The Phnom Penh Post Search

Search form




Logo of Phnom Penh Post newspaper Phnom Penh Post - បុណ្យ​អុំ​ទូក​និង​បុណ្យ​ឯករាជ្យ​ជាតិ​នៅ​ដុត​កាំជ្រួច​ដូច​ធម្មតា




បុណ្យ​អុំ​ទូក​និង​បុណ្យ​ឯករាជ្យ​ជាតិ​នៅ​ដុត​កាំជ្រួច​ដូច​ធម្មតា

យុវជន យូ ហាប្លី អ្នក​នេសាទ​អាយុ ១៥ ឆ្នាំ (ដេក) រង​របួស​ពី​ឧប្បត្តិ​ហេតុ​កាល​ពី​យប់​ថ្ងៃ​ពុធ។
យុវជន យូ ហាប្លី អ្នក​នេសាទ​អាយុ ១៥ ឆ្នាំ (ដេក) រង​របួស​ពី​ឧប្បត្តិ​ហេតុ​កាល​ពី​យប់​ថ្ងៃ​ពុធ។ រូបថត ELI MEIXLER

បុណ្យ​អុំ​ទូក​និង​បុណ្យ​ឯករាជ្យ​ជាតិ​នៅ​ដុត​កាំជ្រួច​ដូច​ធម្មតា

ភ្នំពេញៈ នាយ​ទាហាន​ជាន់​ខ្ពស់​ម្នាក់​អះអាង​ថា កាំជ្រួច​នឹង​បន្ត​បាញ់​ដូច​ធម្មតា​នៅ​ក្នុង​ពិធី​បុណ្យ​អុំទូក​នា​សប្តាហ៍​ក្រោយ និង​ក្នុង​ទិវា​បុណ្យ​ឯករាជ្យ​ជាតិ ថ្ងៃ ទី៩ វិច្ឆិកា បើ​ទោះ​ជា​មាន​ឧប្បត្តិហេតុ​ស្លាប់​យុវជន​ម្នាក់ ក្នុង​ពិធី​គម្រប់​ខួប ១០ ឆ្នាំ នៃ​ការ​គ្រង​រាជ​សម្បតិ្ត​របស់​ព្រះ​មហាក្សត្រ កាល​ពី​ថ្ងៃ​ពុធ​ក៏​ដោយ។

និស្សិត​ឈ្មោះ ណាគ្រី ដារ៉ូ អាយុ ២២​ឆ្នាំ ដែល​មក​ពី ខេត្ត​កណ្តាល បាន​ស្លាប់​បាត់​បង់​ជីវិត​នៅ​ពេល​កាំជ្រួច​ដែល​រៀបចំ​បាញ់​ដោយ​កងទ័ព បាន​ផ្ទុះ​ក្នុង​អំឡុង​ពិធី​គម្រប់​ខួប ទី១០ នៃ​ការ​គ្រង​រាជ​សម្បតិ្ត​របស់​ព្រះ​មហាក្សត្រ សម្តេច​ព្រះ​បរមនាថ នរោត្តម សីហមុនី។

ប៉ុន្តែ លោក អ៊ិត សារ៉ាត អគ្គ​មេ​បញ្ជាការ​រង​នៃ​កង​យោធពល​ខេមរ​ភូមិន្ទ ថ្លែង​ថា ការ​ស្លាប់​របស់​យុវជន ណាគ្រី ដារ៉ូ គឺជា​ឧប្បត្តិ​ហេតុ​អាក្រក់​មួយ ហើយ​សុវត្ថិភាព​មិន​មែន​ជា​បញ្ហា​ទេ នៅ​ពេល​ពិធី​បុណ្យ​អុំ​ទូក ចាប់​ផ្តើម​នៅ​ថ្ងៃ​ពុធ​ខាង​មុខ​នេះ។

