.jpg)
ក្រុមបុរសជនជាតិចិនក្រោយសមត្ថកិច្ចចាប់ខ្លួននៅខេត្តសៀមរាប។ រូបថត ប៉ូលិស
សៀមរាបៈ នគរបាលអន្តោប្រវេសន៍ខេត្តសៀមរាបបានកសាងសំណុំរឿងបញ្ជូនជនជាតិចិន ៩ នាក់ទៅសាលាដំបូងខេត្តនៅព្រឹកថ្ងៃទី ១១ ធ្នូនេះ បន្ទាប់ពីឃាត់ខ្លួនកាលពីថ្ងៃទី ៨ ធ្នូពាក់ព័ន្ធនឹងករណីចែកចាយវីដេអូអាសអាភាសកុមារបរទេសទៅប្រទេសចិនប្រព្រឹត្តតាមប្រព័ន្ធអ៊ីនធឺណិត។
លោក ជា គឹមសាន្ត ស្នងការរងទទួលផ្នែកអន្តោប្រវេសន៍ខេត្តសៀមរាបបានប្រាប់កាលពីម្សិលមិញថាសមត្ថកិច្ចរបស់លោកបានឃាត់ខ្លួនបុរសជនជាតិចិនទាំងនោះកាលពីថ្ងៃទី ៨ ធ្នូក្នុងនោះរួមមាន ទី ១- ឈ្មោះ PAN ZHIFU អាយុ ៣០ ឆ្នាំ ២- ឈ្មោះ HUANGXINFA អាយុ ២៣ ឆ្នាំ ៣- ឈ្មោះ HUANG FULONG អាយុ ២៧ ឆ្នាំ ៤- ឈ្មោះ WEI JIBO អាយុ ២២ ឆ្នាំ ៥- ឈ្មោះ GU SHENGFENG អាយុ ២០ ឆ្នាំ ៦- ឈ្មោះ LI WEIMING អាយុ ២៥ ឆ្នាំ ៧- ឈ្មោះ PAN XIADONG អាយុ ៣១ ឆ្នាំ ៨- ឈ្មោះ PAN ZONGJI អាយុ ៣៦ ឆ្នាំ និង ទី ៩- ឈ្មោះ DAI GUANGQIANG អាយុ ៣៤ ឆ្នាំ។
លោកបានបញ្ជាក់ថា៖ «រូបភាពអាសអាភាសរបស់កុមារនោះមិនមែនជាកុមារកម្ពុជាទេ ហើយក្រុមនេះបង្ហោះរូបភាពទាំងនេះទៅប្រទេសចិនវិញដោយមានដាក់លេខអាខោនផង។
ប្រសិនបើនរណាចង់ចូលមើលវីដេអូនោះត្រូវបង់លុយចូលអាខោនរបស់គេ។ ពួកគេត្រូវបញ្ជូនទៅតុលាកាខេត្តនៅថ្ងៃទី ១១ ធ្នូ ហើយ»។
លោកវរសេនីយ៍ឯក តូច សុគន្ធ ប្រធានការិយាល័យស៊ើបអង្កេត និងអនុវត្តនីតិវិធីនៃស្នងការដ្ឋាននគរបាលខេត្តសៀមរាបបានប្រាប់ឲ្យដឹងដែរថា ក្រុមជនជាតិចិនទាំង ៩ នាក់នោះត្រូវសមត្ថកិច្ចរបស់លោកស្រាវជ្រាវ និងឃាត់ខ្លួននៅក្នុងទីតាំង ៣ ផ្សេងគ្នាដែលទីតាំងទី ១ នៅផ្ទះលេខ E២១ បុរីអាក់ខេត ភូមិក្រួស សង្កាត់ស្វាយដង្គំ ក្រុង/ខេត្តសៀមរាបដោយឃាត់ខ្លួនបានម្នាក់រួមនឹងវត្ថុតាងមួយចំនួន។ ២- ផ្ទះវីឡាជួលក្នុងភូមិក្រូស សង្កាត់ស្វាយដង្គំ ក្រុង/ខេត្តសៀមរាបឃាត់ខ្លួនបាន ៥ នាក់រួមនឹងវត្ថុតាងមួយចំនួន និងទីតាំងទី ៣ នៅបន្ទប់លេខ ៣០៥ ផ្ទះសំណាក់មហាមាន ភូមិទ្រាំង សង្កាត់ស្លក្រាម ក្រុង/ខេត្តសៀមរាបឃាត់ខ្លួនបាន ៣ នាក់រួមនឹងវត្ថុតាងមួយចំនួនផងដែរ។
លោកបានប្រាប់ថា៖ «យើងសន្និដ្ឋានដំបូងគឺពាក់ព័ន្ធការចែកចាយវីដេអូ និងសម្ភារអាសអាភាសរបស់កុមារ ប៉ុន្តែយើងកំពុងបន្តនីតិវិធីបន្ថែមក្នុងការស្រាវជ្រាវលម្អិតបន្តទៀត។ យើងពិនិត្យបឋមក្នុងប្រព័ន្ធវីឆាត និងទូរស័ព្ទគឺវាបង្ហាញថាជាករណីអ៊ីចឹង»។
លោកថ្លែងប្រាប់ថា ចំពោះសម្ភារដែលសមត្ថកិច្ចដកហូតបានមានកុំព្យូទ័រយួរដៃមួយចំនួនរួមនឹងទូរស័ព្ទជាច្រើនគ្រឿងដែលពាក់ព័ន្ធនឹងការបម្រើសេវាកម្មល្មើសច្បាប់នេះ៕
