.jpg)
ភ្នំពេញៈសាលាឧទ្ធរណ៍កាលពីម្សិលមិញបានប្រកាសសាលដីកា ប្តូរបទចោទនិងបន្ថយទោសដល់បុរសម្នាក់ពីជាប់ពន្ធនាគារ ៨ ឆ្នាំមកនៅត្រឹម ៥ ឆ្នាំវិញបន្ទាប់ពីជំនុំជម្រះកាលពីថ្ងៃទី ៣ កញ្ញាពីបទរំលោភសេពសន្ថវៈលើក្មេងស្រីអនីតិជន ២ នាក់នៅក្រុងតាខ្មៅកាលពីឆ្នាំ ២០១៦។
លោក ចៅក្រម ប៉ុល សំអឿន បានអានសាលដីកានៅចំពោះមុខបុរសជាប់ចោទថា រឿងនេះមានជនជាប់ចោទឈ្មោះ យឹម សុភាព អាយុ ៤០ ឆ្នាំ ហើយក្នុងអង្គហេតុគឺពាក់ព័ន្ធនឹងក្មេងស្រីជាអនីតិជន ២ នាក់ដែលសំណុំរឿងនេះ ពាក់ព័ន្ធបទរំលោភសេពសន្ថវៈដែលមានក្មេងស្រីរងគ្រោះ ២ នាក់។
លោក ចៅក្រម អានសាលដីកានៅក្នុងអង្គសវនាការថា ក្រោយពីបានពិភាក្សាគ្នា និងក្រោយពីបានពិចារណាមកក្រុមប្រឹក្សាជំនុំជម្រះយល់ឃើញថានៅក្នុងសំណុំរឿងរបស់សាលាដំបូងខេត្តកណ្តាលបង្ហាញថា យោងតាមសាក្សីម្នាក់ បញ្ជាក់ថាបានឃើញឈ្មោះ យឹម សុភាព ដែលជាជនជាប់ចោទនេះគឺនៅថ្ងៃកើតហេតុបានប៉ះពាល់ក្មេងរងគ្រោះ ២ នាក់ពិតប្រាកដមែន។ ប៉ុន្តែនៅក្នុងសំណុំរឿងដែលដាក់ចូលមកសាលាឧទ្ធរណ៍មិនឃើញមានលិខិតបញ្ជាក់ធ្វើកោសល្យវិច័យពីគ្រូពេទ្យពាក់ព័ន្ធនឹងក្មេងស្រីរងគ្រោះទេ។
លោកថ្លែងថា៖ «ដូច្នេះជនជាប់ចោទត្រូវសាលាឧទ្ធរណ៍ប្តូរបទចោទពីបទរំលោភសេពសន្ថវៈមានស្ថានទម្ងន់ទោសតាមបញ្ញត្តិមាត្រា ២៤១ មកមាត្រា ២៤៨ នៃក្រមព្រហ្មទណ្ឌវិញ និងពីជាប់ពន្ធនាគារ ៨ ឆ្នាំមកនៅត្រឹម ៥ ឆ្នាំវិញ» ។
ពាក់ព័ន្ធការបន្ថយទោសរបស់សាលាឧទ្ធរណ៍នេះដែរលោក អ៊ឹម ម៉ាច ជាមេធាវី ការពារសិទ្ធិឲ្យជនជាប់ចោទឈ្មោះ យឹម សុភាព បានប្រាប់ភ្នំពេញប៉ុស្តិ៍តាមទូរស័ព្ទពីម្សិលមិញក្រោយប្រកាសសាលដីកាថា កូនក្តីរបស់លោកត្រូវបានសាលាដំបូងខេត្តកណ្តាលចោទប្រកាន់ពីបទរំលោភសេពសន្ថវៈ។ ប៉ុន្តែនៅក្នុងសំណុំរឿងពុំមានភ័ស្តុតាងណាបញ្ជាក់ថា កូនក្តីរបស់លោកបានប្រព្រឹត្តទៅលើក្មេងស្រីរងគ្រោះ ២ នាក់នោះទេ។
ឯខាងតុលាការខេត្តកណ្តាលវិញក៏ស្នើសុំសមត្ថកិច្ចនគរបាលឲ្យខាងគ្រូពេទ្យធ្វើលិខិតកោសល្យវិច័យបញ្ជាក់ ប៉ុន្តែមិនឃើញមានលិខិតកោសល្យវិច័យទេរហូតដល់តុលាការខេត្តកណ្តាលធ្វើការចាត់របៀប (ស៊ើបអង្កេតឡើងវិញ) ម្តងហើយក៏នៅតែគ្មានលិខិតកោសល្យវិច័យទៀត។