លោក​បន្ត​ថា៖ «យើង​នៅ​តែ​មាន​កាំជ្រួច​រាប់​រយ​ដើម ដែល​ជា​ប្រភេទ​ម៉ាក​តែ​មួយ។ យើង​ត្រូវ​ប្រើ​កាំជ្រួច​ទាំង​នោះ ព្រោះ​យើង​បាន​ពិនិត្យ​គុណភាព​រួច​ហើយ។ ករណី​នេះ គ្រាន់​តែ​ជា​ឧប្បត្តិ​ហេតុ។ ថៃ និង​ប្រទេស​ដទៃ​ទៀត​ក៏​ធ្លាប់​ជួប​រឿង​ផ្ទុះ​បែប​នេះ​ដែរ»។

កាំជ្រួច​ដែល​ផលិត​នៅ​ចិន។
កាំជ្រួច​ដែល​ផលិត​នៅ​ចិន។ រូបថត ELI MEIXLER

មនុស្ស​ជាង​មួយ​លាន​នាក់​ត្រូវ​បាន​ព្យាករណ៍​ថា នឹង​ចូល​រួម​ក្នុង​ពិធី​បុណ្យ​អុំ​ទូក​លើក ទី១ ចាប់​តាំង​ពី​កើត​គ្រោះ​ថ្នាក់​ជាន់​គ្នា​ស្លាប់​កាល​ពី ឆ្នាំ​២០១០ ដែល​បាន​សម្លាប់​មនុស្ស​ជាង ៣៥០ នាក់។

ប៉ុន្តែ លោក ឈិន កេតនា អគ្គ​លេខាធិការ​នៃ​គណៈ​កម្មាធិការ​ជាតិ រៀបចំ​បុណ្យ​ជាតិ និង​អន្តរជាតិ បាន​ថ្លែង​ថា អ្នក​រៀបចំ​មិន​បាន​ពិភាក្សា​គ្នា​អំពី​បញ្ហា​សុវត្ថិភាព​នៃ​ការ​បាញ់​កាំជ្រួច​ទេ កាល​ពី​ម្សិល​មិញ​បន្ទាប់​ពី​មាន​សោនាដកម្ម​កាល​ពី​ថ្ងៃ​ពុធ។

ដោយ​សំដៅ​លើ​ដំណើរ​ទស្សនកិច្ច​របស់​លោក ប្រាយុធ ចាន-អូចា នាយក​រដ្ឋ​មន្រ្តី​ថៃ លោក​បាន​បន្ត​ថា៖ «ឥឡូវ​នេះ យើង​គ្មាន​ពេល​វេលា​ពិភាក្សា​បញ្ហា​នេះ​ទេ ព្រោះ​យើង​ជាប់​រវល់​ជួប​ប្រជុំ​ជាមួយ​នឹង​គណៈ​ប្រតិភូ​ថៃ។ ប៉ុន្តែ យើង​នឹង​ពិភាក្សា​ជាមួយ​នឹង​ក្រសួង​ក្នុង​រដ្ឋាភិបាល​នា​ប៉ុន្មាន​ថ្ងៃ​ទៀត»។

នគរបាល​និង​មន្រ្តី​សាលា​រាជធានី​ភ្នំពេញ បាន​ថ្លែង​ថា បំពង់​បាញ់​កាំជ្រួច ដែល​បាន​ជីក​កប់​ដី​នៅ​ជិត​សណ្ឋាគារ សុខា ក្នុង ខណ្ឌ​ជ្រោយ​ចង្វារ បាន​ផ្ទុះ ហើយ​បាន​រេ​ខុស​ទិស​ដៅ​កាល​ពី​ថ្ងៃ​ពុធ។

ជន​រងគ្រោះ ណាគ្រី ដារ៉ូ ដែល​កំពុង​ឈរ​នៅ​ក្រៅ​រនាំង​ហាម​ឃាត់​ប្រហែល ៥០ ម៉ែត្រ​ពី​កន្លែង​បាញ់​បាន​ស្លាប់​នៅ​នឹង​កន្លែង​កើត​ហេតុ​ភ្លាម ខណៈ​មនុស្ស ៧ នាក់​ផ្សេង​ទៀត​បាន​រង​របួស​ធ្ងន់​និង​ស្រាល។

