The Phnom Penh Post Search

Search form




Logo of Phnom Penh Post newspaper Phnom Penh Post - បុរស​ជនជាតិ​នីហ្សេរីយ៉ា​ម្នាក់​ត្រូវបាន​បញ្ជូន​ទៅ​តុលាការ សង្ស័យ​ពាក់ព័ន្ធ​អំពើ​ប្លន់​លុយ​ $៣ ៥០០




បុរស​ជនជាតិ​នីហ្សេរីយ៉ា​ម្នាក់​ត្រូវបាន​បញ្ជូន​ទៅ​តុលាការ សង្ស័យ​ពាក់ព័ន្ធ​អំពើ​ប្លន់​លុយ​ $៣ ៥០០

Content image - Phnom Penh Post
បុរស​នីហ្សេរីយ៉ា​សង្ស័យ​ពី​បទ​ប្លន់​លុយ​ចាប់​ខ្លួន​ថ្ងៃទី​ ២៧ ​មេសា​នៅ​ខណ្ឌដង្កោ​។ រូប ប៉ូលិស

បុរស​ជនជាតិ​នីហ្សេរីយ៉ា​ម្នាក់​ត្រូវបាន​បញ្ជូន​ទៅ​តុលាការ សង្ស័យ​ពាក់ព័ន្ធ​អំពើ​ប្លន់​លុយ​ $៣ ៥០០

ភ្នំពេញៈ ជនសង្ស័យ​ម្នាក់​ជា​ជនជាតិ​នីហ្សេរីយ៉ា​ដែល​ពាក់ព័ន្ធ​អំពើ​ប្លន់​លុយ​ចំនួន​ ៣៥០០ ​ដុល្លារ​អាមេរិក ត្រូវ​បាន​សមត្ថកិច្ច​ចាប់​បញ្ជូន​ទៅ​សាលាដំបូង​រាជធានី​ភ្នំពេញ​ពី​ម្សិលមិញ បន្ទាប់ពី​សមត្ថកិច្ច​ឃាត់ខ្លួន​កាលពី​ថ្ងៃទី​ ២៧ ​មេសា ​ក្នុង​បុរី​ពិភពថ្មី​ចំការដូង​នៅ​សង្កាត់​ដង្កោ ខណ្ឌដង្កោ​តាម​បណ្តឹង​របស់​ជនរងគ្រោះ​។

អធិការនគរបាល​ខណ្ឌដង្កោ​លោក​ ជឹម ស៊ីថា ប្រាប់​ភ្នំពេញ​ប៉ុស្ដិ៍​ពី​ម្សិលមិញ​ថា សមត្ថកិច្ច​ជំនាញ​នៃ​អធិការដ្ឋាន​នគរបាល​ខណ្ឌដង្កោ​បាន​បញ្ជូន​ជនសង្ស័យ​ម្នាក់​ជា​ជនជាតិ​នីហ្សេរីយ៉ា​ទៅ​សាលាដំបូង​រាជធានី​ភ្នំពេញ​នៅ​ល្ងាច​ថ្ងៃទី​ ២៩ ​មេសា បន្ទាប់ពី​បញ្ចប់​ការសាកសួរ​ករណីនេះ​។

លោក​បន្តថា ការឃាត់ខ្លួន​ជនសង្ស័យ​សមត្ថកិច្ច​បានទទួល​ពាក្យបណ្ដឹង​ពី​ជនរងគ្រោះ​ប្ដឹង​ឲ្យ​ឃាត់ខ្លួន​បុរស​រូបនេះ​ដោយ​ចោទប្រកាន់​ថា បាន​ធ្វើ​សកម្មភាព​ប្លន់​យកលុយ​របស់​គាត់​អស់​ ៣ ៥០០ ​ដុល្លារ​ ព្រមទាំង​បាន​បង្ក​របួស​ស្នាម​ដល់​ពួកគាត់​ទាំង​ ២ ​នាក់​ទៀតផង​។ ក្រោយពី​ទទួល​ពាក្យបណ្ដឹង សមត្ថកិច្ច​បាន​ឃាត់ខ្លួន​ជនសង្ស័យ​យក​មក​សាកសួរ និង រៀបចំ​សំណុំរឿង​បញ្ជូន​ទៅ​សាលាដំបូង​រាជធានី​ភ្នំពេញ​ដើម្បី​ឲ្យ​តុលាការ​ចាត់ចែង​បន្ត​នីតិវិធី​ច្បាប់​។

លោក​ ជឹម ស៊ីថា បញ្ជាក់​ថា​៖ «​យើង​កំពុង​សាកសួរ​សិន​ [​ព្រឹក​ម្សិលមិញ​] បន្ទាប់មក​យើង​នឹង​កសាង​សំណុំរឿង​បញ្ជូន​ទៅ​តុលាការ​ [​នៅ​ល្ងាចម្សិលមិញ​]។ មុន​បញ្ជូន​ទៅ​តុលាការ យើង​ចង់​រក​ឲ្យ​ដឹង​ការពិត​សិន ហើយ​យើង​នឹង​បញ្ជូន​ទៅ​តុលាការ​បន្ត​នីតិវិធី​ច្បាប់​។ ចំពោះ​ឈ្មោះ​ជនសង្ស័យ និង​ឈ្មោះ​ជនរងគ្រោះ​គឺ​មិន​បាន​ចាំ​ទេ ព្រោះ​សរសេរ​នៅក្នុង​របាយការណ៍​»​។

