ភ្នំពេញៈ បុរសជាប់ចោទវ័យចំណាស់ម្នាក់កាលពីម្សិលមិញបានស្នើសុំចៅក្រមនៃសាលាឧទ្ធរណ៍នៅក្រៅឃុំបណ្តោះអាសន្នដោយថាខ្លួនមានជំងឺសរសៃប្រសាទខណៈត្រូវសាលាដំបូងរាជធានីភ្នំពេញផ្តន្ទាទោសដាក់ពន្ធនាគារ ១០ ឆ្នាំពាក់ព័ន្ធបទរំលោភសេពសន្ថវៈនារីម្នាក់ កាលពីឆ្នាំ ២០០៧។
ឆ្លើយនៅក្នុងសវនាការពីម្សិលមិញ ជនជាប់ចោទឈ្មោះ រី យឿង អាយុ ៦២ ឆ្នាំ បានប្រាប់ចៅក្រមថា គាត់ជាអ្នកប្រកបរបរទិញអេតចាយ រស់នៅភូមិបុរីកីឡា សង្កាត់វាលវង់ ខណ្ឌ ៧ មករា ហើយនារីរងគ្រោះ ឈ្មោះ ស.ច. ន អាយុ ២៣ ឆ្នាំ (២០០៧) បានមកស៊ីឈ្នួលជួយលក់ផ្លែឈើឲ្យប្រពន្ធគាត់។ នៅពេលនោះគាត់និងស្ត្រីរងគ្រោះស្រឡាញ់គ្នានិងបានរួមភេទជាមួយគ្នាបាន ២ ដង ប៉ុន្តែត្រូវបែកការហើយត្រូវស្ត្រីរងគ្រោះប្តឹងគាត់។
ជនជាប់ចោទបន្តថា កាលពីឆ្នាំ ២០០៧ ក្រោយពីត្រូវស្ត្រីរងគ្រោះ ប្តឹង គឺគាត់បានរត់គេចខ្លួនហើយត្រូវសាលាដំបូងរាជធានីភ្នំពេញជំនុំជម្រះកំបាំងមុខផ្តន្ទាទោសដាក់ពន្ធនាគារ ១០ ឆ្នាំ និងបង្គាប់ឲ្យគាត់សងជំងឺចិត្តឲ្យស្ត្រីរងគ្រោះ ៤ លានរៀល។
ជនជាប់ចោទប្រាប់ចៅក្រមថា៖ «ខ្ញុំត្រូវបានសមត្ថកិច្ចចាប់ខ្លួនបាននៅអំឡុងឆ្នាំ ២០១៦ បន្ទាប់ពីរត់គេចខ្លួនបាន ៩ ឆ្នាំ ហើយខ្ញុំត្រូវឃុំខ្លួននៅពន្ធនាគារព្រៃស។ ប៉ុន្តែពេលនេះខ្ញុំប្តឹងឧទ្ធរណ៍ ព្រោះខ្ញុំមានជំងឺសរសៃប្រសាទ ហើយចំពោះរឿងថា ខ្ញុំចាប់រំលោភសេពសន្ថវៈលើស្ត្រីរងគ្រោះនោះមិនពិតទេ ព្រោះពួកយើងព្រមព្រៀងស្រឡាញ់គ្នាទេ។ដូច្នេះសូមតុលាការអនុញ្ញាតឲ្យខ្ញុំបាននៅក្រៅឃុំផងដើម្បីបានព្យាបាលជំងឺ»។
ស្ត្រីរងគ្រោះឈ្មោះ ស.ច.ន បានឆ្លើយចំពោះមុខចៅក្រមដែរថា៖ «កាលនោះឪពុកខ្ញុំបង្ខំខ្ញុំឲ្យប្តឹងគាត់ តែក្រោយមកខ្ញុំបានដកពាក្យបណ្តឹងវិញ។ ពេលនេះ គាត់សុំតុលាការនៅក្រៅឃុំខ្ញុំក៏យល់ព្រមដែរ ខ្ញុំមិនខ្លាចគាត់សម្លុតគំរាមធ្វើបាបខ្ញុំទេ។ ព្រោះខ្ញុំនិងគាត់ស្រឡាញ់គ្នាចិត្តនិងចិត្ត ហើយកាលនោះខ្ញុំបានរួមភេទជាមួយគាត់ផង»។
មេធាវីការពារសិទ្ធិឲ្យជនជាប់ចោទ លោក ជូង ជូងី បានសន្និដ្ឋានថា កូនក្តីលោកប្តឹងមកសាលាឧទ្ធរណ៍ពេលនេះដោយសាររវាងគាត់និងស្ត្រីរងគ្រោះព្រមស្រឡាញ់គ្នាគ្មានការបង្ខិតបង្ខំរួមភេទទេ។ម្យ៉ាងស្ត្រីរងគ្រោះក៏ដកពាក្យបណ្តឹងវិញហើយដែរ ប៉ុន្តែកូនក្តីលោកមានជំងឺសរសៃប្រសាទកាន់តែខ្លាំងទើបគាត់សុំនៅក្រៅឃុំបណ្តោះអាសន្ន។
លោកថា៖ «កូនក្តីខ្ញុំមានទីលំនៅច្បាស់លាស់និងមានមុខរបរពិតប្រាកដ។ បើតុលាការអនុញ្ញាតឲ្យគាត់នៅក្រៅឃុំគឺខ្ញុំធានាថា គាត់នឹងចូលខ្លួនតាមការបង្គាប់របស់តុលាការ ដូច្នេះសូមតុលាការអនុញ្ញាតឲ្យគាត់បាននៅក្រៅឃុំផង»។
លោកព្រះរាជអាជ្ញា ជុំ សែនសទ្ធា តំណាងមហាអយ្យការសន្និដ្ឋានថា ករណីនេះទាំងស្ត្រីរងគ្រោះនិងជនជាប់ចោទឆ្លើយថា ពួកគេព្រមព្រៀងស្រឡាញ់គ្នា ហើយម្យ៉ាងជនរងគ្រោះ ក៏បានយល់ព្រមឲ្យជនជាប់ចោទនៅក្រៅឃុំដែរ។ ស្ត្រីរងគ្រោះថាបើជនជាប់ចោទនៅក្រៅឃុំគឺនាងមិនខ្លាចគាត់គំរាមទេ។ «ដូច្នេះសូមក្រុមប្រឹក្សាជំនុំជម្រះពិចារណាអនុញ្ញាតឲ្យជនជាប់ចោទនៅក្រៅឃុំតាមការស្នើសុំរបស់គាត់និងយោងលិខិតបញ្ជាក់ពីមន្ទីរពេទ្យពីជំងឺសរសៃប្រសាទគាត់»។
ក្រោយជំនុំជម្រះលោកស្រីចៅក្រម ចាន់ ម៉ាឌីណា ប្រធានក្រុមប្រឹក្សាជំនុំជម្រះថ្លែងថា សាលដីកានេះនឹងប្រកាសនៅថ្ងៃទី ២៨ ខែមករា ខាងមុខនេះ៕