The Phnom Penh Post Search

Search form

Logo of Phnom Penh Post newspaper Phnom Penh Post - បុគ្គលិក​កាស៊ីណូ Las Vegas ៣៨ នាក់​សន្លប់

បុគ្គលិក​កាស៊ីណូ Las Vegas ៣៨ នាក់​សន្លប់

បុគ្គលិក​កាស៊ីណូ Las Vegas ៣៨ នាក់​សន្លប់

ភ្នំពេញៈ បុគ្គលិក ៣៨ នាក់​នៅ​កាស៊ីណូ Las Vegas នៅ​ក្នុង​ក្រុង បាវិត បាន​ដួល​សន្លប់​កាល​ពី​ថ្ងៃ​ត្រង់​ម្សិលមិញ ហើយ​មន្រ្តី​សុខាភិបាល​មាន​ការ​សង្ស័យ​ថា ពួកគេ​ពុល​អាហារ។

លោក អ៊ឹម ប៊ុត អនុ​ប្រធាន​មន្ទីរ​ពេទ្យ​បង្អែក ជីភូ ក្នុង​ខេត្ត ស្វាយរៀង ដែល​បាន​ចុះ​ទៅ​ជួប​បុគ្គលិក​កាស៊ីណូ ដែល​កំពុង​សម្រាក​ព្យាបាល​នៅ​គ្លីនិក​ឯកជន កាល​ពី​ម្សិលមិញ​បាន​ថ្លែង​ថា សេចក្តី​សន្និដ្ឋាន​បឋម​គឺ​ដោយ​សារ​តែ​ពុល​អាហារ។ លោក​បាន​បន្ត​ថា៖ «តាម​បទ ពិសោធ​ដែល​ខ្ញុំ​បាន​ជួប ករណី​បែប​នេះ​គឺ​ពុល​អាហារ​។ ប៉ុន្តែ​យើង​បាន​បញ្ជូន​សំណាក​របស់​ពួកគេ​ទៅ​ពិនិត្យ​នៅ​វិទ្យាស្ថាន ប៉ាស្ទ័រ នៅ ភ្នំពេញ ដើម្បី​រក​មូលហេតុ​ពិត»។

លោក អ៊ឹម ប៊ុត បាន​បន្ថែម​ឲ្យ​ដឹង​ទៀត​ថា បុគ្គលិក​ដែល​សន្លប់​ទាំង ៣៨ នាក់​នោះ មិន​ពុល​អ្វី​ក្រៅ​ពី​អាហារ​ឡើយ ពីព្រោះ​អ្នក​ដែល​ហូប​ច្រើន​មាន​ស្ថានភាព​ធ្ងន់​ធ្ងរ ហើយ​អ្នក​ហូប​តិច មាន​ស្ថានភាព​មិន​សូវ​ធ្ងន់​ធ្ងរ​ទេ។ កាស៊ីណូ Las Vegas បាន​ផ្តល់​អាហារ​ដល់​បុគ្គលិក។

លោក កែវ រដ្ឋា ប្រធាន​មន្ទីរ​សុខាភិបាល​ខេត្ត បាន​ថ្លែង​កាល​ពី​ម្សិលមិញ​ថា លោក​បាន​បញ្ជា​មន្រ្តី​របស់​លោក​ឲ្យ​ធ្វើ​ការ​ស៊ើប​អង្កេត​ករណី​សន្លប់​នេះ។ លោក​បាន​បន្ត​ថា៖ «ខ្ញុំ​បាន​បញ្ជា​មន្រ្តី​ចុះ​ទៅ​កាស៊ីណូ និង​ជួប​បុគ្គលិក​ដែល​សន្លប់ ហើយ​ធ្វើ​ការ​ស៊ើប​អង្កេត​ដើម្បី​រក​មូលហេតុ។ ខ្ញុំ​នឹង​ទទួល​បាន​ព័ត៌មាន​ពេញ​លេញ​នៅ​ថ្ងែ​ស្អែក»។

ប៉ុន្តែ​លោក ម៉ៅ ពិនភីរម្យ មេប៉ុស្តិ៍​សង្កាត់ បាវិត បាន​ថ្លែង​កាល​ពី​ម្សិលមិញ​ថា មាន​បុគ្គលិក​កាស៊ីណូ​ប្រហែល​តែ ២០ នាក់​ប៉ុណ្ណោះ​សន្លប់​។ លោក​បាន​បញ្ជាក់​ថា៖ «ពួក​គេ​មិន​ធ្ងន់​ធ្ងរ​ទេ ខ្លះ​បាន​ទៅ​ផ្ទះ​វិញ​ហើយ។ គេ​មិន​អី​ទេ»។

បុគ្គលិក​កាស៊ីណូ Las Vegas មិន​អាច​ទាក់​ទង​សុំ​ការ​អត្ថាធិប្បាយ​បាន​ទេ កាល​ពី​ម្សិលមិញ។

កន្លង​មក​មាន​កម្មករ​តាម​រោងចក្រ​ជាច្រើន​បាន​ដួល​សន្លប់​ដែល​មន្ត្រី​ជំនាញ និង​មេ​ដឹក​នាំ​សហជីព​អះអាង​ថា ការ​ដួល​សន្លប់​របស់​កម្មករ គឺ​ដោយ​សារ​តែ​បរិស្ថាន​នៅ​ក្នុង​រោងចក្រ ខណៈ​ដែល​កម្មករ​មាន​សុខភាព​ទន់​ខ្សោយ ព្រោះ​តែ​ហូប​អាហារ​មិន​គ្រប់​គ្រាន់។ ការ​ទាមទារ​ឲ្យ​ធ្វើ​ការ​កែលម្អ​បរិស្ថាន​នៅ​ក្នុង​រោងចក្រ និង​ការ​ដំឡើង​ប្រាក់​ខែ​សមរម្យ​ដល់​កម្មករ ត្រូវ​បាន​គេ​ស្នើ​ឡើង​ដើម្បី​កាត់​បន្ថយ​ការ​សន្លប់៕ TK

អត្ថបទគួរចាប់អារម្មណ៍