ភ្នំពេញៈ បុរសជាតិចិនតៃវ៉ាន់ និងខ្មែរ ៤ នាក់ដែលជាប់សង្ស័យក្នុងរឿងកែច្នៃ និងជួញដូរគ្រឿងញៀនរួមទាំងថ្នាំញៀនជិត ២៧ គីឡូក្រាម និងវត្ថុធាតុដើមកែច្នៃគ្រឿងញៀនមួយចំនួនផងនោះត្រូវបានសមត្ថកិច្ចបញ្ជូនទៅសាលាដំបូងរាជធានីភ្នំពេញភ្លាមៗបន្ទាប់ពីមន្ត្រីនគរបាលក្រសួងមហាផ្ទៃបង្ហាញមុខពួកគេកាលពីម្សិលមិញ។ នេះបើតាមលោក ឡឹក វណ្ណៈ ប្រធានមន្ទីរប្រយុទ្ធប្រឆាំងគ្រឿងញៀននៃក្រសួងមហាផ្ទៃ។
លោក ឡឹក វណ្ណៈ បានថ្លែងថាក្រុមជនសង្ស័យទាំង ៤ នាក់ និងគ្រឿងញៀនជិត ២៧ គីឡូត្រូវបានបញ្ជូនទៅតុលាការ បន្ទាប់ពីសាកសួរ និងបង្ហាញមុខជនសង្ស័យរួចរាល់ក្រោយពេលបង្ក្រាបបាននៅថ្ងៃទី ៧ ខែមេសា ឆ្នាំ ២០១៨។
បើតាមលោក វណ្ណៈ ជនសង្ស័យទាំងនោះរួមមាន ទី ១- ឈ្មោះ Lee Hong Yu ជនជាតិចិនតៃវ៉ាន់ ទី ២៖ ឈ្មោះ Hsu Yao Feng ជនជាតិចិនតៃវ៉ាន់ ទី ៣- ឈ្មោះ ឈរ ប៊ុនឆាយ និងទី ៤- ឈ្មោះ សំ កុកឈាង ដែលពួកគេ ២ នាក់នេះជាជនជាតិខ្មែរ ហើយប្រតិបត្តិការនេះបានធ្វើឡើងនៅតាម ៣ គោលដៅផ្សេងៗគ្នា។
លោក វណ្ណៈ បានបន្ថែមថាគោលដៅទី ១ ប្រព្រឹត្តនៅចំណុចផ្លូវអង្គរ សង្កាត់ឫស្សីកែវ ខណ្ឌឫស្សីកែវ, គោលដៅទី ២ នៅផ្ទះលេខ ១២២ ផ្លូវលេខ ២ ក្នុងបុរីកាំកូស៊ីធី សង្កាត់ឫស្សីកែវ ខណ្ឌឫស្សីកែវ និងគោលដៅទី ៣ នៅផ្ទះលេខ ១១២E2 ផ្លូវ ១៧៣ សង្កាត់ទួលស្វាយព្រៃ ១ ខណ្ឌចំការមន ដែលប្រតិបត្តិការនេះ សមត្ថកិច្ចបានរឹបអូសគ្រឿងញៀនម៉ាទឹកកក (ICE) ទម្ងន់ ១៨,១៦៦ គីឡូក្រាម, ហេរ៉ូអ៊ីនទម្ងន់ ២១៧,៨៣ ក្រាម និងកេតាមីនទម្ងន់ ៨,៨៣ គីឡូក្រាម ដែលសរុបទាំងអស់មាន ២៦,៧៦៨ គីឡូក្រាម។
លោក វណ្ណៈ បានបញ្ជាក់ថា៖ «គ្រឿងញៀនប្រភេទអាយ (ICE) និងវត្ថុធាតុដើមនេះគឺជនល្មើសបាននាំចេញមកពីប្រទេសឡាវដោយយកប្រទេសកម្ពុជាជាកន្លែងកែច្នែ ដើម្បីនាំចេញទៅវៀតណាម និងប្រទេសទី ៣ ផ្សេងទៀត ប៉ុន្ដែមិនមានកន្លែងផលិតទេ» ។
លោកបានបន្ថែមថា៖ «ខ្ញុំលើកឧទាហរណ៍មួយថា គេកែច្នៃហ្នឹងគឺគេទិញប្រភេទគ្រឿងញៀនដែលមានសារធាតុញៀនត្រឹម ៧០ ភាគរយ ហើយគេយកមកកែដាក់បន្ថែមសារធាតុញៀន ១០០ ភាគរយ ឬដកសារធាតុញៀនត្រឹម ៥០ ភាគរយវិញ ហើយពេលគេកែច្នែរួច គេយកវាទៅលក់តាមគោលដៅរបស់គេតែម្ដង»។
លោក សៀង សុខ ព្រះរាជអាជ្ញារងអមសាលាដំបូងរាជធានីភ្នំពេញបានប្រាប់កាលពីម្សិលមិញថា ពាក់ព័ន្ធនឹងករណីនេះមន្ត្រីជំនាញបានបញ្ជូនសំណុំរឿងដល់តុលាការហើយ បន្ទាប់ពីព្រះរាជអាជ្ញាសាកសួររួចរាល់នឹងចោទប្រកាន់ទៅតាមនីតិវិធីច្បាប់ស្ដីពីគ្រឿងញៀន ប៉ុន្តែពេលនេះតុលាការកំពុងពិនិត្យនៅឡើយ។
លោកបញ្ជាក់ថា៖ «យើងអនុញ្ញាតឲ្យសមត្ថកិច្ចជំនាញបង្ហាញមុខជនសង្ស័យជាសាធារណៈជាមុនសិន ហើយបញ្ជូនទាំងជនសង្ស័យ និងវត្ថុតាងនានាទៅតុលាការ។ ដូចខ្ញុំជម្រាបអ៊ីចឹងតុលាការកំពុងពិនិត្យគឺយើងបានទទួលសំណុំរឿងហើយ»។
បើតាមរបាយការណ៍របស់មន្ទីរប្រឆាំងគ្រឿងញៀនរយៈពេល ៤ ខែដើមឆ្នាំនេះគិតត្រឹមថ្ងៃទី ១ ខែមករាដល់ថ្ងៃទី ១១ ខែមេសាជាលទ្ធផលនៃបង្ក្រាបបទល្មើសគ្រឿងញៀនបាន ២១៦៦ ករណីឃាត់ខ្លួន ៤៣០៤ នាក់ ស្រី ៣៧៣ នាក់ជនបរទេសចំនួន ៧១ នាក់ក្នុងនោះករណីជួញដូររក្សាទុក កែច្នៃ ដាំដុះ ១៣៨០ ករណី, ប្រើប្រាស់ ៧៨៦ ករណី, អនុវត្ដដីកា ៧៤ ដីកា។ រឹបអូសសារធាតុញៀនគ្រប់ប្រភេទ ៦៤ គីឡូក្រាម និង ២៥៦ កញ្ចប់, កញ្ឆាក្រៀម ២២ គីឡូក្រាម និង ១២២៦៩៤ ដើម និងសម្ភារចាប់យកមានរថយន្ដ ២៣ គ្រឿង,ម៉ូតូ ៦២៦ គ្រឿង,ទូរស័ព្ទ ១៥១១ គ្រឿង, ជញ្ជីង ៨៣ គ្រឿង, អាវុធខ្លី ៧ ដើម និងអាវុធវែង ៧ ដើម៕