ជនសង្ស័យម្នាក់ជាជនជាតិវៀតណាម ត្រូវបានមន្ត្រីជំនាញនៃបញ្ជាការដ្ឋានកងរាជអាវុធហត្ថខេត្តព្រះសីហនុកំពុងធ្វើការសាកសួរពីម្សិលមិញ បន្ទាប់ពីឃាត់ខ្លួននៅថ្ងៃទី ២៧ ខែកញ្ញា ជាប់ពាក់ព័ន្ធនឹងការលួចលាក់ទុកក្រឡចំនួន ២៨១ ក្រឡ នៅភូមិ ៣ សង្កាត់លេខ ៣ ក្រុង/ខេត្តព្រះសីហនុ ដោយមន្ត្រីសន្និដ្ឋានថា ជាក្រឡចាស់ៗដែលសេសសល់ពីបុរាណ។
លោក ប៊ុត បុប្ផា ប្រធានមន្ទីរវប្បធម៌ និងវិចិត្រសិល្បៈខេត្តព្រះសីហនុបានថ្លែងពីម្សិលមិញថា សមត្ថកិច្ចកំពុងសាកសួរជនសង្ស័យឈ្មោះ ឡេ វ៉ាងហួន ភេទប្រុស អាយុ ៤២ ឆ្នាំ ជនជាតិវៀតណាម បន្ទាប់ពីបានឃាត់ខ្លួនបញ្ជូនទៅបញ្ជាការដ្ឋានកងរាជអាវុធហត្ថខេត្តព្រះសីហនុនៅថ្ងៃទី ២៧ ខែកញ្ញា។ ជនសង្ស័យពាក់ព័ន្ធនឹងការលួចលាក់ទុកក្រឡចំនួន ២៨១ ក្រឡ ដែលគេបានរកឃើញនៅក្នុងបាតសមុទ្រក្នុងតំបន់កោះឫស្សី ស្ថិតក្នុងក្រុម ៣១ ភូមិ ៣ សង្កាត់លេខ ៣ ក្រុង/ខេត្តព្រះសីហនុ។
លោកបញ្ជាក់ថា៖ «ក្រឡទាំង ២៨១ ក្រឡនេះ គឺគាត់បានទៅយកពីបាតសមុទ្រមក តែខ្ញុំមិនទាន់ដឹងថា គាត់បានទទួលព័ត៌មានពីណាមក បានជាគាត់ដឹងកន្លែងហ្នឹងមានក្រឡយ៉ាងច្រើនបែបនេះ។ ចំពោះការងារបន្ទាប់ គឺអ្នកជំនាញយើងកំពុង ពិនិត្យមើលសាវតាក្រឡឲ្យច្បាស់លាស់សិន ទើបយើងនឹងស្នើសុំគោលការណ៍សម្រេចថា នឹងយកមករក្សាទុកនៅសារមន្ទីរខេត្តព្រះសីហនុ ឬបញ្ជូនទៅទុកសារមន្ទីរនៅភ្នំពេញ»។
បើតាមលោក ប៊ុត បុប្ផា គឺជនសង្ស័យបានទៅប្រមូលយកក្រឡទាំងអស់ពីបាតសមុទ្រតែមួយកន្លែងប៉ុណ្ណោះ ដោយនៅក្នុងក្រឡមិនមានផ្ទុកវត្ថុអ្វីទេ ហើយជនសង្ស័យក៏មិនបានប្រមូលទិញពីតំបន់ផ្សេងទៀតដែរ។ ក្រោយពេលបង្ក្រាប មន្ត្រីជំនាញបានរាប់ចំនួន និងកំណត់ទំហំក្រឡជា៣ប្រភេទ គឺទំហំតូច ទំហំមធ្យម និងទំហំធំ។
លោកប្រធានមន្ទីរវប្បធម៌ និងមន្ត្រីជំនាញ បានសនិ្នដ្ឋានជំហានដំបូងថា ទម្រង់ និងរូបរាងក្រឡនេះ មានលក្ខណៈស្រដៀងនឹងក្រឡដែលសមត្ថកិច្ច បានបង្ក្រាបករណីជួញដូរនៅខេត្តកោះកុងកាលពីពេលថ្មីៗនេះដែរ។ ពោលគឺអ្នកជំនាញ បានចាត់ទុកក្រឡទាំងនេះ ជាវត្ថុបុរាណដែលមានអាយុកាលចន្លោះពីសតវត្សរ៍ទី ១៥ ដល់ទី ១៧ នៃគ.ស។
មេបញ្ជាការកងរាជអាវុធហត្ថខេត្តព្រះសីហនុ លោក ហេង ប៊ុនទី ពីម្សិលមិញមិនទាន់អាចទាក់ទងសុំការបញ្ជាក់ជុំវិញករណីនេះបានទេ។
តាមរបាយការណ៍របស់កងរាជអាវុធហត្ថខេត្តព្រះសីហនុបានឲ្យដឹងពីម្សិលមិញថា កម្លាំងអាវុធហត្ថខេត្តព្រះសីហនុ កាលពីថ្ងៃទី ២៧ ខែកញ្ញា នេះ ដែលមានការសម្របសម្រួលនីតិវិធី ដោយលោកហួត វិចិត្រ ព្រះរាជអជ្ញារងអមសាលាដំបូងខេត្តព្រះសីហនុ និងចូលរួមពីមន្ត្រីនៃមន្ទីរវប្បធម៌ និងវិចិត្រសិល្បៈខេត្ត បានចុះឃាត់ជនសង្ស័យម្នាក់ដែលលាក់ទុកក្រឡចាស់ៗដែលរកឃើញយកមកពីបាតសមុទ្រនៅចំណុចកោះឫស្សី ស្ថិតក្នុងក្រុម ៣១ ភូមិ ៣ សង្កាត់លេខ ៣ ក្រុង/ខេត្តព្រះសីហនុ។
របាយការណ៍បន្តបន្តថា ជនសង្ស័យជនជាតិវៀតណាមនេះ ជាអ្នកនេសាទនៅតំបន់នោះ។ សមត្ថកិច្ចបានដកហូតក្រឡទាំងតូច និងធំសរុបចំនួន ២៨១ ក្រឡ។ បច្ចុប្បន្នជនសង្ស័យ និងវត្ថុតាង ត្រូវបានរក្សាទុកនៅបញ្ជាការដ្ឋានអាវុធហត្ថខេត្តព្រះសីហនុ ដើម្បីអនុវត្តនីតិវិធីបន្ត៕
វីដេអូ៖