.jpg)
ជនសង្ស័យអាយុ ៥៧ ឆ្នាំ ត្រូវចាប់ឃាត់ខ្លួន កាលពីថ្ងៃទី ២៣ ខែ ធ្នូ ក្នុងករណីរឿងឃាតកម្ម។ រូបថត FN
កំពតៈ កម្លាំងការិយាល័យព្រហ្មទណ្ឌនៃស្នងការដ្ឋាននគរបាលខេត្តកំពត រួមសហការជាមួយកម្លាំងការិយាល័យព្រហ្មទណ្ឌនៃស្នងការដ្ឋាននគរបាលខេត្តពោធិ៍សាត់ បានចាប់ឃាត់ខ្លួនជនសង្ស័យម្នាក់ទៀត ដែលបានចូលរួមក្នុងអំពើបាញ់ប្រហារបុគ្គលិកសន្តិសុខក្រុមហ៊ុន សូ ងួន គ្រុប កាលពីព្រឹកថ្ងៃទី ១៨ ខែ វិច្ចិកា ឆ្នាំ ២០២០ បណ្ដាលឲ្យស្លាប់ម្នាក់ និងរបួសធ្ងន់ម្នាក់។
លោក ម៉ៅ ច័ន្ទមធុរិទ្ធ ស្នងការនគរបាលខេត្តកំពត បានប្រាប់ ភ្នំពេញ ប៉ុស្តិ៍ ថា ជនសង្ស័យឈ្មោះ ហេង យ៉ុង អាយុ ៥៧ ឆ្នាំ មានទីលំនៅភូមិពោពិ៍ដុស ឃុំបឹងនិមល ស្រុកឈូក ខេត្តកំពត ត្រូវបានកម្លាំងការិយាល័យព្រហ្មទណ្ឌនៃស្នងការដ្ឋាននគរបាលខេត្តពោធិ៍សាត់ ចាប់ឃាត់ខ្លួននៅព្រឹកថ្ងៃទី ២៣ ខែ ធ្នូ ឆ្នាំ ២០២០ បន្ទាប់ពីបានរត់គេចខ្លួន ពីការតាមចាប់របស់សមត្ថកិច្ចនគរបាលខេត្តកំពត អស់រយៈពេលជាង ១ ខែ។
លោកថ្លែងថា៖ «នៅពេលនេះជនសង្ស័យកំពុងត្រូវបាននាំខ្លួនពីខេត្តពោធិ៍សាត់ ទៅកាន់ស្នងការដ្ឋាននគរបាលខេត្តកំពត ដើម្បីសាកសួរចម្លើយ និង កសាងសំណុំរឿងបញ្ជូនទៅតុលាការចាត់វិធានការបន្តតាមនីតិវិធីច្បាប់»។
បើតាមលោក ច័ន្ទមធុរិទ្ធ ជនសង្ស័យ ឈ្មោះ ហេង យ៉ុង ជាអ្នកផ្ដល់អាវុធ AK-47 ទៅឲ្យឈ្មោះ ស៊ុយ ធា ដែលជាជនដៃដល់ និងជាមេខ្លោងនៃអំពើបាញ់ប្រហារនោះ និងកំពុងសម្ងំលាក់ខ្លួននៅក្នុងព្រៃ។
ការចាប់ខ្លួនជនសង្ស័យឈ្មោះ ហេង យ៉ុង ដោយកម្លាំងនគរបាលការិយាល័យព្រហ្មទណ្ឌខេត្តពោធិ៍សាត់ នាព្រឹកថ្ងៃទី ២៣ ខែ ធ្នូ ឆ្នាំ ២០២០ គឺធ្វើឡើងតាមដីកាបង្គាប់ឲ្យចាប់ខ្លួនរបស់លោក គាំ គង្គា ចៅក្រមស៊ើបអង្កេតសាលាដំបូងខេត្តកំពត ចុះថ្ងៃទី ២៣ ខែ វិច្ឆិកា ឆ្នាំ ២០២០ ដែលបានចោទប្រកាន់ជនសង្ស័យពីបទ «ឃាតកម្មគិតទុកជាមុន»។ នេះបើតាមការអះអាងរបស់លោក ស ថេង ស្នងការនគរបាលខេត្តពោធិ៍សាត់។
