.jpg)
បុរសវ័យចំណាស់ត្រូវបានចាប់ខ្លួនពីបទរំលោភសេពសន្ថវៈលើកុមារីម្នាក់អាយុ ១២ ឆ្នាំ នៅឃុំចារឈូក ស្រុកអង្គរជុំ កាលពីថ្ងៃទី ២០ ខែមីនា។ រូបថត ប៉ូលិស
សៀមរាបៈ សាលាដំបូងខេត្តសៀមរាបពីម្សិលមិញបានសម្រេចចេញដីកាឃុំខ្លួន បុរសវ័យចំណាស់ម្នាក់ពីបទរំលោភសេពសន្ថវៈលើកុមារីម្នាក់អាយុ ១២ ឆ្នាំបន្ទាប់ពីសមត្ថកិច្ចចាប់ខ្លួនតាមបណ្តឹងរបស់ម្តាយក្មេងស្រីរងគ្រោះ នៅឃុំចារឈូក ស្រុកអង្គរជុំ កាលពីថ្ងៃទី ២០ ខែមីនា។
លោកស្រី ដួង ថាវរី ស្នងការរងទទួលផែនប្រឆាំងការជួញដូរមនុស្ស និងការពារអនីតិជននៃស្នងការដ្ឋាននគរបាលខេត្តសៀមរាបប្រាប់ពីម្សិលមិញថា ជនសង្ស័យឈ្មោះ ម៉ៃ មៀន អាយុ ៧៤ ឆ្នាំរស់នៅឃុំចារឈូក ស្រុកអង្គរជុំ។ ចំណែកក្មេងស្រីរងគ្រោះ ឈ្មោះ ឌ. ល អាយុ ១២ ឆ្នាំមានលំនៅឃុំ-ស្រុកជាមួយជនល្មើសដែរ។ ជនសង្ស័យត្រូវបានចៅក្រមស៊ើបសួរលោក មុយ សុភ័ក្រ សម្រេចចេញដីកាឃុំខ្លួនបណ្តោះអាសន្ននៅពន្ធនាគារខេត្តកាលពីថ្ងៃទី ២២ មីនា។
លោកស្រីថ្លែងថា៖ «ជនសង្ស័យត្រូវចោទប្រកាន់ពីបទរួមភេទជាមួយអនីតិជនក្រោមអាយុ ១៥ ឆ្នាំតាមមាត្រា ៤២ នៃច្បាប់ស្តីពីការទប់ស្កាត់អំពើជួញដូរមនុស្ស និងអំពើធ្វើអាជីវកម្មផ្លូវភេទ។ តុលាការសម្រេចឃុំខ្លួនជនសង្ស័យក៏ព្រោះតែគាត់សារភាពរឿងនេះនៅតុលាការក៏ដូចជានៅចំពោះមុខសមត្ថកិច្ចរបស់ខ្ញុំដែរ»។
យោងតាមមាត្រា ៤២ នៃច្បាប់ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ បើជនសង្ស័យត្រូវបានតុលាការរកឃើញថា ពិតជាបានរួមភេទជាមួយក្មេងស្រីរងគ្រោះមែននោះនឹងត្រូវផ្តន្ទាទោសដាក់ពន្ធនាគារពី ៥ ឆ្នាំដល់ ១០ ឆ្នាំ។
លោក សៀវ ឌាន នាយនគរបាលប៉ុស្តិ៍ស្តីទី ឃុំចារឈូក ប្រាប់ភ្នំពេញ-ប៉ុស្តិ៍ថា ក្មេងស្រីរងគ្រោះជាកូនទី ២ ក្នុងចំណោមបងប្អូន ៣ នាក់មានផ្ទះនៅជាប់នឹងផ្ទះជនសង្ស័យ។ ជារៀងរាល់ថ្ងៃក្មេងរងគ្រោះតែងតែទៅមើលទូរទស្សន៍នៅផ្ទះជនសង្ស័យ។ ក្នុងពេលមើលទូរទស្សន៍ម្តងៗជួនកាលសមាជិករបស់ជនសង្ស័យក៏នៅផ្ទះជុំគ្នា និងពេលខ្លះក៏គ្មានមនុស្សនៅព្រោះមនុស្សក្នុងគ្រួសារចេញទៅប្រកបរបររកស៊ីក្រៅផ្ទះ។
លោកបន្តថា ដោយសារពុំមានអ្នកនៅផ្ទះទើបធ្វើឱ្យជនសង្ស័យមានឱកាសក្នុងការប្រព្រឹត្តបទល្មើសទៅលើក្មេងរងគ្រោះ ដែលសកម្មភាពនេះជនសង្ស័យបានប្រព្រឹត្តចាប់តាំងពីខែមករាឆ្នាំ ២០២១ មក ប៉ុន្តែជនសង្ស័យគំរាមក្មេងរងគ្រោះរាល់ពេលប្រព្រឹត្ត។ បើតាមចម្លើយក្មេងរងគ្រោះ ជនសង្ស័យតែងលួងលោមឱ្យលុយនាង ហើយចាប់នាងរំលោភ និងគំរាមមិនឱ្យនាងប្រាប់ម្តាយឪពុកឡើយ។ ជនសង្ស័យសារភាពប្រាប់សមត្ថកិច្ចថា គាត់បានរំលោភក្មេងស្រីរងគ្រោះ ៦ ដង៕
