កែប៖ នគរបាលខេត្តកែបបានបញ្ចូនអ្នកបើកបររថយន្តតាក់ស៊ីម្នាក់ ទៅសាលាដំបូងខេត្តកំពត នៅថ្ងៃទី ២២ ខែមេសានេះ បន្ទាប់ពីសមត្ថកិច្ចចាប់ឃាត់ខ្លួនបានកាលពីថ្ងៃទី ២១ មេសា ខណៈបុរសរូបនេះកំពុងបើករថយន្ត ដឹកជនជាតិវៀតណាមចំនួន ៧ នាក់ ចេញពីខេត្តព្រះសីហនុ គេចគោលដៅបិទខ្ទប់ចូលមកក្នុងខេត្តកែប ដើម្បីបន្តឆ្លងដែនចូលទៅប្រទេសវៀតណាម។
លោក ប៉ូង សុខេង ស្នងការរងទទួលការងារផែនព្រហ្មទណ្ឌខេត្តកែប បានប្រាប់នៅថ្ងៃទី ២២ មេសានេះថា បុរសសង្ស័យឈ្មោះ សាន គៀន អាយុ ៣៧ ឆ្នាំ ជាអ្នកបើកបររថយន្តតាក់ស៊ី រស់នៅភូមិកំពង់ដូង ឃុំកំពង់ត្នោត ស្រុកឈូក ខេត្តកំពត។
លោកប្រាប់ថា៖ «បុរសជាអ្នកបើករថយន្តតាក់ស៊ីម្នាក់នោះ បានបំពាននឹងបទបញ្ជានៃបម្រាមបិទខ្ទប់ ហើយសមត្ថកិច្ចបានអនុវត្តតាមច្បាប់ស្តីពីការទប់ស្កាត់ការរីករាលដាលជំងឺកូវីដ តាមមាត្រា ១១»។
យោងតាមមាត្រា ១១ នៃច្បាប់ស្តីពីវិធានការទប់ស្កាត់ការឆ្លងរាលដាលជំងឺកូវីដ ១៩ និងជំងឺឆ្លងកាចសាហាវដទៃទៀត បើបុរសខាងលើត្រូវបានតុលាការរកឃើញថា ពិតជាបានប្រព្រឹត្តមែននោះ នឹងត្រូវជាប់ពន្ធនាគារពី ៦ ខែ ទៅ ៣ ឆ្នាំ និងពិន័យប្រាក់ពី ២ លាន ទៅ ១០ លានរៀល។
លោក សុខេង រៀបរាប់ថា កាលពីល្ងាចថ្ងៃទី ២១ មេសា មានរថយន្ត ១ គ្រឿង ដែលបើកបរដោយបុរសសង្ស័យខាងលើ បានដឹកជនជាតិវៀតណាម ៧ នាក់ (ប្រុស ២ នាក់) មកពីខេត្តព្រះសីហនុ ចូលក្នុងទឹកដីខេត្តកែប លើផ្លូវជាតិលេខ ៣៣ ហើយកម្លាំងសមត្ថកិច្ចដែលយាមគោលដៅបិទខ្ទប់ បានធ្វើការឃាត់រថយន្តនោះ និងបញ្ចូនទៅស្នងការដ្ឋាននគរបាលខេត្តកែប ដើម្បីចាត់ការ។
ចំពោះជនជាតិវៀតណាមទាំង ៧ នាក់ ដោយអនុវត្តតាមបទបញ្ជាពីអយ្យការអមសាលាដំបូងខេត្តកែប គឺត្រូវផាកពិន័យអន្តរកាលតាមច្បាប់ស្តីពីវិធានការទប់ស្កាត់ជំងឺកូវីដ ១៩ ដោយពិន័យចន្លោះពី ១ លាន ទៅ ៥ លានរៀល ហើយត្រូវបញ្ចូនទៅមណ្ឌលចត្តាឡីស័ក ១៤ ថ្ងៃ។ ទោះយ៉ាងណាលោកមិនបានប្រាប់ថា តើក្រោយធ្វើចត្តាឡីស័ក នឹងត្រូវបណ្តេញចេញពីប្រទេសកម្ពុជា ឬយ៉ាងណាទេ។
នៅថ្ងៃនេះ ភ្នំពេញ ប៉ុស្តិ៍ បានទាក់ទងទៅលោក ហ៊ុន ឌី ស្នងការរងទទួលការងារផែនអន្តោប្រវេសន៍ខេត្តកែប តែមិនអាចទាក់ទងបាន។ ប៉ុន្តែបើតាមមន្រ្តីនគរបាលមួយរូបដែលសុំមិនបញ្ចេញឈ្មោះបានថ្លែងថា ក្រុមជនជាតិវៀតណាមប្រុស-ស្រីទាំង ៧ នាក់ ក្រោយពីធ្វើចត្តាឡីស័ករួចនឹងត្រូវបណ្តេញចេញពីប្រទេសកម្ពុជា ទៅប្រទេសវៀតណាម វិញ។
លោក សុខេង បញ្ជាក់ប្រាប់ថា ចាប់តាំងពីថ្ងៃអនុវត្តបទបញ្ជាបិទខ្ទប់ខេត្តមក គឺនៅខេត្តកែប ទើបកើតមានការល្មើសនឹងបម្រាមតែ ១ ករណីនេះទេ។
ចំណែកនៅខេត្តព្រះសីហនុ លោក ជួន ណារិន្ទ ស្នងការនគរបាលខេត្តជាប់មាត់សមុទ្រមួយនេះ បានឱ្យដឹងនៅថ្ងៃទី ២២ មេសាថា ពេលនេះមិនមានជនបំពាននឹងបម្រមឆ្លងកាត់ខេត្តទៀតទេ។
លោកថ្លែងថា៖ «យើងនៅតែបន្តពង្រឹងការងារនេះ ដោយតឹងតែងបំផុត ហើយបើសិនជាមានករណីល្មើស និងវិធានការបិទខ្ទប់ខេត្ត គឺយើងអនុវត្តតាមច្បាប់»៕