សៀមរាបៈ តុលាការខេត្តសៀមរាបកាលពីម្សិលមិញបានចោទប្រកាន់ជនជាតិចិន ២ នាក់ ពីបទលួចមានស្ថានទម្ងន់ទោស ក្រោយពីសមត្ថកិច្ចចាប់បានពាក់ព័ន្ធការលួចម៉ូតូ ១ គ្រឿង ដែលជនសង្ស័យទាំង ២ នាក់នោះ អាចនឹងជាប់ពន្ធនាគារពី ៣ ទៅ ១០ ឆ្នាំ បើរកឃើញថា មានទោស។
លោក យិន ស្រាង អ្នកនាំពាក្យសាលាដំបូង ខេត្តសៀមរាបបានឲ្យដឹងកាលពីម្សិលមិញថា ជនជាតិចិនទាំង ២ នាក់នោះ ឈ្មោះ WEI JUN HI អាយុ ៣២ ឆ្នាំ និងឈ្មោះ LIANG HENG អាយុ ៣២ ឆ្នាំ ត្រូវជាប់ចោទតាមមាត្រា ៣៥៧ នៃក្រមព្រហ្មទណ្ឌ។
លោក ស្រាង បានថ្លែងប្រាប់ថា៖ «សំណុំរឿងជនជាតិចិន ២ នាក់ ខាងលើខ្ញុំបានឃើញហើយ ហើយត្រូវព្រះរាជអាជ្ញាធ្វើការចោទប្រកាន់ពីបទលួចមានស្ថានទម្ងន់ទោស»។
លោក ភឹង ចន្ថារ៉េត ស្នងការរងទទួលផែនព្រហ្មទណ្ឌនៃស្នងការដ្ឋានខេត្ត សៀមរាបរំឭកឲ្យដឹងពីម្សិលមិញថានៅថ្ងៃទី ១៧ ខែវិច្ឆិកា ឆ្នាំ ២០១៩ មានជនជាតិថៃប្រុសស្រី ២ នាក់បានទៅជួលម៉ូតូ ១ គ្រឿងម៉ាកហុងដាឃ្លីកផលិតឆ្នាំ ២០១២ ពណ៌ខ្មៅលាយក្រហមពាក់ស្លាកលេខបាត់ដំបង ១L-៩៣៤៣ ពីក្រុមហ៊ុនទេសចរណ៍មួយនៅខេត្តសៀមរាបដែលមានយីហោឈ្មោះ «វិមានណេទួរ» ដែលការជួលរយៈពេល ៣ ថ្ងៃ។
លុះរហូតមកដល់ថ្ងៃទី ១៨ ខែ វិច្ឆិកា ឆ្នាំ ២០១៩ នៅវេលាម៉ោង ១០ ជាងព្រឹកជនជាតិថៃដែលបានជួលម៉ូតូខាងលើបានទាក់ទងប្រាប់ទៅក្រុមហ៊ុនថា ម៉ូតូដែលពួកគេបានជួលពីក្រុមហ៊ុនទៅជិះនោះបានបាត់ហើយ។ នៅពេលនោះខាងក្រុមហ៊ុនឆែកមើលតាមប្រព័ន្ធ GPS ដែលភ្ជាប់នឹងម៉ូតូនោះក៏ឃើញ GPS លោតបង្ហាញសញ្ញាទីតាំងនៅចំណុចផ្លូវជាតិលេខ ៦ ជាមុខសញ្ញាឆ្ពោះមករាជធានីភ្នំពេញទើបកម្លាំងនគរបាលចាប់បានតែម្ដង៕