.jpg)
ជនសង្ស័យត្រូវបាននគរបាលប៉ុស្តិ៍ ឃុំទួលកី ស្រុកចន្រ្ទា ខេត្ត ស្វាយរៀង ឃាត់ខ្លួន កាលពីថ្ងៃទី១ ឧសភា នៅថ្ងៃដែលជនសង្ស័យចាប់រំលោភសេពសន្ថវៈក្មេងស្រីរងគ្រោះអាយុ ១៤ ឆ្នាំនោះតែម្តង។ រូបថត ប៉ូលិស
ស្វាយរៀងៈ បុរសវ័យចំណាស់ម្នាក់ កំពុងត្រូវបានតំណាងអយ្យការអមសាលាដំបូងខេត្តស្វាយរៀង សាកសួរពាក់ព័ន្ធនឹងការរំលោភសេពសន្ថវៈ លើក្មេងស្រីអាយុ ១៤ឆ្នាំ នៅរសៀលថ្ងៃទី៣ ខែឧសភា បន្ទាប់ពីនគរបាលបញ្ជូនដល់តុលាការ។
លោកស្រី កែវ សាក់ ស្នងការរងទទួលផែនការងារប្រឆាំងការជួញដូរមនុស្ស នៃស្នងការដ្ឋាននគរបាលខេត្ត ស្វាយរៀង ប្រាប់ភ្នំពេញប៉ុស្តិ៍នៅរសៀលថ្ងៃទី៣ ឧសភា ថា ជនឈ្មោះ សាង វ៉ាង អាយុ ៧០ ឆ្នាំកំពុងត្រូវបានតំណាងអយ្យការសាកសួរមិនទាន់ចប់នៅឡើយទេ។
លោកស្រីថ្លែងថា៖«រឿងនេះខ្ញុំទទួលព័ត៌មានពីតុលាការថា គឺអយ្យការកំពុងសួរចម្លើយជនសង្ស័យ»។
គួររំឭកថា ជនសង្ស័យត្រូវបាននគរបាលប៉ុស្តិ៍ ឃុំទួលកី ស្រុកចន្រ្ទា ខេត្ត ស្វាយរៀង ឃាត់ខ្លួន កាលពីថ្ងៃទី១ ឧសភា នៅថ្ងៃដែលជនសង្ស័យចាប់រំលោភសេពសន្ថវៈក្មេងស្រីរងគ្រោះអាយុ ១៤ ឆ្នាំនោះតែម្តង។
បើតាមលោក ញ៉ែម សុធាវុធ នាយប៉ុស្តិ៍នគរបាលឃុំទួលកី ប្រាប់ នៅថ្ងៃទី២ ឧសភា តាមសម្តីរបស់អ្នកភូមិថា ជនសង្ស័យ និង ក្មេងស្រីរងគ្រោះជាមនុស្សរស់នៅក្នុងភូមិជាមួយគ្នា។
លោកបន្តថា មុនពេលកើតហេតុ ក្មេងរងគ្រោះត្រូវបានជនសង្ស័យល្បួងឱ្យលុយនៅផ្ទះរបស់នាង ហើយក៏បានចាប់រំលោភ តែម្តង ខណៈដែលឪពុកម្តាយរបស់ក្មេងស្រី ចេញទៅធ្វើការអស់។
ប៉ុន្តែ នៅពេលនាំខ្លួន មកដល់ប៉ុស្តិ៍នគរបាលឃុំ ជនសង្ស័យ រូបនេះ បានបដិសេធ ថា មិនបានចាប់រំលោភនាងនោះទេ៕