លោកបានបន្តថា កាលពីយប់ថ្ងៃអង្គារ ក្រោយពីទទួលបានដំណឺងអំពីវត្តមានរបស់ជនសង្ស័យ កំពុងរស់នៅលាក់ខ្លួនក្នុងខេត្តពោធិ៍សាត់ កម្លាំងនគរបាលជំនាញការិយាល័យព្រហ្មទណ្ឌនៃស្នងការដ្ឋាននគរបាលខេត្តពោធិ៍សាត់ បានចុះប្រតិបត្តិការស្រាវជ្រាវ និងចាប់ខ្លួន។ លុះដល់វេលាម៉ោង ៨:៣០ នាទីព្រឹកថ្ងៃពុធ ទី ២៣ ខែ ធ្នូ ឆ្នាំ ២០២០ កម្លាំងជំនាញបានឃាត់ខ្លួនជនសង្ស័យឈ្មោះ ហេង យ៉ុង នៅចំណុចភូមិវាល ឃុំសំរោង ស្រុកភ្នំក្រវាញ។
លោកបានបញ្ជាក់ថា៖ «ក្រោយចាប់ខ្លួនជនសង្ស័យត្រូវបានប្រគល់ទៅឲ្យកម្លាំងការិយាល័យព្រហ្មទណ្ឌ នៃស្នងការដ្ឋាននគរបាលខេត្តកំពត ដែលជាម្ចាស់សំណុំរឿង ដើម្បីចំណាត់ការបន្តតាមនីតិវិធីច្បាប់»។
កាលពីព្រឹកថ្ងៃទី ១៨ ខែ វិច្ឆិកា ឆ្នាំ ២០២០ មានករណីលបបាញ់ប្រហារមួយកើតឡើងនៅចំណុចទ្រនាប់បាត់ដឹង ក្នុងភូមិសាស្ត្រភូមិព្រៃពាយ ឃុំត្រពាំងភ្លាំង ស្រុកឈូក ខេត្តកំពត។ ក្នុងព្រឹត្តិការណ៍នោះ បុគ្គលិកសន្តិសុខ ក្រុមហ៊ុន សូ ងួន គ្រុប ២ នាក់ រួមមានឈ្មោះ នួន ភ័ក្ត្រា អាយុ ២៧ ឆ្នាំ បានស្លាប់នៅកន្លែងកើតហេតុ ដោយក្រុមខ្មាន់កាំភ្លើងបាញ់ចំត្រង់ក្រោមក្លៀក និងម្នាក់ទៀតឈ្មោះ ផន ដា អាយុ ៣១ ឆ្នាំ បានរងរបួសធ្ងន់ចំបំពង់ក ហើយត្រូវបានក្រុមការងារ ដឹកនាំយកទៅព្យាបាលនៅមន្ទីរពេទ្យព្រះអង្គឌួង ក្នុងរាជធានីភ្នំពេញ។ បច្ចុប្បន្នជនរងគ្រោះបានជាសះស្បើយហើយ និងកំពុងស្នាក់នៅជាមួយក្រុមគ្រួសារ នៅឯស្រុកកំណើត ក្នុងស្រុកសំពៅមាស ខេត្តពោធិ៍សាត់។
គិតរហូតមកទល់ពេលនេះ សមត្ថកិច្ចបានចាប់ខ្លួន ក្រុមជនសង្ស័យក្នុងអំពើបាញ់ប្រហារទៅលើបុគ្គលិកសន្តិសុខ ក្រុមហ៊ុន សូ ងួន គ្រុប បានចំនួន ៣ នាក់ហើយ ក្នុងនោះជនសង្ស័យ ២ នាក់ រួមមានឈ្មោះ ញ៉ាន សែង អាយុ ២៣ ឆ្នាំ និងឈ្មោះ ស៊ីម ថែ អាយុ ២១ ឆ្នាំ ត្រូវបានចាប់ឃាត់ខ្លួន នៅពីថ្ងៃទី ២២ ខែ វិច្ឆិកា ឆ្នាំ ២០២០។ ជនសង្ស័យទាំង ២ ត្រូវបានតុលាការខេត្តកំពតបង្គាប់ឲ្យឃុំខ្លួនជាបណ្ដោះអាសន្ននៅពន្ធនាគារខេត្តកំពត ដោយចោទប្រកាន់ពីបទ «ឃាតកម្មគិតទុកជាមុន»៕
