បាត់ដំបង៖ ស្នងការដ្ឋាននគរបាលខេត្តបាត់ដំបង បានបញ្ជូនបុរសសង្ស័យម្នាក់ ដែលបានចាប់ប្អូនថ្លៃខ្លួនជាអនីតិជនរំលោភសេពសន្ថវៈជាង ១០ ដង ប្រព្រឹត្តនៅឃុំពេជ្រចិន្តា ស្រុកភ្នំព្រឹក ទៅសាលាដំបូងខេត្តកាលពីម្សិលមិញ បន្ទាប់ពីបានចាប់ឃាត់ខ្លួនកាលពីថ្ងៃទី ២២ ខែកញ្ញា។
លោក ប៊ុន វ៉ាន់ណារ៉ា ប្រធានការិយាល័យប្រឆាំងការជួញដូរមនុស្ស និងការពារអនីតិជនខេត្តបាត់ដំបងប្រាប់ ភ្នំពេញ ប៉ុស្តិ៍ ពីម្សិលមិញថា ជនសង្ស័យឈ្មោះវ៉ា សុភ័ក្រ្ត អាយុ ៣៤ ឆ្នាំ ដែលពាក់ព័ន្ធរំលោភប្អូនថ្លៃឈ្មោះ រ.ថ អាយុ ១៤ ឆ្នាំ ត្រូវបានបញ្ជូនមកដល់ស្នងការដ្ឋាននគរបាលខេត្តបាត់ដំបង កាលពីរសៀលថ្ងៃទី ២៣ ខែ កញ្ញា។ «បន្ទាប់ពីបានធ្វើការសាកសួរបន្ថែមតាមនីតិវិធីច្បាប់ ជនម្នាក់នោះត្រូវបានបញ្ជូនទៅតុលាការហើយ នៅរសៀលថ្ងៃព្រហស្បតិ៍»។
លោក អៀប ម៉ៅ នាយនគរបាលប៉ុស្តិ៍ឃុំ ពេជ្រចិន្តា ឲ្យដឹងថា បើតាមស្រ្តីដែលជាប្រពន្ធជនសង្ស័យ និងត្រូវជាបងស្រីក្មេងស្រីរងគ្រោះបានរៀបរាប់ថា កាលពីវេលាម៉ោងប្រហែល ៦ ល្ងាច ថ្ងៃទី ២២ កញ្ញា គាត់បានចូលក្នុងផ្ទះហើយក៏ទៅទាន់ឃើញប្តីរបស់ខ្លួនកំពុងដោះអាវប្អូនស្រី។ បន្ទាប់ពីជនសង្ស័យឃើញសភាពមិនស្រួលបែបនេះ ក៏បង្អាក់សកម្មភាពរបស់ខ្លួនហើយស្ទុះចេញមកក្រៅផ្ទះ។
នៅពេលបន្ទាប់មកស្រ្តីបងក្មេងស្រីរងគ្រោះបានជជីកសួរប្អូនស្រីហើយក្មេងរងគ្រោះ បានរៀបរាប់ប្រាប់ថា បងថ្លៃបានចាប់នាងរំលោភសេពសន្ថវៈប្រមាណជា ៣ ខែមកហើយ។ ប៉ុន្តែជនសង្ស័យហាមមិនឲ្យក្មេងរងគ្រោះនិយាយប្រាប់បងស្រីរបស់នាងទេ ដោយគំរាមថា បើហ៊ានតែយករឿងនេះទៅប្រាប់គេ គឺជនសង្ស័យនឹងសម្លាប់ចោល។ ដោយសារតែខ្លាចគេសម្លាប់ទើបក្មេងរងគ្រោះចេះតែសម្ងំរហូត។ បន្ទាប់ពីប្អូនស្រីប្រាប់ពីដំណើររឿងមកបងក្មេងស្រីបានទៅប្តឹងនៅប៉ុស្តិ៍នគរបាលឃុំពេជ្រចិន្តា ហើយក្រោយពីទទួលបានបណ្តឹងមកសមត្ថកិច្ចរបស់លោកបានចុះដល់ផ្ទះកើតហេតុ និងនាំជនសង្ស័យមកសាកសួររួមទាំងក្មេងស្រីរងគ្រោះផង។
ក្រោយសាកសួរជនសង្ស័យបានសារភាពថា ខ្លួនពិតជាបានធ្វើសកម្មភាពរំលោភសេពសន្ថវៈទៅលើប្អូនថ្លៃពិតមែន។ ចំណែកក្មេងស្រីរងគ្រោះក៏ប្រាប់សមត្ថកិច្ចដែរថា បងថ្លៃបានចាប់នាងរំលោភប្រហែលជា ៣ ខែមកហើយ ក្នុងឆ្នាំ ២០២០ នេះ។