យុវជន យូ ហាប្លី អ្នក​នេសាទ​អាយុ ១៥ ឆ្នាំ ដែល​រស់​នៅ​ពី​ក្រោយ​សណ្ឋាគារ បាន​ថ្លែង​ថា គាត់​ស្ថិត​នៅ​ចម្ងាយ​ប្រហែល ១០០ ម៉ែត្រ​ពី​បំពង់​បាញ់​កាំជ្រួច នៅ​ពេល​កាំជ្រួច​ផ្ទុះ ប៉ុន្តែ ក្នុង​ទិស​ដៅ​ផ្ទុយ​ពី​កន្លែង​លោក ណាគ្រី ដារ៉ូ បាន​ឈរ។

ហាប្លី បន្ថែម​ថា៖ «បំពង់​បាញ់​កាំ​ជ្រួច​ចុង​ក្រោយ​មាន​បញ្ហា។ បំណែក​ខ្លះ​ហោះ​សំដៅ​មក​ខ្ញុំ ដំបូង​វា​ប៉ះ​ត្រូវ​មនុស្ស​ចាស់ ហើយ​ផ្លាត​មក​ចំ​ខ្ញុំ»។

កម្ទេច​ក៏​បាន​ប៉ះ​ចំ​កញ្ចក់​បង្អួច​ជាន់ ទី៤ របស់​សណ្ឋាគារ​ដោយ​ធ្វើ​ឲ្យ​ប្រេះ​កញ្ចក់​នោះ​ផង​ដែរ។

សម្បក​កាំជ្រួច​ដែល​ផលិត​នៅ​ចិន។
សម្បក​កាំជ្រួច​ដែល​ផលិត​នៅ​ចិន។ រូប ELI MEIXLER

សម្បក​កញ្ចប់​កាំជ្រួច​ដែល​បោះ​ចោល​នៅ​កន្លែង​កើត​ហេតុ កាល​ពី​ម្សិល​មិញ បាន​បង្ហាញ​ថា កាំជ្រួច​ដែល​បាញ់​នៅ​យប់​កើត​ហេតុ​ផលិត​នៅ ប្រទេស​ចិន។ កាំជ្រួច​បាន​ឆ្លង​កាត់​ការ​ធ្វើ​តេស្ត​សុវត្ថិភាព​យ៉ាង​តឹងរ៉ឹង ហើយ​ត្រូវ​បាន​ផលិត​ឡើង​សម្រាប់​ការ​ប្រើ​ប្រាស់​បែប​វិជ្ជាជីវៈ។

ខណៈ​ដែល​លោក ហាប្លី ដេក​ឈឺ​ចាប់​នៅ​ផ្ទះ​ទឹក ដោយ​កំពុង​ថែ​របួស​ជើង ដែល​វេជ្ជបណ្ឌិត​ថា ត្រូវ​ចំណាយ​ពេល​វេលា ១ ខែ ដើម្បី​ជា​សះ​ស្បើយ កាល​ពី​ម្សិល​មិញ​លោក អ៊ី យូ ឪពុក​របស់​គាត់​បាន​ប្រាប់​ថា អាជ្ញាធរ​បាន​ផ្តល់​សំណង ៥០០ ដុល្លារ។ ប៉ុន្តែ ជាមួយ​នឹង​ការ​ស្វាគមន៍​ជំនួយ​នេះ លោក​មាន​សារ​មួយ​ដែរ​ផ្ញើ​ទៅ​គណៈ​កម្មាធិការ​រៀបចំ​បុណ្យ​ជាតិ។