លោក​ គុជ គឹមឡុង ព្រះរាជអាជ្ញារង និង​ជា​អ្នកនាំពាក្យ​សាលា​ដំបូង​រាជធានី​ភ្នំពេញ​ម្សិលមិញ​មិន​អាច​ទាក់ទង​សុំ​ការបញ្ជាក់​ជុំវិញ​ករណីនេះ​បានទេ​។

លោក​ ស៊ុំ សារី នាយប៉ុស្ដិ៍​នគរបាល​រដ្ឋបាល​សង្កាត់​ព្រៃស​ថ្លែង​កាលពី​ថ្ងៃទី​ ២៨ ​មេសា​ ថា សមត្ថកិច្ច​លោក​នៅ​ថ្ងៃទី​ ២៧ ​មេសា​ បាន​ទទួល​ពាក្យបណ្ដឹង​ពី​ស្ដ្រី​ជនជាតិ​ខ្មែរ​ម្នាក់ និង​មាន​ប្តី​ជា​ជនជាតិ​នីហ្សេរីយ៉ា​ដោយ​បាន​ចោទប្រកាន់​លើ​ជនសង្ស័យ​ជា​ជនជាតិ​នីហ្សេរីយ៉ា​ម្នាក់ទៀត​ [​ភ្លេចឈ្មោះ​] ​ដែល​ត្រូវជា​មិត្តភក្ដិ​របស់​ប្ដី​នាង​។

លោក​ថា តាម​ពាក្យបណ្តឹង​របស់​ស្ត្រី​ខ្មែរ​ពោះធំ​ម្នាក់ និង​ប្តី​ជា​ជនជាតិ​នីហ្សេរីយ៉ា​បាន​ចោទ​បុរស​ខាងលើ​ថា បាន​វាយ​បំផ្លិចបំផ្លាញ​ទ្រព្យសម្បត្តិ​ខ្លួន ហើយ​ថែម​ទាំង​វាយ និង​យក​កាំបិត​ចាក់​មកលើ​ពួកខ្លួន​បណ្តាល​ឲ្យ​រងរបួស​រួច​បាន​យក​លុយ​ចំនួន​ ៣៥០០ ​ដុល្លារ​គេច​បាត់​កាលពី​វេលា​ម៉ោង​ ២៣:៣០ ​នាទី​យប់​ថ្ងៃទី​ ២៧ ខែមេសា​។

លោក​បន្ថែមថា ក្រោយ​ទទួល​ពាក្យបណ្តឹង​សមត្ថកិច្ច​ជំនាញ​បាន​ស្នើសុំ​គោលការណ៍​ពី​លោក​ព្រះរាជអាជ្ញារង​អម​សាលាដំបូង​រាជធានី​ភ្នំពេញ​ចុះ​ទៅ​ឡោមព័ទ្ធ​ផ្ទះ​ ១ ​ខ្នង​ក្នុង​បុរី​ពិភពថ្មី​ចំការដូង និង​បាន​ឃាត់ខ្លួន​ជនជាតិ​នីហ្សេរីយ៉ា​ម្នាក់​នោះ​តែម្តង​។

លោក​ សារី បញ្ជាក់ថា​៖ «​នៅពេល​ឃាត់ខ្លួន​បាន​ភ្លាមៗ​នេះ ខ្ញុំ​បាន​សាកសួរ​តិចតួច​ដែរ ដោយ​ជនសង្ស័យ​បាន​និយាយ​ថា គាត់​ត្រូវបាន​គេ​មួលបង្កាច់ គេ​ចង់​ធ្វើ​បាប​គាត់ ហើយ​ខ្ញុំ​ក៏​មិន​បាន​សាកសួរ​ដេញដោល​អ្វី​ច្រើន​ដែរ​។ ប៉ុន្ដែ​បាន​បញ្ជូន​បន្ត​ទៅ​អធិការដ្ឋាន​នគរបាល​ខណ្ឌដង្កោ​។ រឿង​ទុក​ឲ្យ​តុលាការ​ចាត់ចែង​ទៅ ខ្ញុំ​អត់​ដឹង​ទេ​»៕

អត្ថបទគួរចាប់អារម្មណ៍

  • ព្រះសីហនុៈ រដ្ឋបាលខេត្ត​ព្រះសីហនុ​កំពុង​ចាក់​ខ្សាច់​ថ្មី​បំពេញ​នៅតាម​កន្លែង​ជ្រលង​ទឹកហូរ​ដែលមាន​ខ្សាច់​ទាប និង​ខ្សាច់​ខ្មៅ​នៅ​ចំណុច​ឆ្នេរ​អូរឈើទាល​ក្នុង​សង្កាត់​លេខ​ ៤ ក្រុងព្រះសីហនុ ដើម្បី​កែលម្អ​សោភណភាព​ឆ្នេរ​ខ្សាច់ ក៏ប៉ុន្តែ​មន្ត្រីខេត្ត​នៅ​មិន​អាច​ប៉ាន់ប្រមាណ​ថា​នឹង​ត្រូវ​ប្រើ​ខ្សាច់​ប៉ុន្មាន​រថយន្ត​នោះទេ​។

