.jpg)
លោក គន់ គីម អនុប្រធានគណៈកម្មាធិការជាតិគ្រប់គ្រងគ្រោះមហន្តរាយ បានដឹកនាំកម្លាំងចុះទៅជួយសង្គ្រោះពលរដ្ឋម្នាក់ដែលធ្លាក់ចូលរូងភ្នំចក្រីកាលពីម្សិលមិញ។ សហការី
បាត់ដំបង: បុរសម្នាក់ដែលបានជាប់ខ្លួន ៣ យប់ ៤ ថ្ងៃ នៅក្នុងរូងភ្នំនោះ ត្រូវបានក្រុមសមត្ថកិច្ចចម្រុះជួយសង្គ្រោះបានហើយ កាលពីម្សិលមិញបន្ទាប់ពីរូបគាត់បានឡើងកើបអាចម៍ប្រចៀវ ហើយរអិលជើងធ្លាក់ចូលក្នុងរូងភ្នំ តាំងពីថ្ងៃទី ៤ រហូតដល់ថ្ងៃទី ៨ ខែ សីហា នៅភ្នំចក្រី ស្ថិតក្នុងភូមិក្បាលហុងទឹក ឃុំបារាំងធ្លាក់ ស្រុកភ្នំព្រឹក ខេត្តបាត់ដំបង ។
លោក សៅ រតនា អធិការរងនគរបាលស្រុកភ្នំព្រឹក បានប្រាប់ភ្នំពេញប៉ុស្ដិ៍កាលពីម្សិលមិញថា បុរសម្នាក់ដែលជាប់ខ្លួននៅក្នុងរូងភ្នំចក្រីនោះឈ្មោះ ស៊ិន បូរ៉ា អាយុ ២៧ ឆ្នាំ រស់នៅភូមិទឹកថ្លា ឃុំអង្គរបាន ស្រុកសំពៅលូន ខេត្តបាត់ដំបង ត្រូវបានសមត្ថកិច្ចចម្រុះប្រមាណជាង ២០០ នាក់ ជួយសង្គ្រោះរួចចេញពីក្នុងរូងភ្នំនោះហើយកាលពីរសៀលម្សិលមិញ ប៉ុន្ដែមិនមានប៉ះពាល់ដល់អាយុជីវិតទេ ដោយគ្រាន់តែអស់កម្លាំង ព្រោះគាត់មិនមានអាហារបរិភោគអស់រយៈពេល ៤ ថ្ងៃមកហើយ។
លោកបានបន្តថា ការទទួលដំណឹងនេះ គឺបន្ទាប់ពីម្ដាយជនរងគ្រោះបានមកប្ដឹងសមត្ថកិច្ចថា គាត់បានបាត់កូនប្រុសឈ្មោះ ស៊ិន បូរ៉ា អាយុ ២៧ ឆ្នាំ រយៈពេល ៤ ថ្ងៃ ដោយមិនទាន់ឃើញវិលត្រឡប់មកផ្ទះវិញ។
ភ្លាមៗនោះ សមត្ថកិច្ច និងប្រជាពលរដ្ឋបានសហការគ្នាចុះតាមរកគ្រប់កន្លែងក្រោយមកមានប្រជាពលរដ្ឋប្រទះឃើញនៅក្នុងរូងភ្នំចក្រីនេះតែម្ដង ។
លោក សៅ រតនា បញ្ជាក់ថា៖ «ពេលនៅកន្លែងកើតហេតុហ្នឹង ជនរងគ្រោះ គាត់អាចនិយាយឆ្លើយឆ្លងជាមួយយើងបានធម្មតា មិនទាន់សន្លប់បាត់ស្មារតីទេ ហើយគាត់បានប្រាប់សមត្ថកិច្ចយើងថា គាត់បានឡើងមករកកើបអាចម៍ប្រចៀវដូចសព្វមួយដង ហើយភ្លាមនោះ ក៏បានជ្រុះពិល ហើយគាត់ក៏បានដើររកពិល ក៏រអិលធ្លាក់ចូលជាប់ក្នុងរូងថ្មហ្នឹងតែម្ដង ប៉ុន្ដែចេញមកមិនរួចខំស្រែកឲ្យគេជួយដែរ តែគ្មានអ្នកនៅក្បែរហ្នឹងទេ»។
លោកបានបន្ថែមថា នីតិវិធីនៃការជួយសង្រ្គោះ សមត្ថកិច្ចបានខួងថ្មពីខាងក្រោមវិញ ដើម្បីបើកមុខឲ្យធំទូលាយ ក្នុងការងាយស្រួលដល់ការយកចេញមកក្រៅ។ ក្នុងសកម្មភាពនោះ ក៏មានការលំបាកខ្លាំងដែរ ដោយសារកន្លែងតូចចង្អៀត ហើយថ្មភ្នំនោះក៏ពិបាកក្នុងការខួងវាដែរ។
ក្រុមគ្រួសារជនរងគ្រោះមិនទាន់អាចស្វែងរកប្រភពទាក់ទងសុំការបញ្ជាក់ជុំវិញករណីនេះបានទេ កាលពីម្សិលមិញ ប៉ុន្ដែសមត្ថកិច្ចប្រាប់ថា ម្ដាយជនរងគ្រោះជាអ្នកប្ដឹងថា គាត់បានបាត់កូនពីផ្ទះ ៤ ថ្ងៃ ដោយមិនទាន់ឃើញត្រឡប់វិញ។
អ្នកស្រីប្រាប់សមត្ថកិច្ចបន្តថា ការបាត់ខ្លួននេះ ដោយកូនប្រុសអ្នកស្រីមិនបានប្រាប់ថា រូបគេចេញទៅណា ឬទៅធ្វើអ្វីទេ ព្រោះថ្វីបើពួកគាត់រស់នៅជាមួយគ្នា តែពេលទៅណាមកណា កូនប្រុសក៏មិនដែលប្រាប់គាត់ដែរ ប៉ុន្ដែដល់ពេលបាត់ខ្លួនច្រើនថ្ងៃពេក ទើបអ្នកស្រីតាមរកបែបនេះ។
ជុំវិញករណីនេះលោក គន់ គីម អនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្ដរាយដែលបានចុះជួយសង្គ្រោះដោយផ្ទាល់ ត្រូវបានសារព័ត៌មាន Fresh News ដកស្រង់សម្ដីកាលពីម្សិលមិញថា លោកបានស្នើទៅក្រុមសង្គ្រោះនៅអង្គភាព ៧១១ របស់កងពលតូចលេខ ៧០ និងនគរបាលគ្រប់ជាន់ថ្នាក់ ដើម្បីទៅជួយសង្គ្រោះបុរសរងគ្រោះខាងលើនេះ។ក្នុងនោះក្រុមអង្គភាព ៧១១ បានជិះយន្ដហោះទៅទីតាំងកើតហេតុនោះតែម្ដង ដើម្បីជួយសង្គ្រោះគាត់ឲ្យបានទាន់ពេលវេលា៕
វីដេអូ៖