លោក​សំណូម​ពរ​ថា៖ «គ្រោះ​ថ្នាក់​នេះ គឺជា​មេរៀន​សម្រាប់​អ្នក​រៀបចំ​ពិធី​បុណ្យ​អុំ​ទូក​ខាង​មុខ​នេះ។ ពួក​គេ​ត្រូវ​រក​កន្លែង​សុវត្ថិភាព​ដើម្បី​បាញ់​កាំជ្រួច នៅ​ឆ្ងាយ​ពី​ប្រជាជន។ ក្នុង​អំឡុង​ពិធី​បុណ្យ​អុំទូក មនុស្ស​មួយ​លាន​នាក់​នឹង​មក​ទីនេះ។ ប្រសិន​បើ​គេ​មិន​យក​ចិត្ត​ទុក​ដាក់ មនុស្ស​ច្រើន​នាក់​ទៀត​នឹង​ស្លាប់​បែប​នេះ»។

លោក ជ្រៀង សុផាន់ អភិបាល​រង​រាជធានី​ភ្នំពេញ បាន​ថ្លែង​ឲ្យ​ដឹង​ថា បុរស​ម្នាក់​អាយុ ៥៤ ឆ្នាំ និង​ក្មេង​ប្រុស​ម្នាក់ បាន​ធូរ​ស្បើយ​ពី​របួស​នៅ​ក្នុង​មន្ទីរពេទ្យ​ពីរ​ផ្សេង​គ្នា កាល​ពីថ្ងៃ​ម្សិល​មិញ។

លោក​បញ្ជាក់​ទៀត​ថា លោក​នាយក​រដ្ឋ​មន្រ្តី ហ៊ុន សែន និង​លោក ប៉ា សុជាតិវង្ស អភិបាល​រាជធានី បាន​បរិច្ចាគ​ប្រាក់ ៥០០ ដុល្លារ​ដល់​ពួក​គេ និង​២៥០ ដុល្លារ ដល់​អ្នក​ដទៃ​ទៀត ដែល​កំពុង​សម្រាក​ព្យាបាល​នៅ​តាម​ផ្ទះ។

គ្រួសារ​លោក ណាគ្រី ដារ៉ូ ក៏​បាន​ទទួល​សំណង​ផង​ដែរ ប៉ុន្តែ លោក សុផាន់ មិន​បាន​ប្រាប់​ថា តើ​មាន​ចំនួន​ប្រាក់​ប៉ុន្មាន​ទេ។

យោង​ទៅ​តាម​លោក យឿន ចន្ថា នាយ​រង​ប៉ុស្តិ៍ សង្កាត់​ជ្រោយ​ចង្វារ បាន​ឲ្យ​ដឹង​ថា គណៈ​កម្មាធិការ​បាន​បរិច្ចាគ ៥០០ ដុល្លារ​ដល់​អ្នក​របួស​ម្នាក់ៗ​ដែល​រង​របួស៕

អត្ថបទគួរចាប់អារម្មណ៍

  • ស្ដង់ដា​គណនេយ្យ ជា​ធាតុ​ផ្សំ​ដ៏សំខាន់​មួយ​ក្នុង​ក្របខ័ណ្ឌ​គណនេយ្យ និង​ការរាយការណ៍​ហិរញ្ញវត្ថុ ព្រមទាំង​ជួយ​សម្រួល​ដល់​ក្រុមហ៊ុន​/​សហគ្រាស និង​ថ្នាក់ដឹកនាំ​របស់​ក្រុមហ៊ុន ដើម្បី​កំណត់​ឱ្យ​បាន​ច្បាស់លាស់​ពី​ស្តង់ដា​ដែល​ក្រុមហ៊ុន​បាន​ប្រើប្រាស់​សម្រាប់​ការរៀបចំ​របាយការណ៍​ហិរញ្ញវត្ថុ​។

