កណ្តាល: បុរសម្នាក់ជាប្អូនប្រុសម្ចាស់មន្ទីរសម្រាកព្យាបាល និងសម្ភពដែលមានទីតាំងនៅភូមិ អង្គស្នួល ឃុំពើក ស្រុកអង្គស្នួល ត្រូវបាននគរបាលស្រុកនាំយកទៅសាកសួរករណីប្រើកាំភ្លើងខ្លីវាយក្បាលបុរសជាសន្តិសុខម្នាក់ កាលពីថ្ងៃទី ៤ មករា។
លោក ថាច ផល្លា អធិការរងទទួលផែនព្រហ្មទណ្ឌនៃអធិការដ្ឋាននគរបាលស្រុកអង្គស្នួលប្រាប់ ភ្នំពេញ ប៉ុស្តិ៍ ថ្ងៃទី ៤ មករា នេះថា ជនរងគ្រោះ ឈ្មោះ ច្រឹក ស៊ីណា អាយុ ២៧ ឆ្នាំ។ ករណីនេះសមត្ថកិច្ចរបស់លោកបានហៅបុរសជាម្ចាស់គ្លីនិកនោះមកសាកសួរនៅអធិការដ្ឋាននគរបាលស្រុកអង្គស្នួលហើយ។ ចំពោះលទ្ធផលយ៉ាងណានោះ លោកមិនទាន់អាចផ្តល់ព័ត៌មានលម្អិតជូននៅឡើយទេ។
លោកប្រាប់ថា៖ «ករណីនេះយើងកំពុងតែមានចំណាត់ការសាកសួរជនបង្ក។ ខ្ញុំកំពុងកសាងសំណុំរឿងដើម្បីស្នើសុំយោបល់ពីព្រះរាជអាជ្ញាដើម្បីអនុវត្តតាមនីតិវិធីច្បាប់»។
ទោះយ៉ាងណា បើតាមមន្រ្តីនគរបាលស្រុកអង្គស្នួលម្នាក់ប្រាប់ថា ហេតុការណ៍នេះ បានកើតឡើងកាលពីវេលាម៉ោងជិត ១២ ថ្ងៃត្រង់ ថ្ងៃទី ៤ មករា ឆ្នាំ ២០២១ ស្ថិតក្នុងភូមិ-ឃុំ-ស្រុក អង្គស្នួល ខេត្តកណ្តាល។ ជនបង្កជាមន្រ្តីយោធាពាក់ផ្កាយ ១ និងជាប្អូនប្រុសរបស់ម្ចាស់គ្លីនិកដែលមានហីហោឈ្មោះ សុខ ម៉េង។
បើតាមមន្រ្តីនគរបាលរូបនោះនៅអធិការដ្ឋាននគរបាលស្រុកអង្គស្នួលបានរៀបរាប់ថា តាមពិតជនបង្កមិនមែនជាម្ចាស់គ្លីនិកនោះទេ រីឯម្ចាស់ គឺជាបងស្រីបង្កើតរបស់ជនបង្ក។ ប៉ុន្តែជនបង្កឧស្សាហ៍ចេញចូលគ្លីនិកខាងលើ ហើយមុនបង្កហេតុ បងស្រីរបស់ជនបង្កបាននិយាយប្រាប់ប្អូនប្រុសខ្លួនថាគាត់បាត់ស្បែកជើង។
មន្រ្តីនគរបាលបន្តថា គ្រានោះ ជនបង្កបានបើកមើលកាមេរ៉ាសុវត្ថិភាព ក៏ឃើញបុរសម្នាក់បានចូលយកស្បែកជើង ១ គូ ដែលបាត់នោះនៅពេលយប់។ ដោយមើលឃើញរូបភាពជនសង្ស័យបែបនេះ ជនបង្កបានសង្ស័យទៅលើបុរសជាសន្តិសុខរងគ្រោះ ព្រោះយល់ថា អាចជាអ្នកឲ្យដៃទៅចោរទើបបានជាបាត់ស្បែកជើង។
បើតាមមន្រ្តីនគរបាលថា បន្ទាប់ពីជនបង្កវាយជនរងគ្រោះហើយនោះ ជនបង្កមិនបានគេចខ្លួនទៅណាទេ ហើយភ្លាមៗនោះដែរ នគរបាលប៉ុស្តិ៍ឃុំពើកបានចុះអន្តរាគមន៍ដល់ទីតាំងកើតហេតុដើម្បីសាកសួរព័ត៌មាន។ រីឯកម្លាំងនគរបាលស្រុកអង្គស្នួលក៏បានចុះទៅដល់ទីតាំងកើតហេតុ និងនាំជនបង្កឡើងរថយន្ត ដើម្បីយកទៅសាកសួរនៅអធិការដ្ឋាននគរបាលស្រុកអង្គស្នួលតែម្តង៕