.jpg)
ជនសង្ស័យដែលកាប់ម្តាយស្លាប់ត្រូវតុលាការចោទ និងឃុំខ្លួននៅពន្ធនាគារ។ រូបថត ហ្វេសប៊ុក
តាកែវៈ តុលាការខេត្តតាកែវកាលពីថ្ងៃទី ៨ សីហា បានសម្រេចចោទប្រកាន់ និងឃុំខ្លួនបុរសម្នាក់ក្នុងពន្ធនាគារខេត្ត បន្ទាប់ពីនគរបាលចាប់ខ្លួនកាលពីវេលាទៀបភ្លឺថ្ងៃទី ៧ សីហា ពាក់ព័ន្ធយកពូថៅកាប់ក្បាលម្តាយខ្លួនឯងស្លាប់ ប្រព្រឹត្តនៅក្នុងភូមិព្រៃឈើទាលលើ ឃុំអង្គតាសោម ស្រុកត្រាំកក់ ។
បើតាមលោក សែម សុជាតិ ប្រធានការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាល ខេត្តតាកែវថ្លែងពីម្សិលមិញថា បុរសសង្ស័យឈ្មោះ ជន បូណាត អាយុ ៣៤ ឆ្នាំ ត្រូវចៅក្រមស៊ើបសួរ ឃុំខ្លួនបណ្តោះអាសន្ននៅក្នុងពន្ធនាគារខេត្តហើយ។ រីឯស្ត្រីរងគ្រោះជាម្តាយឈ្មោះ ប៊ុត ខាន់ណារ៉េត អាយុ ៥៩ ឆ្នាំ។ «ជនម្នាក់នេះបានប្រព្រឹត្តបទល្មើសជាក់ស្តែង។ ខ្ញុំគ្រាន់តែដឹងថា តុលាការចោទពីបទឃាតកម្ម តែខ្ញុំមិនចាំមាត្រាទេហើយតុលាការបង្គាប់ឲ្យសមត្ថកិច្ចខ្ញុំនាំគាត់ទៅពន្ធនាគារខេត្ត»។
លោក សុ សុខជា អធិការរងនៃអធិការដ្ឋាននគរបាលស្រុកត្រាំកក់ថ្លែងថា បើតាមសម្តីសាច់ញាតិជនសង្ស័យថា ជនម្នាក់នេះមានប្រពន្ធ និងមានកូនប្រុសចំនួន ២ នាក់ ដែលកូនប្រុសច្បងអាយុជាង ១០ ឆ្នាំ ប៉ុន្តែប្រពន្ធរបស់គាត់ មិនរស់នៅជាមួយគាត់ទេ ព្រោះជនសង្ស័យចេះតែបង្កជម្លោះជាមួយប្រពន្ធ ហើយនាងបានរត់ទៅរស់នៅជាមួយម្តាយរបស់នាងនៅស្រុកបាទី។
បើតាមការបញ្ជាក់ពីសាច់ញាតិថា ជនសង្ស័យមិនមែនជាមនុស្សញៀនស្រា ឬញៀនគ្រឿងញៀនអីទេ តែជនសង្ស័យមានជំងឺសរសៃប្រសាទ ដោយមានលិខិតបញ្ជាក់ពីគ្រូពេទ្យអំពីជំងឺសរសៃប្រសាទ។ ប៉ុន្តែសាច់ញាតិរបស់ជនសង្ស័យ រកលិខិតពេទ្យមិនទាន់ឃើញ។ លោកថា៖ «សាច់ញាតិជនល្មើសប្រាប់ខ្ញុំថា មានលិខិតពេទ្យ តែដោយសារថ្ងៃកើតហេតុជាប់រវល់មើលម្តាយរងគ្រោះទើបរកមិនឃើញ»។
បើតាមលោក សុខជា មុនកើតហេតុ ជនសង្ស័យ ទើបមកពីលេងប្រពន្ធកូននៅស្រុកបាទី ហើយបានមកដល់ផ្ទះនៅម៉ោង ៣ ទៀបភ្លឺឈានចូលព្រឹកថ្ងៃទី ៧ ខែសីហា។ គ្រានោះអ្នកជិតខាង បានឮសំឡេងជនសង្ស័យស្រែកឡូឡាក៏ផ្អើលទៅមើលស្រាប់តែឃើញស្ត្រីរងគ្រោះ ដេកស្តូកស្តឹងលើគ្រែ ដោយមានស្នាមកាប់ចំក្បាល ខណៈដៃជនសង្ស័យមានកាន់ពូថៅ១៕