  • ភ្នំពេញ: អស់​រយៈពេល​ជិត​ ១១ ​ខែ បន្ទាប់ពី​ការដាក់​លក់​ដំណាក់កាល​ទី​ ១ ​ប្រកប​ដោយ​ជោគជ័យ​កាលពី​ខែធ្នូ​ឆ្នាំមុន Forest Harmony ជា​ក្រុមហ៊ុន​វិនិយោគ​រួម​រវាង​វិនិយោគិន​ក្នុង​ស្រុក និង​វិនិយោគិន​ជនជាតិ​បារាំង​កាលពី​ថ្ងៃ​សៅរ៍ បាន​ប្រកាស​បើក​ដំណើរការ​គម្រោង​អភិវឌ្ឍន៍​ដំណាក់កាល​ទី​ ២ ​របស់ខ្លួន​មាន​ឈ្មោះ​ថា Golf Harmony រួមមាន ទីលាន​វាយ​កូនហ្គោល និង​គម្រោង​អគារ​ខុនដូ​។

  • ភ្នំពេញ៖ បន្ទាប់​ពី​​​ការ​​ប្រឡង​​ប្រណាំង​​​ថត​វីដេអូ ​​ដើម្បី​ផ្សព្វផ្សាយ​​ពី​សក្តានុពល​នៃ​តំបន់​សហគមន៍​​​​ទេសចរណ៍ និង​​​​​អេកូ​ទេសចរណ៍​ ​បាន​រៀបចំ​​ ២ រដូវកាល​មក​​ហើយ​​ ខណៈ​​ការ​ប្រឡង​ប្រណាំង​រដូវកាល​ទី​៣ ​​​ឆ្នាំ ​២០២០​ ក៏​បាន​មក​​ដល់​​​។

  • ភ្នំពេញៈ រដ្ឋមន្ត្រីក្រសួង​អប់រំ​យុវជន និង​កីឡា​លោក​ ហង់ជួន ណារ៉ុន បានអនុញ្ញាត​ជា​​គោលការណ៍​ឱ្យ​គ្រឹះស្ថានសិក្សា​ឯកជន​ទាំងអស់​អាច​ដំណើរការឡើង​វិញ​នូវ​សេវា​រថយន្ត​ដឹក​សិស្ស សេវា​បណ្ណាល័យ សកម្មភាព​អប់រំ​កាយ និង​កីឡា និង​សេវា​អាហារដ្ឋាន ប៉ុន្តែ​ត្រូវអនុវត្ត​នូវ​គោលការណ៍​ប្រតិបត្តិ​ស្តងដា​ (SOP) ​ឱ្យ​ម៉ឺងម៉ាត់​។

  • តាកែវៈ មន្ត្រី​ការពារ​ទេសភាព​បឹង​ព្រែកល្ពៅ​ឱ្យ​ដឹងថា សម្បុក​សត្វ​ចង្កៀលខ្យង​ជាង​ ២ ០០០ ​សម្បុក​ បានបង្ហាញ​វត្តមាន​ជា​លើកដំបូង​ក្នុង​រយៈពេល​ជាង​ ១៥ ​ឆ្នាំ​ ដែល​នេះ​ជា​កំណត់ត្រា​ថ្មី​ដែល​ពុំ​ធ្លាប់មាន​នៅក្នុង​តំបន់​ការពារ​ទេសភាព​បឹង​ព្រែកល្ពៅ​ ស្ថិត​ក្នុងស្រុក​បុរីជលសា និង​ស្រុក​កោះអណ្តែត ខេត្តតាកែវ​។

  • ស្ទឹងត្រែង/ភ្នំពេញៈ គ្រឿងញៀន​ប្រភេទ​មេតំហ្វេតាមីន​ (ice) ​ចំនួន​ ៤១ ​គីឡូក្រាម​ត្រូវ​បាន​មន្ត្រី​អាវុធហត្ថ​ខេត្ត​ស្ទឹងត្រែង​បញ្ជូន​ទៅ​សាលាដំបូង​ខេត្ត​នាថ្ងៃទី​ ២៤ តុលា បន្ទាប់ពី​បង្ក្រាប​នៅ​ស្រុក​បុរី​ឣូរស្វាយសែនជ័យ​ពី​ថ្ងៃ​ទី​ ២៣ តុលា ខណៈ​ម្ចាស់​កំពុង​រត់គេច​ខ្លួន​។