.jpg)
បុរសម្នាក់ត្រូវបានឃាត់ខ្លួន ករណីចាក់សម្លាប់ក្មេងស្រីសិស្សសាលាម្នាក់ កាលពីថ្ងៃទី ៥ មករា។ រូបថត នគរបាល
កណ្តាលៈ ជនម្នាក់ដែលចាក់សម្លាប់ក្មេងស្រីជាសិស្សសាលាម្នាក់ត្រូវបានចៅក្រមស៊ើបសួរសម្រេចចេញដីកាឃុំខ្លួនក្នុងពន្ធនាគារខេត្តកណ្តាលកាលពីល្ងាចថ្ងៃទី ៦ មករា បន្ទាប់ពីចាប់ខ្លួនប៉ុន្មានម៉ោង ក្រោយពីបង្កហេតុកាលពីថ្ងៃទី ៥ មករា ប្រព្រឹត្តនៅភូមិព្រែកហូរកើត សង្កាត់ព្រែកហូរ ក្រុងតាខ្មៅ ខេត្តកណ្ដាល។
លោក សូ សារិន អ្នកនាំពាក្យតុលាការខេត្តកណ្តាលពីម្សិលមិញមិនអាចទាក់ទងតាមទូរស័ព្ទ ដើម្បីសុំបញ្ជាក់ពីករណីនេះបានទេ ប៉ុន្តែបើយោងតាមដីកាដែលភ្នំពេញប៉ុស្តិ៍ទទួលបានពីម្សិលមិញចុះថ្ងៃទី ៦ មករា ដែលមានចុះហត្ថលេខាដោយ លោកចៅក្រមស៊ើបសួរឈ្មោះ ជួន វណ្ណៈ បានចេញដីកាឃុំខ្លួនជនសង្ស័យឈ្មោះ ទូច សុជាតិ ហៅ អាដំរី អាយុ ៤១ ឆ្នាំ ដាក់ពន្ធនាគារខេត្តកណ្តាលបណ្តោះអាសន្នក្នុងបទចោទឃាតកម្មគិតទុកជាមុនតាមបញ្ញត្តិមាត្រា ២០០ នៃក្រមព្រហ្មទណ្ឌ។
ពាក់ព័ន្ធអំពើឃាតកម្មនេះលោក ឯម ចាន់រ៉ាត់ នាយប៉ុស្តិ៍នគរបាលសង្កាត់ព្រែកហូរប្រាប់កាលពីថ្ងៃទី ៥ មករា ថា ក្មេងរងគ្រោះជាកូនច្បង ហើយមានប្អូនប្រុសតូចៗ ២ នាក់ទៀត ដែលមានឪពុកជាកម្មករសំណង់ រីឯម្តាយលក់បន្លែ។ ចំណែក ជនសង្ស័យមានបងប្អូន ៣ នាក់ប៉ុន្តែពួកគេគ្មានម្តាយឪពុកទេ និងជួលបន្ទប់ស្នាក់នៅក្បែរបន្ទប់ក្មេងស្រីរងគ្រោះដែរ។
លោកបន្តតាមសម្តីក្មេងប្រុសឈ្មោះ ផេងរិន ណារុង អាយុ ១០ ឆ្នាំ ជាប្អូនរបស់ជនរងគ្រោះថា មុនពេលកើតហេតុប្រហែលជាម៉ោងជាង ៦ កន្លះព្រឹកថ្ងៃទី ៥ មករា ឪពុកម្តាយគេបានចេញពីផ្ទះអស់នៅសល់តែខ្លួន (ក្មេងប្រុស) និងបងស្រីនៅក្នុងបន្ទប់ជួលតែ ២ នាក់។ ពេលនោះជនរងគ្រោះបានប្រើរូបគេឱ្យទៅទិញបាយក្តាំងហូប ហើយជនសង្ស័យឱ្យលុយមកគេចំនួន ៥០០ រៀលដើម្បីទិញបារីឱ្យជនសង្ស័យជក់។
លោកថា ក្រោយពីទិញបារីរួចមកក្មេងប្រុសបានត្រឡប់មកបន្ទប់វិញ ក៏ឃើញជនសង្ស័យកំពុងឈរនៅមុខបន្ទប់ជួលរបស់ខ្លួនហើយប្អូនប្រុសរបស់ជនរងគ្រោះបានហុចបារីឱ្យជនសង្ស័យ។ គ្រានោះប្អូនរបស់ជនរងគ្រោះបានឃើញបងស្រីរបស់ខ្លួនដេកនៅលើពូកក្នុងបន្ទប់ជួលរបស់ខ្លួន ដោយមានឈាមជោកខ្លួនហើយបានប្រាប់ឱ្យជនសង្ស័យយកបងស្រីខ្លួនទៅពេទ្យ។
បើតាមលោក ឯម ចាន់រ៉ាត់ ថា នៅពេលនោះគេបានឃើញជនសង្ស័យបីបងស្រីរបស់ខ្លួនដើរទៅរកពេទ្យភូមិនៅក្បែរនោះដែរតែដោយគ្រូពេទ្យឃើញសភាពរបួសធ្ងន់ធ្ងរពេកទើបដេញជនសង្ស័យឱ្យទៅមន្ទីរពេទ្យបង្អែកក្រុងតាខ្មៅ។ ប៉ុន្តែជនរងគ្រោះបានដាច់ខ្យល់ស្លាប់ពេលបញ្ជូនដល់មន្ទីរពេទ្យជ័យជំនះ។
លោកថ្លែងថា៖ «ដំបូងអ្នកភូមិឃើញជនសង្ស័យបីជនរងគ្រោះដែរតែ គេមិនចាប់អារម្មណ៍ថាជាជនល្មើស។ ក្រោយមកទើបសមត្ថកិច្ចហៅជនសង្ស័យមកសាកសួរទើបដឹងថា ជននោះជាអ្នកសម្លាប់ក្មេងស្រីរងគ្រោះ»។
លោកប្រាប់ថា តាមចម្លើយរបស់ជនសង្ស័យបានសារភាពថា រូបគេបានចាប់ក្មេងស្រីរងគ្រោះរំលោភសេពសន្ថវៈតាំងពី ២ ទៅ ៣ ថ្ងៃមុនថ្ងៃចាក់សម្លាប់ជនរងគ្រោះទៅទៀត។ ប៉ុន្តែដោយជនសង្ស័យខ្លាចក្មេងរងគ្រោះយករឿងនេះទៅនិយាយប្រាប់ឪពុកម្តាយនាងទើបនៅព្រឹកថ្ងៃទី ៥ មករា ជនសង្ស័យក៏រៀបចំគម្រោងសម្លាប់ជនរងគ្រោះតែម្តងទៅ។
បើតាមការធ្វើកោសល្យវិច័យពីសមត្ថកិច្ចជំនាញពិនិត្យឃើញថា ក្មេងស្រីរងគ្រោះត្រូវជនល្មើសចាក់ត្រូវចុងដង្ហើម ១ កន្លែងនៅត្រង់ក្បាលពោះពី ១ ទៅ ២ កន្លែងទៀតដោយកាំបិតចុងស្រួច៕
