.jpg)
ភ្នំពេញៈ បុរសជាប់ចោទម្នាក់ត្រូវបានតុលាការកំពូលប្រកាសសាលដីកាកំបាំងមុខ ដោយតម្កល់ទោសជាប់គុកអស់ ១ ជីវិតដដែល បន្ទាប់ពីបើកសវនាការជំនុំជម្រះរួចភ្លាមៗកាលពីម្សិលមិញពាក់ព័ន្ធករណីចាក់សម្លាប់ម្តាយមីងសាច់ថ្លៃ ប្រព្រឹត្តកាលពីឆ្នាំ ២០១៤ នៅសង្កាត់ទឹកថ្លាខណ្ឌសែនសុខ រាជធានីភ្នំពេញ ។
លោក ចៅក្រម សឹង បញ្ញាវុឌ្ឍ ប្រធានក្រុមប្រឹក្សាជំនុំជម្រះបានអានសាលដីកាកំបាំងមុខជនជាប់ចោទថា សំណុំរឿងដែលមានជនជាប់ចោទឈ្មោះ ឆៃ យក់លាភ ហៅ រ៉ែន អាយុ ៣១ ឆ្នាំនេះក្រោយពីបានស្តាប់ការសន្និដ្ឋានរបស់មេធាវីជនជាប់ចោទ និងក្រោយស្តាប់ការសន្និដ្ឋានរបស់តំណាងមហាអយ្យការមក ក្រុមប្រឹក្សាបានយល់ឃើញថា៖ «យោងចម្លើយរបស់ជនជាប់ចោទនៅតុលាការថ្នាក់ក្រោមថា ពេលកើតហេតុខ្លួនកំពុងអង្គុយហូបបាយ ហើយក៏ឃើញម្តាយមីងរបស់ខ្លួនឈ្មោះ ឆឹម សុខគីម អាយុ ៣៣ ឆ្នាំបានដួលដេកប្រឡាក់ឈាម ហើយខ្លួនបានដឹកជនរងគ្រោះទៅមន្ទីរពេទ្យដែលចម្លើយនេះមិនពិតទេ។ ព្រោះបើតាមកំណត់ហេតុនគរបាលថា ជនជាប់ចោទពិតជាបានចាក់សម្លាប់ស្ត្រីរងគ្រោះមែន។ ដូច្នេះតុលាការសម្រេចតម្កល់សាលក្រមរបស់សាលាឧទ្ធរណ៍ទុកជាបានការ »។
ថ្លែងក្នុងពេលជំនុំជម្រះកាលពីម្សិលមិញលោក ថាវ វុត្ថា មេធាវីការពារសិទ្ធិឲ្យជនជាប់ចោទបានសន្និដ្ឋានថា៖ «កូនក្តីរបស់ខ្ញុំពិតជាបានចាក់សម្លាប់ម្តាយមីងខ្លួនមែន។ ដូច្នេះសូមក្រុមប្រឹក្សាជំនុំជម្រះពិនិត្យពិចារណាតាមច្បាប់»។
លោកព្រះរាជអាជ្ញា ឌុច គឹមសន តំណាងមហាអយ្យការក៏បានសន្និដ្ឋានដែរថា យោងតាមអង្គហេតុ និងកំណត់ហេតុនគរបាលបញ្ជាក់ថាជនជាប់ចោទពិតជាបានប្រព្រឹត្តបទល្មើសមែន។ ដូច្នេះការសម្រេចសេចក្តីរបស់សាលាដំបូងរាជធានីភ្នំពេញ និងសាលាឧទ្ធរណ៍មានលក្ខណៈត្រឹមត្រូវហើយ ហើយលោកសូមតម្កល់ទុកជាបានការដដែល។
តាមកំណត់ហេតុរបស់តុលាការបានបង្ហាញថាកាលពីថ្ងៃទី ៤ សីហា ឆ្នាំ ២០១៤ ជនជាប់ចោទបានយកកាំបិតចាក់សម្លាប់ស្ត្រីរងគ្រោះ ខណៈកំពុងនៅក្នុងផ្ទះ នៅភូមិចុងថ្នល់ខាងលិច សង្កាត់ទឹកថ្លា ខណ្ឌសែនសុខ និងបានដោះយកគ្រឿងអលង្ការមួយចំនួន ហើយគេចខ្លួនបាត់។ លុះក្រោយមកសមត្ថកិច្ចបានស្រាវជ្រាវចាប់ខ្លួនជនជាប់ចោទបាននៅថ្ងៃទី ១៥ ខែធ្នូ ឆ្នាំ ២០១៤ ក្នុងភូមិកៅ ឃុំបែកចាន ស្រុកអង្គស្នួល ខេត្តកណ្តាល បន្ទាប់ពីជនជាប់ចោទគេចខ្លួនបានជាង ៥ ខែ៕
