.jpg)
បុគ្គលិកបម្រើការនៅស្ថានទូតអាមេរិក ពេលតវ៉ាកាលពីព្រឹកមិញ ។ ផា លីណា
ភ្នំពេញៈ បុគ្គលិកផ្នែកសន្តិសុខនៃស្ថានទូតអាមេរិក នៅទីក្រុងភ្នំពេញប្រមាណជាង ២០ នាក់ កាលពីព្រឹកថ្ងៃទី ១៩ ខែមិថុនានេះ បាននាំគ្នាតវ៉ាប្រឆាំងនឹងចំណាត់ការរបស់ស្ថានទូតនេះ ដែលបានបញ្ឈប់ពួកគេសរុប ៣២ នាក់កាលពីថ្មីៗនេះ ដោយចោទប្រកាន់ពីបទលួចមើលនិងចែកចាយរូបភាពអាសអាភាស ។
លោក ញឹម សុភ័ណ អាយុ ៤៥ ឆ្នាំ ដែលអះអាងថា បានបម្រើការងារជាបុគ្គលិកផ្នែកសន្តិសុខនៅស្ថានទូត អាមេរិក អស់ពេល ១៨ ឆ្នាំ បានប្រាប់ភ្នំពេញ ប៉ុស្តិ៍ នៅកន្លែងជួបប្រជុំតវ៉ានោះថា ពួកគាត់មិនអាចទទួលយកបានទេ ចំពោះអ្វីដែលស្ថានទូតអាមេរិក បានបញ្ឈប់ការងាររបស់ពួកគាត់ដោយចោទប្រកាន់ពួកគាត់ថា«លួចមើលនិងចែកចាយរូបភាពអាសអាភាស »។
លោក សុភ័ណ បានបញ្ជាក់ថា៖ «ស្ថានទូតបានដកហូតយកទូរស័ព្ទដៃផ្ទាល់ខ្លួនរបស់យើងខ្ញុំទៅឆែកមើល ហើយបានឆែកមើល facebook និង Messenger ផ្ទាល់ខ្លួនរបស់យើងខ្ញុំថែមទៀត។ បន្ទាប់មកស្រាប់តែស្ថានទូតបញ្ឈប់ការងាររបស់យើងខ្ញុំ ដោយចោទយើងខ្ញុំថា បានលួចមើលនិងចែកចាយរូបភាពអាសអាភាសទាក់ទងនឹងកូនក្មេង ក្រោម អាយុ ១០ ឆ្នាំទៅវិញ ដែលប្រការនេះយើងខ្ញុំមិនអាចទទួលយកបានទេ»។
បុគ្គលិកសន្តិសុខម្នាក់ទៀត គឺ លោក ជួន អ៊ីម បានចាត់ទុកការបញ្ឈប់ការងារពួកគាត់ថា កំពុងរំលោភបំពានសិទ្ធិរបស់បុគ្គល។
លោក បានថ្លែងទៀតថា ស្ថានទូតមានសិទ្ធិកាត់រំសាយការងារបុគ្គលិកមួយចំនួនក្នុងផ្នែកមិនចាំបាច់ដោយទូទាត់សំណងសមរម្យតាមច្បាប់ការងារមិនមែនបញ្ឈប់ដោយបង្ខំទាំងអយុត្តិធម៌បែបនេះទេ។
លោក អ៊ីម បានថ្លែងថា៖ «ពាក្យចោទប្រកាន់ទាំងអយុត្តិធម៌ របស់ស្ថានទូតអាមេរិកមក លើយើងខ្ញុំនាពេលនេះ គឺកំពុងតែសម្លាប់ការងារ ជិវិត និង ក្រុមគ្រួសាររបស់យើងខ្ញុំ ព្រោះយើងខ្ញុំនឹងមិនអាចទៅរកការងារល្អៗឯណាទៀតបានធ្វើសម្រាប់រកប្រាក់ចំណូលផ្គត់ផ្គង់ជីវភាពគ្រួសារនោះទេ»។
កាលពីព្រឹកមិញនេះផងដែរមន្ត្រីសន្តិសុខស្ថានទូតជនជាតិអាមេរិកម្នាក់បានចេញមកទទួលយកញត្តិពីក្រុម អ្នកតវ៉ាទាំងនោះ ប៉ុន្តែបានបដិសេធផ្ដល់អត្ថាធិប្បាយដល់ក្រុមអ្នកសារព័ត៌មាន។ យ៉ាងណានៅពេលទទួលយកញ្ញតិពីក្រុមអ្នកតវ៉ា មន្ត្រីសន្តិសុខជាតិអាមេរិករូបនោះ បានប្រាប់ក្រុមអ្នកតវ៉ាថា គាត់នឹងនាំញត្តិនោះទៅដាក់ជូនថ្នាក់លើ ដើម្បីពិនិត្យនិងសម្រេច។
ដោយឡែកអ្នកនាំពាក្យសា្ថនទូតអាមេរិក លោក David Josar នៅព្រឹកមិញនេះផងដែរបានប្រាប់ភ្នំពេញប៉ុស្តិ៍ តាមរយៈសារអេឡិចត្រូនិកថា៖ «យើងគោរពសិទ្ធិអ្នកដែលមកតវ៉ាទាមទារអ្វីមួយដោយសន្តិវិធី រួមទាំងអតីតបុគ្គលិកសន្តិសុខទាំងនេះ។ រដ្ឋាភិបាលអាមេរិក ចាត់វិធានការពាក់ព័ន្ធនឹងរូបអាសអាភាសរបស់កុមារ និង ការកេងប្រវ័ញ្ចយ៉ាងធ្ងន់ធ្ងរលើកុមារ។ យើងមិនធ្វើអត្ថាធិប្បាយអំពីបញ្ហាបុគ្គលិកផ្ទៃក្នុងទេ»៕