លោក ម៉ៅ ថ្លែងថា៖ «ដោយសារចម្លើយជនសង្ស័យ និងចម្លើយក្មេងរងគ្រោះឆ្លើយស៊ីចង្វាក់គ្នា ដូច្នេះអាចបញ្ជាក់បានថា ជនសង្ស័យពិតជាប្រព្រឹត្តបទល្មើសទៅលើក្មេងស្រីរងគ្រោះមែន។ ហេតុនេះហើយខ្ញុំក៏ឃាត់ខ្លួនជនសង្ស័យទៅ»។ ក្រោយសាកសួរសមត្ថកិច្ចរបស់លោកបានបញ្ជូនក្មេងស្រីរងគ្រោះទៅមន្ទីរពេទ្យបង្អែកស្រុកភ្នំព្រឹក ដើម្បីឲ្យគ្រូពេទ្យធ្វើកោសល្យវិច័យ ដើម្បីយកជាឯកសារទុកបង្ហាញដល់តុលាការ។
ការរំលោភបំពានផ្លូវភេទ ការប្រើអំពើហិង្សា និងការប្រើកម្លាំងពលកម្មកុមារនៅតែជាក្តីកង្វល់ធំមួយសម្រាប់រដ្ឋាភិបាល និងអង្គការក្រៅរដ្ឋាភិបាល។
លោក អំ សំអាត នាយករងកម្មវិធីស៊ើបអង្កេតអង្គការលីកាដូថ្លែងពីម្សិលមិញថា ពី ១ ឆ្នាំ ទៅ ១ ឆ្នាំនៅតែមានការព្រួយបារម្ភអំពីការរំលោភបំពានលើកុមារបំពានផ្លូវភេទទៅលើកុមារ ការប្រើអំពើហិង្សាលើកុមារ និងការប្រើកម្លាំងពលកម្មកុមារ។ អង្គការលីកាដូ រកឃើញថា ក្នុង ១ ឆ្នាំៗ ការប្រើអំពើហិង្សា និងការរំលោភបំពានផ្លូវភេទលើកុមារ មានមិនតិចជាង ១០០ ករណីទេ។ ដោយឡែករយៈពេលពីដើមខែមករា ដល់ខែកញ្ញា ឆ្នាំ ២០២០ នេះក៏មានប្រហាក់ប្រហែលនឹង ១០០ ករណីដែរ ពាក់ព័ន្ធនឹងហិង្សាផ្លូវភេទ និងការកេងប្រវ័ញ្ចពលកម្មកុមារ។
លោក អំ សំអាត និយាយថា៖ «អ៊ីចឹងយើងនៅតែព្រួយបារម្ភពីស្ថានភាពហ្នឹងកាន់តែកើតមានធ្ងន់ធ្ងរច្រើនទៅៗ។ បើយើងនិយាយពីការបំពានផ្លូវភេទវិញ បានកើតលើកុមារក្រោមអាយុ ១៨ ឆ្នាំហាក់បីដូចជាច្រើនជាងស្រ្តីពេញវ័យទៅទៀត»។
ចំណែកលោកស្រី ញេប សុភាព អគ្គលេខាធិការ នៃអគ្គលេខាធិការដ្ឋាន ក្រុមប្រឹក្សាជាតិកម្ពុជាដើម្បីកុមារក៏ថ្លែងពីម្សិលមិញដែរថា ការការពារសិទ្ធិកុមារនេះ គឺមិនអាចមានយន្តការ ឬបុគ្គលណាមួយធ្វើការតែឯងបានទេ គឺត្រូវតែមានការចូលរួមសហការពីគ្រប់ស្ថាប័នពាក់ព័ន្ធទាំងអស់ ចាប់តាំងពីអង្គការក្រៅរដ្ឋាភិបាល អាជ្ញាធរដែនដី និងត្រូវមានការចូលរួមពីឪពុកម្តាយ និងពីកុមារខ្លួនឯងផ្ទាល់ផងដែរ។ លោកស្រីថា៖ «អ្នកធ្វើការងារជាមួយកុមារ គឺលះបង់ទាំងធនធានទាំងពេលវេលាសម្រាប់គ្រួសារ គឺត្រូវចុះទៅដល់មូលដ្ឋានផ្ទាល់ ដើម្បីណែនាំអប់រំឲ្យយល់ដឹងពីបញ្ហាគ្រោះថ្នាក់គ្រប់រូបភាពដល់ឪពុកម្តាយ ស្រ្តីមានផ្ទៃពោះនិងកុមារ»៕