លោកថ្លែងថា៖ «ដូច្នេះរឿងនេះយើងរកមិនឃើញមានភ័ស្តុតាងថា មានករណីរំលោភសេពសន្ថវៈទេ។ បើទោះបីជាតុលាការប្រកាសបន្ថយទោសក៏ដោយ តែចំពោះឆន្ទៈកូនក្តីខ្ញុំវិញគឺគាត់នៅតែមិនទទួលយកទោស ៥ ឆ្នាំនេះទេ»។
បើតាមកំណត់ហេតុរបស់តុលាការបង្ហាញថា កាលពីអំឡុងឆ្នាំ ២០១៥ ជនជាប់ចោទឈ្មោះ យឹម សុភាព អាយុ ៤០ ឆ្នាំគាត់បានមកជួលផ្ទះឈ្មោះ ស្រីមុំ មួយផ្នែកនៅក្រុងតាខ្មៅ ខេត្តកណ្តាល ដើម្បីបើកលក់បាយដោយមានប្រពន្ធ និងកូនរស់នៅជាមួយផង។ រីឯម្ចាស់ផ្ទះឈ្មោះ ស្រីមុំ នោះគឺបានបើកលក់គុយទាវ ហើយក្មេងរងគ្រោះម្នាក់ឈ្មោះ ស.ស.ភ អាយុ ១០ ឆ្នាំបានទៅជួយលាងចាន តែក្រោយមកបានឈប់លក់គុយទាវវិញ បន្ទាប់ពីបុរសជាប់ចោទជួលស្នាក់នៅ។
តាមចម្លើយក្មេងស្រីរងគ្រោះម្នាក់ ឈ្មោះ ស.ស.ភ អាយុ ១០ ឆ្នាំកាលពីនៅដំណាក់កាលនគរបាលបាននិយាយថា កាលពីថ្ងៃទី ១២ ខែធ្នូ ឆ្នាំ ២០១៦ ឈ្មោះ យឹម សុភាព បានទិញស្ករគ្រាប់ឲ្យនាងញាំ ខណៈនាងទៅផ្ទះរបស់ម្តាយធម៌ឈ្មោះ ស្រីមុំ។
នៅពេលនោះជនជាប់ចោទបានទាញដៃនាងចូលក្នុងបន្ទប់ដាក់អីវ៉ាន់មួយរួចបិទទ្វារហើយបានយកម្រាមដៃលូកប្រដាប់ភេទនាងដែលសកម្មភាពនេះជនជាប់ចោទបានប្រព្រឹត្តចំនួន ៤-៥ លើកមកហើយ។ បន្ទាប់មកពេលនាងទៅសាលារៀន ស្រាប់តែមានអ្នកគ្រូម្នាក់បានឃើញសំពត់នាងប្រឡាក់ឈាម ហើយបានប្រាប់ម្តាយក្មេងស្រីនោះ។ បន្ទាប់មកម្ដាយនាងបានប្ដឹងឲ្យសមត្ថកិច្ចចាប់ខ្លួនលោកដោយចោទថា រំលោភកូនគាត់តែម្ដង។ រីឯ ក្មេងរងគ្រោះម្នាក់ទៀត ឈ្មោះ ស.ណ មានអាយុ ១០ ឆ្នាំក៏ធ្លាប់ត្រូវឈ្មោះ យឹម សុភាព ច្របាច់ដោះរបស់នាងលេង ហើយក៏បានប្តឹងបុរសជាប់ចោទដែរ។
លោក យឹម សុភាព ត្រូវម្តាយក្មេងស្រីរងគ្រោះទាំង ២ នាក់ប្តឹងសមត្ថកិច្ចកាលពីថ្ងៃទី ១៨ ខែធ្នូ ឆ្នាំ ២០១៦ ហើយ ដល់ថ្ងៃទី ២៤ ខែធ្នូ ឆ្នាំ ២០១៦ ត្រូវនគរបាលចាប់ខ្លួនតាមបណ្តឹងពីម្តាយក្មេងស្រី ទាំង ២ នាក់។
សំណុំរឿងនេះត្រូវសាលាដំបូងខេត្តកណ្តាលកាលពីខែមិថុនា ឆ្នាំ ២០១៧ ផ្តន្ទាទោសជនជាប់ចោទឲ្យជាប់ពន្ធនាគារ ៨ ឆ្នាំចោទពីបទរំលោភសេពសន្ថវៈ និងបង្គាប់ឲ្យសងសំណងជំងឺចិត្តទៅក្មេងរងគ្រោះម្នាក់ៗចំនួន ៣ លានរៀល៕
