ភ្នំពេញៈ ជនភៀសខ្លួនកម្ពុជា ២ នាក់ដែលប្រឈមនឹងការនិរទេសពីអាមេរិកត្រូវបានលើកលែងទោសដោយអភិបាលរដ្ឋកាលីហ្វ័រនីញ៉ាលោក Jerry Brown កាលពីថ្ងៃសៅរ៍។
ពលរដ្ឋកាលីហ្វ័រនីញ៉ា ២ នាក់នេះមានឈ្មោះ សុខា ឆាន និង ផាន់ ភាជ គឺមានឈ្មោះនៅក្នុងចំណោមមនុស្ស ៥៦ នាក់ដែលត្រូវបានលើកលែងទោសដោយលោក Brown។
លោក ឆាន បានចូលដីអាមេរិកកាលពីអាយុ ១៣ ឆ្នាំនៅពេលគ្រួសារលោករត់គេចពីរបបខ្មែរក្រហមបានជាប់ពន្ធនាគារជិត ១ ឆ្នាំពីបទល្មើសមជ្ឈិមពាក់ព័ន្ធករណីបង្ករបួសលើរាងកាយដៃគូរបស់គាត់។ នេះបើតាមការិយាល័យរបស់លោកអភិបាល។
បន្ទាប់ពីការកាត់ទោស និងចេញពីពន្ធនាគារលោក ឆាន បានចិញ្ចឹមកូន ៥ នាក់ និងធ្វើជាទាហានបម្រុងរបស់អាមេរិក។
កូនស្រីលោកបានសរសេរទៅការិយាល័យលោកអភិបាលថា៖ «មិនថាគាត់កំពុងធ្វើការ កំពុងធ្វើជាងម៉ាស៊ីន ឬដុតនំរយៈពេល ១២ ទៅ ១៣ ម៉ោងរៀងរាល់ថ្ងៃដោយគ្មានសម្រាកនោះទេ គាត់មិនដែលបោះបង់យើងចោលឡើយ»។
លោក ភាជ បានចូលទៅក្នុងទឹកដីអាមេរិកកាលអាយុ ១ ឆ្នាំ និងបានជាប់ពន្ធនាគាររយៈពេល ៦ ខែពីបទកាន់កាប់សារធាតុហាមឃាត់ដើម្បីលក់ និងអំពើរារាំងមន្ត្រីនគរបាលម្នាក់។ ចាប់តាំងពីពេលនោះមកលោកបាន «រស់នៅក្នុងជីវិតស្មោះត្រង់ និងមានសីលធម៌»។ នេះបើតាមការិយាល័យលោកអភិបាល។
លោក Bill Herod ស្ថាបនិកនៃមណ្ឌលទ្រទ្រង់ជនមាតុភូមិនិវត្តន៍សមាហរណកម្មដែលជាអង្គការក្រៅរដ្ឋាភិបាលនៅភ្នំពេញបានហៅការលើកលែងទោសនេះថា «ដំណឹងដ៏ល្អ»។
ប៉ុន្តែលោកថាការលើកលែងនេះមិនមែនទាំងស្រុងចំពោះការនិរទេសពួកគេទេ៕ PS