.jpg)
បុរសចិន (ឆ្វេងអាវយឺតខ្មៅ) និងលុយជិត ១ លានដុល្លារត្រូវបានចាប់នៅព្រលានយន្តហោះភ្នំពេញ ថ្ងៃទី ២៩ ឧសភា។ សហការី
ភ្នំពេញៈ សមត្ថកិច្ចរាជធានីភ្នំពេញ កាលពីយប់ថ្ងៃពុធ បានឃាត់ខ្លួនជនជាតិចិនម្នាក់ជាមួយនឹងទឹកប្រាក់ប្រមាណជិត ១ លានដុល្លារសហរដ្ឋអាមេរិក នៅច្រកទ្វារអាកាសយានដ្ឋានអន្តរជាតិភ្នំពេញ បន្ទាប់ពីរូបគេបានព្យាយាមនាំចូលលុយទាំងនេះពីទីក្រុងហុងកុង ចូលមកប្រទេស កម្ពុជា។
តាមរបាយការណ៍របស់អគ្គនាយកដ្ឋានអន្តោប្រវេសន៍បានឲ្យដឹងថា នៅវេលាម៉ោង ១៥:១០ នាទីរសៀល ប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិភ្នំពេញ បានផ្អាកដំណើរជនជាតិចិនម្នាក់ ឈ្មោះ LIAO JINGQING កើតថ្ងៃទី 16/11/1971 កាន់លិខិត ឆ្លងដែនលេខ EG0115690 មុខរបរនៅប្រទេស ចិន ជាជាងផ្នែកដេគ័រ សណ្ឋាគារ។
តាមរបាយការណ៍ដដែលបានបន្តថា ក្រោយការឃាត់ខ្លួន ក្នុងខ្លួនជនសង្ស័យ រកឃើញមានវត្ថុតាង ដូចជា លិខិតឆ្លងដែនចិនចំនួន ១ ក្បាល ប្រាក់ចំនួន ៨៥៥ ០០០ ដុល្លា (៧២ដុំ) ទូរស័ព្ទដៃចំនួន ១ គ្រឿង និងកាបូបធំចំនួន ២។ សមត្ថកិច្ច ក៏បានសម្រេចឃាត់ខ្លួន និងរក្សាទុកជនសង្ស័យជាមួយនឹងវត្ថុតាង ដើម្បីសាកសួរ និងអនុវត្តនីតិវិធីបន្ត។
លោក កែវ វ៉ាន់ថន អ្នកនាំពាក្យអគ្គនាយកដ្ឋានអន្តោប្រវេសន៍ បានប្រាប់ភ្នំពេញប៉ុស្តិ៍ ពីម្សិលមិញថា សមត្ថកិច្ចនឹងកសាងសំណុំរឿងនេះបញ្ជូនទៅតុលាការយ៉ាងយូរបំផុតថ្ងៃសុក្រនេះ។ លោកក៏បានអះអាងថា សមត្ថកិច្ចនឹងបន្តស៊ើបអង្កេតរកអ្នកពាក់ព័ន្ធផ្សេងទៀត។
លោកបញ្ជាក់ថា៖ «[យើង] កំពុងកសាងសំណុំរឿងបញ្ជូនទៅតុលាការឆាប់ៗហ្នឹង។ ដោយសារថា ជនសង្ស័យមិនអាចបញ្ជាក់ប្រភពដើមនៃសាច់ប្រាក់ ច្បាស់លាស់ ហើយក៏មិនអាចបញ្ជាក់ពីគោលដៅនៃការ ប្រើប្រាស់សាច់ប្រាក់នៅកម្ពុជានេះ អ៊ីចឹងយើងចោទពីបទសង្ស័យពាក់ព័ន្ធនឹងការសម្អាតប្រាក់»។
មាត្រា ៣ នៃច្បាប់ស្ដីពីការប្រឆាំងការសម្អាតប្រាក់ និងហិរញ្ញប្បទាន ភេរវកម្ម បានឲ្យនិយមន័យ នៃការលាងលុយកខ្វក់ថាជាការបំប្លែង ឬផ្ទេរទ្រព្យសម្បត្តិដោយដឹងថា ទ្រព្យសម្បត្តិនេះជាផលនៃបទល្មើស ការបិទបាំង ការក្លែងសភាវៈពិត ប្រភព ទីតាំង សិទ្ធិចាត់ចែង និងការធ្វើលទ្ធកម្ម ការប្រើប្រាស់ទ្រព្យសម្បត្តិ ដើម្បីឲ្យបុគ្គលនោះគេចផុតពីផលវិបាកតាមច្បាប់នូវសកម្មភាពរបស់ខ្លួន។
