោក វង្ស សុវណ្ណ ប្រាប់​ភ្នំពេញ​ប៉ុស្តិ៍​ថា​ខាង​លោក​បាន​ទទួល​ដំណឹង​នេះ​ហើយ​ចំណែក​ខាង​មន្ត្រី​ជំនាញ​កំពុង​ចុះ​ទៅ​ដោះស្រាយ​លើ​បញ្ហា​នេះ​ជាមួយ​ភាគី​ពាក់ព័ន្ធ។

លោក​បន្ត​ថា​ ​ប្រសិន​បើ​មន្ត្រី​ជំនាញ​រកឃើញ​ថា​ក្រុមហ៊ុន​មិន​បាន​គោរព​តាម​ច្បាប់​ការងារ​មន្ត្រី​ជំនាញ​នឹង​បញ្ចូន​ករណី​នេះ​ទៅ​ក្រុម​ប្រឹក្សា​អាជ្ញាកណ្តាល​។

លោក​ថា​៖ «​តាម​ច្បាប់​ការងារ កិច្ចសន្យា​មាន​កំណត់​ក្រុមហ៊ុន​ត្រូវ​ផ្តល់​ឱ្យ​​បុគ្គលិក ៥ ភាគរយ​នៅពេល​បញ្ឈប់​ពួកគេ​តែ​កិច្ច​សន្យា​មិន​កំណត់​ក្រុមហ៊ុន​ត្រូវ​ផ្តល់ ៥ ចំណុច​រួម​មាន​ប្រាក់ខែ​ចុង​ក្រោយ​ ប្រាក់​បំណាច់​បណ្តេញ​ចេញ ប្រាក់​ជំងឺ​ចិត្ត ប្រាក់​ដំណាច់​ឆ្នាំ និង​ប្រាក់​ជូន​ដំណឹង»។

តំណាង​ក្រុមហ៊ុន ឌ្រីមលែនឌ៍ ​លោក ឆ វ័ន្ត បាន​ថ្លែង​ថា​កន្លង​មក​ក្រុមហ៊ុន​បាន​ដោះស្រាយ​ជូន​ពួកគាត់​បាន​ច្រើន​ហើយ​រួម​ទាំង​ផ្តល់​ប្រាក់​ខែ​ទី ១៣ ដល់​ពួកគាត់​ទៀត​ផង​នៅ​សល់​តែ​ចំណុច​តិចតួច​ប៉ុណ្ណោះ។ យ៉ាង​ណា​ក៏ដោយ​ លោក​ថា ​ក្រុមហ៊ុន​នៅ​តែ​ទទួល​យក​សំណើ​ពួកគាត់​មក​​ដោះស្រាយ​បន្ត​ទៀត​ដើម្បី​ឈាន​ទៅ​រក​ចំណុច​រួម​គ្នា​ដែល​អាច​ទទួល​យក​ទាំង​សង​ខាង។

លោក​បាន​បញ្ជាក់​ថា៖ «ឥឡូវ​នេះ​សំណើ​របស់​គាត់​យើង​មិន​បដិសេធ​ទេ​តែ​យើង​កំពុង​ពិភាក្សា​ថា​តើ​អាច​ផ្តល់​ជូន​ពួកគាត់​ក្នុង​រូបភាព​ណា​មួយ​ដើម្បី​ឱ្​យមាន​សមតុល្យ​ទាំង​សង​ខាង​ពីព្រោះ​ក្រុមហ៊ុន​យើង​ក៏​មិន​សូវ​ទទួល​បាន​ចំណេញ​​ដែរ»។

លោក​បាន​ឲ្យ​ដឹង​ថា​អ្វី​ដែល​នៅ​មាន​ភាព​ចម្រូង​ចម្រាស​ដោយសារ​បុគ្គលិក​ខ្លះ​​ប្តូរ​កិច្ចសន្យា​ការងារ​កំណត់​ទៅ​ជា​កិច្ចសន្យា​​មិន​កំណត់​ដែល​ធ្វើ​ឱ្យ​មាន​ភាព​ស្រពេច​ស្រពិល​នៅ​ឡើយ​តែ​លោក​ថា​ក្រុមហ៊ុន​កំពុង​ព្យាយាម​ដោះស្រាយ​ការ​ខ្វះ​ចន្លោះ​នេះ។ បើ​តាម​លោក ឆ វ័ន្ត មូលហេតុ​ដែល​ក្រុមហ៊ុន​បិទ​ទ្វារ​ដោយសារ​តែ​ចប់​កុងត្រា​ផង​លំហូរ​ភ្ញៀវ​ចូល​កម្សាន្ត​ក្នុង​សួន​តិច​ជាង​មុន​ជាពិសេស​ទីតាំង​នោះ​នឹង​ត្រូវ​គេ​យក​ទៅ​សាងសង់​អគារ​កម្ពស់ ១៣៣ ជាន់៕

អត្ថបទគួរចាប់អារម្មណ៍