  • ភ្នំពេញៈ ប្រទេស​ជប៉ុន​ ផ្តល់​ជំនួយ​ឥតសំណង​ដល់​កម្ពុជា​ចំនួន ១ ១៣២ ​លាន​យ៉េន​ (១០,៨ ​លាន​ដុល្លារ​) ​សម្រាប់​អនុវត្ត​គម្រោង​អភិវឌ្ឍន៍​ចរាចរណ៍​នាវា​នៅ​កំពង់ផែ​ស្វយ័ត​ក្រុងព្រះសីហនុ​ដើម្បី ​ធ្វើឱ្យ​ប្រសើរ​ឡើង​នូវ​សុវត្ថិភាព​ផ្លូវ​សមុទ្រ​។ នេះ​បើតាម​ស្ថានទូត​ជប៉ុន​ប្រចាំ​នៅ​កម្ពុជា​។

  • ភ្នំពេញ៖ កីឡាការិនី​កូន​ខ្មែរ​កាត់​បារាំង វ័យ ១៧ ឆ្នាំ ម៉ា រីយ៉ាន មាន​ចំណង់​ចំណូលចិត្ត​ខ្លាំង​ទៅ​លើ​ប្រភេទ​កីឡា​ប្រយុទ្ធ ពិសេស​ការ​ប្រណាំង​ម៉ូតូ​ហោះ ហើយ​កញ្ញា​បាន​អះអាង​ថា នឹង​មិន​បោះបង់​ចោល​ជំនាញ​នេះ​ឡើយ បើ​ទោះបី​ជា​ប្រភេទ​កីឡា​នេះ មាន​ផល​ប៉ះពាល់ និង​ធ្លាប់​ជួប​ឧបសគ្គ​គ្រោះ​ថ្នាក់​ធំ​​ក៏​ដោយ។

  • ភ្នំពេញៈ តម្លៃ​ពោត​ក្នុង​រដូវ​ប្រមូលផល​ឆ្នាំនេះ​បាន​ស្ទុះ​ឡើង ដោយសារ​តែ​ការកើនឡើង​នៃ​តម្រូវការ​សម្រាប់​ការផលិត​ចំណី​សត្វ​ក្នុងស្រុក​។ ការប្រមូលផល​ពោតក្រហម​នៅក្នុង​ខេត្ត​ត្បូងឃ្មុំ​ពេលនេះ​សម្រេច​បាន​ប្រមាណ ៥០ ​ភាគរយ​ហើយ​ដោយ​តម្លៃ​គ្រាប់ពោត​ស្ងួត​បាន​កើនឡើង​ជិត ២០ ​ភាគរយ​ បើ​ធៀប​នឹង​រយៈពេល​ដូចគ្នា​កាលពី​ឆ្នាំមុន

  • កោះកុងៈ ដី​គម្រប​ព្រៃឈើ​របស់​រដ្ឋ​រាប់ពាន់​ម៉ែត្រការ៉េ​ក្នុង​ទំហំ​ដី​បម្រុង​របស់​រដ្ឋ​ទំហំ​ប្រមាណ​ ១១ ​ហិកតា ស្ថិតនៅ​ភូមិ​កោះស្តេច ឃុំ​កោះ​ស្តេច ស្រុក​គិរីសាគរ ខេត្តកោះកុង​ត្រូវបាន​ជន​មិន​ស្គាល់​អត្តសញ្ញាណ​ចាប់ផ្ដើម​លួច​បោះបង្គោល​ថ្ម និង​ឈើ​ទន្ទ្រាន​យក​ដោយ​ខុសច្បាប់​។

  • កំពង់ស្ពឺៈ ពលរដ្ឋ​ជាង​ ៥០០ ​គ្រួសារ ​រស់នៅក្នុង​ឃុំ​ទួល​អម្ពិល​ស្រុក​បសេដ្ឋ ខេត្តកំពង់ស្ពឺ​បាន​បង្ហាញ​ក្ដីបារម្ភ​ពី​ការខ្វះ​ទឹក​សម្រាប់​ស្រោចស្រព​ស្រែចម្ការ និង​ដំណាំ​ផ្សេងៗ ខណៈ​បច្ចុប្បន្ន​មាន​ឈ្មួញ​យក​ម៉ាស៊ីន​ទៅ​បូមទឹក​ទាំងយប់​ទាំង​ថ្ងៃ​នៅក្នុង​ទំនប់​បុរាណ​ព្រៃពាយ​ដែល​ពួកគាត់​កំពុង​ប្រើប្រាស់​ជាប្រចាំ​។