យោងច្បាប់និយមន័យនេះ ជនល្មើសនឹងត្រូវទទួលទណ្ឌកម្មព្រហ្មទណ្ឌតាមមាត្រា ២៩ ដោយត្រូវផ្តន្ទា ទោសដាក់ពន្ធនាគារចន្លោះពី ៦ ថ្ងៃ ដល់ ១ ឆ្នាំ និងពិន័យជាប្រាក់ចន្លោះពី ១ សែនរៀល ដល់ ៥ លានរៀល ដោយពុំទាន់គិតដល់បទល្មើសទាំងឡាយណាដែលមានបញ្ញតិ្តក្នុងច្បាប់ព្រហ្មទណ្ឌផ្សេងទៀត។
កាលពីថ្ងៃទី ២៣ ខែ មេសា កន្លងទៅ កម្លាំងនគរបាលអន្ដោប្រវេសន៍ និងអគ្គនាយកដ្ឋានគយ និងរដ្ឋាករ ប្រចាំនៅអាកាសយានដ្ឋានអន្ដរជាតិភ្នំពេញ ក៏បានចាប់ខ្លួនជនសង្ស័យជាជនជាតិចិនចំនួន ៣ នាក់ និងបញ្ជូនទៅតុលាការ ពាក់ព័ន្ធនឹងការនាំលុយចំនួន ៣ ៥២០ ០០០ ដុល្លារអាមេរិក ពីទីក្រុងហុងកុង ចូលមកប្រទេស កម្ពុជា ដោយពុំមានការបញ្ជាក់ពីប្រភពហិរញ្ញវត្ថុច្បាស់លាស់ផងដែរ។
លោក ព្រាប កុល នាយកប្រតិបត្តិអង្គការតម្លាភាពកម្ពុជា បានប្រាប់ភ្នំពេញប៉ុស្តិ៍ ពីម្សិលមិញថា នេះជាករណីទី២ ដែលសមត្ថកិច្ចកម្ពុជាបានចាត់វិធានការ នៅព្រលានយន្តហោះអន្តរជាតិភ្នំពេញ ដែលនេះជាសញ្ញាបញ្ជាក់ថា កម្ពុជាជាគោលដៅសំខាន់នៃការលាងលុយកខ្វក់ ជាពិសេសជនបរទេសមកពីចិន។ លោកក៏ បង្ហាញក្តីបារម្ភ និងស្នើឲ្យអាជ្ញាធរកម្ពុជា គួរមានវិធានការលើបញ្ហានេះ ឲ្យបានតឹងរ៉ឹង។
លោកបញ្ជាក់ថា៖ «អាជ្ញាធរមានសមត្ថកិច្ចត្រូវតែរឹតបន្តឹងការត្រួតពិនិត្យនៅតាមច្រកផ្លូវគោក និងផ្លូវទឹកតាមកំពង់ផែដែលមានជនបរទេសធ្វើដំណើរមកពីប្រទេស ចិន»។
កាលពីខែកុម្ភៈ ដើមឆ្នាំនេះ អង្គការឃ្លាំមើលការលាងលុយកខ្វក់អន្តរជាតិ Financial Action Task Force បានដាក់កម្ពុជាក្នុងបញ្ជីពណ៌ប្រផេះរបស់ខ្លួនសាជាថ្មី ដើម្បីត្រួតពិនិត្យលំហូរហិរញ្ញវត្ថុ វិនិយោគ និងពាណិជ្ជកម្មចេញ និងចូលប្រទេស កម្ពុជា ក៏ព្រោះតែអះអាងថា ប្រទេសនេះងាយស្រួលក្នុងការប្រព្រឹត្តសកម្មភាព។
បន្ទាប់ពីការប្រកាសយ៉ាងដូច្នេះ កាលពីខែមេសាថ្មីៗនេះ រដ្ឋមន្ត្រីក្រសួងមហាផ្ទៃ លោក ស ខេង បានចេញសេចក្ដីណែនាំមួយដល់មន្ត្រីព្រំដែនឲ្យពង្រឹងការត្រួតពិនិត្យបន្ថែមទៀត។
ជាពិសេសទៅលើបទល្មើសគ្រឿងញៀន និងការសម្អាតប្រាក់ បន្ទាប់ពីលោកសង្កេតឃើញមានការប៉ុនប៉ងលួចធ្វើសកម្មភាពឧក្រិដ្ឋកម្មឆ្លងដែននៅភូមិសាស្ត្រមួយចំនួនដែលមានការធ្វេសប្រហែស និងខ្វះការប្រុងប្រយ័ត្ន៕
